ನವೆಂಬರ್ 18 RRR ಚಿತ್ರಕ್ಕೆ ಸ್ಪೆಷಲ್: 4ವರ್ಷದ ಹಿಂದೆ ರಾಜಮೌಳಿ ಟ್ವಿಟ್!

2017 ನವೆಂಬರ್ 18ರಂದು RRR ಪ್ರಕಟ!

'ಬಾಹುಬಲಿ' ಸರಣಿ ಚಿತ್ರಗಳ ಮೂಲಕ ರಾಜಮೌಳಿಯ ಪ್ರಭಾವ ಜಾಗತಿಕ ಮಟ್ಟಕ್ಕೆ ವಿಸ್ತರಿಸಿದೆ. ಬಾಹುಬಲಿ ಸರಣಿ ಸಿನಿಮಾಗಳು ಯಾರೂ ನಿರೀಕ್ಷಿಸದ ಮಟ್ಟಿಗೆ ದೊಡ್ಡ ಯಶಸ್ಸನ್ನು ಕಂಡಿತು. ಇದಾದ ನಂತರ ರಾಜಮೌಳಿ ಮುಂದಿನ ಚಿತ್ರದ ಬಗ್ಗೆ ಸಾಕಷ್ಟು ಊಹಾಪೋಹಗಳು ಹುಟ್ಟಿ ಕೊಂಡಿದ್ದವು. 'ಬಾಹುಬಲಿ: ದಿ ಕನ್‌ಕ್ಲೂಷನ್' ಬಿಡುಗಡೆಯಾದ ಆರು ತಿಂಗಳ ನಂತರ ರಾಜಮೌಳಿ ಅಂತಿಮವಾಗಿ ನವೆಂಬರ್ 18, 2017 RRR ಚಿತ್ರವನ್ನು ಪ್ರಕಟ ಮಾಡಿದರು.

4 ವರ್ಷದ ಹಿಂದೆ RRR ಬಗ್ಗೆ ರಾಜಮೌಳಿ ಟ್ವಿಟ್!

ನವೆಂಬರ್ 18, 2017ರ ರಾತ್ರಿ 10 ಗಂಟೆ ಸುಮಾರಿಗೆ ರಾಜಮೌಳಿ ತಮ್ಮ ಮುಂದಿನ ಚಿತ್ರ ಜೂನಿಯರ್ ಎನ್‌ಟಿಆರ್ ಮತ್ತು ರಾಮ್ ಚರಣ್ ಅವರ ಜೊತೆಗೆ ಎಂದು ಪ್ರಕಟ ಮಾಡಿದರು. ಆಗ ಇನ್ನೂ ಈ ಚಿತ್ರಕ್ಕೆ ಶೀರ್ಷಿಕೆಯನ್ನು ಇಟ್ಟಿರಲಿಲ್ಲ. ಜೂನಿಯರ್ ಎನ್‌ಟಿಆರ್ ಮತ್ತು ರಾಮ್ ಚರಣ್ ಜೊತೆಗಿರುವ ಫೋಟೋವನ್ನು ರಾಜಮೌಳಿ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದರು. ಆಗ ಹೆಚ್ಚಿ ಮಾಹಿತಿ ಬಿಟ್ಟು ಕೊಡದೆ ಕೇಲವ ಫೋಟೊವನ್ನು ಮಾತ್ರ ಹಂಚಿಕೊಂಡಿದ್ದರು. ಆ ಮೊದಲ ಪೋಸ್ಟ್ ಈಗ ದೊಡ್ಡ ಇತಿಹಾಸ ನಿರ್ಮಾಣಕ್ಕೆ ಸಾಕ್ಷಿ ಆಗಲು ಹೊರಟಿದೆ.

ನಾಲ್ಕು ವರ್ಷಗಳ ಬಳಿಕ ರಿಲೀಸ್ ಆಗುತ್ತಿದೆ RRR!

ಈ ಚಿತ್ರದ ಪ್ರಮುಖವಾಗಿ ಚಿತ್ರದ ಪಾತ್ರ ವರ್ಗದಿಂದ ಹೆಚ್ಚಿನ ಗಮನ ಸೆಳೆದಿದೆ. ಟಾಲಿವುಡ್‌ನ ಇಬ್ಬರೂ ಸ್ಟಾರ್‌ ನಟರು ಒಟ್ಟಿಗೆ ತೆರೆ ಮೇಲೆ ಬಂದರೆ ಅದು ಅವರ ಅಭಿಮಾನಿಗಳಿಗೆ ದೊಡ್ಡ ಹಬ್ಬವೇ ಸರಿ. ಸಿನಿಮಾ ಪ್ರಕಟ ಆಗಿ ಬರೋಬ್ಬರಿ ನಾಲ್ಕು ವರ್ಷಗಳ ಬಳಿಕ ರಿಲೀಸ್‌ಗೆ ರೆಡಿಯಾಗಿದೆ. ಈ ನಡುವೆ ಹಲವು ಬಾರಿ ಸಿನಿಮಾದ ರಿಲೀಸ್‌ ದಿನಾಂಕ ಬದಲಾಗಿದೆ. ಚಿತ್ರ ತಡವಾಗಲು ಕೊರೊನಾ ಮಹಾಮಾರಿ ಕೂಡ ಕಾರಣ. ಇನ್ನು ದೊಡ್ಡ ಬಜೆಟ್‌ನ, ದೊಡ್ಡ ಸ್ಟಾರ್‌ ಕಾಸ್ಟ್‌ ಇರುವ ಸಿನಿಮಾ ಆದ ಕಾರಣ ಹೆಚ್ಚು ಸಮಯ ತೆಗೆದುಕೊಂಡಿದೆ ಚಿತ್ರ ತಂಡ.

ಹೇಗಿರಲಿದೆ ಜಕ್ಕಣ್ಣನ ಮುಂದಿನ ಸಿನಿಮಾ!

ಇನ್ನು 50 ದಿನಗಳಲ್ಲಿ ತ್ರಿಬಲ್‌ ಆರ್‌ ಸಿನಿಮಾ ಬಿಡುಗಡೆ ಆಗಲಿದೆ. ಈ ಚಿತ್ರದ ರಿಲೀಸ್‌ ನಿರೀಕ್ಷೆಯ ಜೊತೆಗೆ ಮುಂದೇನು ಎನ್ನುವ ಕುತೂಹಲ ಕೂಡ ಹುಟ್ಟಿ ಕೊಂಡಿದೆ. ನಿರ್ದೇಶಕ ರಾಜಮೌಳಿ ಅವರು 'ಬಾಹುಬಲಿ' ಮೂಲಕ ಅನಿರೀಕ್ಷಿತ ಬ್ಲಾಕ್‌ ಬಸ್ಟರ್ ಹಿಟ್ ಚಿತ್ರವನ್ನು ನೀಡಿದ್ದಾರೆ. ಅದಕ್ಕೂ ಮುನ್ನ ಮಗಧೀರ, ಈಗ ಚಿತ್ರಗಳ ಮೂಲಕ ಅಸಾಧಾರಣ ಪ್ರಯತ್ನಗಳನ್ನು ರಾಜಮೌಳಿ ತಮ್ಮ ಸಿನಿಮಾಗಳಲ್ಲಿ ಮಾಡಿ ಸೈ ಎನಿಸಿಕೊಂಡಿದ್ದಾರೆ. ಹಾಗಾಗಿ ಈಗ ಆರ್‌ಆರ್‌ಆರ್‌ ಸಿನಿಮಾದ ಬಳಿಕ ರಾಜಮೌಳಿ ಮುಂದೆ ಮಹೇಶ್‌ ಬಾಬು ಜೊತೆಗೆ ಸಿನಿಮಾ ಮಾಡುತ್ತಾರೆ ಎನ್ನುವ ಸುದ್ದಿ ಇದೆ. ಈ ಸಿನಿಮಾ ಹೇಗೆ ಬರಲಿದೆ ಎನ್ನುವ ಕುತೂಹಲಗಳು ಸಹಜವಾಗಿ ಹುಟ್ಟಿ ಕೊಂಡಿವೆ.