ಕಾರ್ತಿಕೇಯ 2 ಬಳಿಕ '18 ಪೇಜಸ್' ಮೂಲಕ ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆದ ನಿಖಿಲ್ - ಅನುಪಮಾ‌

2022 ಸಿನಿಮಾ ಕ್ಷೇತ್ರಕ್ಕೆ ಭರ್ಜರಿ ಕಮ್ ಬ್ಯಾಕ್ ನೀಡಿದ ವರ್ಷ ಎಂದೇ ಹೇಳಬಹುದು. ಅದರಲ್ಲೂ ಕನ್ನಡ ಚಿತ್ರರಂಗದ ಚಿತ್ರಗಳು 2022ರಲ್ಲಿ ಇತರೆ ಚಿತ್ರರಂಗದ ಚಿತ್ರಗಳನ್ನು ಹಿಂದಿಕ್ಕಿ ಅತಿಹೆಚ್ಚು ಯಶಸ್ಸು ಸಾಧಿಸಿದ ಚಿತ್ರರಂಗ ಎಂಬ ಖ್ಯಾತಿಯನ್ನು ಸಂಪಾದಿಸಿತು.

ಇನ್ನು ಈ 2022ರಲ್ಲಿ ಭರ್ಜರಿ ಯಶಸ್ಸು ಸಾಧಿಸಿದ ಚಿತ್ರಗಳ ಪೈಕಿ ನಿಖಿಲ್ ಹಾಗೂ ಅನುಪಮ ಪರಮೇಶ್ವರನ್ ನಟನೆಯ ಕಾರ್ತಿಕೇಯ 2 ಚಿತ್ರ ಕೂಡ ಒಂದು‌. ನೂರು ಕೋಟಿ ಕ್ಲಬ್ ಸೇರಿವಲ್ಲಿ ಯಶಸ್ವಿಯಾದ ಈ ಚಿತ್ರ ಹೆಚ್ಚಾಗಿ ಹಿಂದಿ ಸಿನಿ ರಸಿಕರ ಮನ ಗೆದ್ದಿತ್ತು.

ಹೀಗೆ ಭರ್ಜರಿಯಾಗಿ ಸದ್ದು ಮಾಡಿದ್ದ ಕಾರ್ತಿಕೇಯ 2 ಚಿತ್ರದ ನಾಯಕ‌ ನಿಖಿಲ್ ಸಿದ್ಧಾರ್ಥ್ ಹಾಗೂ ನಾಯಕಿ ಅನುಪಮಾ ಪರಮೇಶ್ವರನ್ ಮತ್ತೊಂದು ಚಿತ್ರಕ್ಕಾಗಿ ಒಂದಾಗಿದ್ದಾರೆ. ಸುಕುಮಾರ್ ಈ ಚಿತ್ರದ ಕತೆಯನ್ನು ಬರೆದಿದ್ದು, ನಿರ್ದೇಶಕ ಪಲ್ನಾಟಿ ಸೂರ್ಯ ಪ್ರತಾಪ್ ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ‌. ಲವ್ ಸ್ಟೋರಿ ಜಾನರ್ ನ ಈ ಚಿತ್ರಕ್ಕೆ '18 ಪೇಜಸ್' ಎಂದು ಹೆಸರಿಡಲಾಗಿದೆ.

ಡಿಸೆಂಬರ್ 23ರಂದು ಬಿಡುಗಡೆಯಾದ ಈ ಚಿತ್ರ ತನ್ನ ಮೊದಲ‌ 10 ದಿನಗಳಲ್ಲಿ 25 ಕೋಟಿ ರುಪಾಯಿಗಳಿಗಿಂತಲೂ ಹೆಚ್ಚು ಗಳಿಸಿದೆ ಎಂದು ಚಿತ್ರತಂಡ ಘೊಷಣೆ ಮಾಡಿದೆ‌.‌ ವಿಶೇಷವೆಂದರೆ ಬಿಡುಗಡೆ ದಿನಕ್ಕಿಂತ ಹತ್ತನೇ ದಿನವೇ ಈ ಚಿತ್ರದ ಕಲೆಕ್ಷನ್ ಜೋರಾಗಿದೆ.‌ ಹೀಗೆ ಕಾರ್ತಿಕೇಯ 2 ಮೂಲಕ‌ ಗೆಲುವಿನ ಪತಾಕೆ ಹಾರಿಸಿದ್ದ ನಿಖಿಲ್ ಹಾಗೂ ಅನುಪಮಾ ಪರಮೇಶ್ವರನ್ ಜೋಡಿ ಮತ್ತೊಂದು ಚಿತ್ರದಲ್ಲಿ ಒಟ್ಟಿಗೆ ನಟಿಸಿ ಗೆಲುವು ಕಂಡಿದೆ.