Bro Day 1 Collection: ಬಾಕ್ಸಾಫೀಸ್‌ನಲ್ಲಿ ಪವರ್ ಸ್ಟಾರ್ ದರ್ಬಾರ್ 'ಬ್ರೋ'.. ಬೆಂಗಳೂರಿನಲ್ಲೂ ಹೌಸ್‌ಫುಲ್

ತೆಲುಗಿನ ಫ್ಯಾಂಟಸಿ ಎಂಟರ್‌ಟೈನರ್ ಬ್ರೋ: 'ದಿ ಅವತಾರ್' ಭರ್ಜರಿ ಓಪನಿಂಗ್ ಪಡೆದುಕೊಂಡು ಮುನ್ನುಗ್ಗುತ್ತಿದೆ. ನಿನ್ನೆ(ಜುಲೈ 28) ಬಿಡುಗಡೆಯಾದ ಸಿನಿಮಾ ಕೋಟಿ ಕೋಟಿ ಕೊಳ್ಳೆ ಹೊಡೆದು ಎಲ್ಲರ ಹುಬ್ಬೇರಿಸಿದೆ. ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ಸಿಕ್ಕರೂ ಪ್ರೇಕ್ಷಕರು ಸಿನಿಮಾ ನೋಡಲು ಮುಗಿಬಿದ್ದಿದ್ದಾರೆ. ಬಾಕ್ಸಾಫೀಸ್ ಪಂಡಿತರ ಲೆಕ್ಕಾಚಾರ ಮೀರಿ ಮೊದಲ ದಿನ ಆಂಧ್ರ, ತೆಲಂಗಾಣದಲ್ಲಿ 'ಬ್ರೋ' ಸಿನಿಮಾ ಗಳಿಕೆ ಕಂಡಿದೆ.

ಮೊಹರಂ ಹಬ್ಬದ ರಜೆ ಸಿನಿಮಾ ಕಲೆಕ್ಷನ್‌ಗೆ ಪ್ಲಸ್ ಆಗಿದ್ದು 2ನೇ ದಿನವೂ ಸಿನಿಮಾ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಇತ್ತೀಚೆಗೆ ಫ್ಯಾಮಿಲಿ ಸಮೇತ ನೋಡುವಂತಹ ಸ್ಟಾರ್ ನಟರ ಸಿನಿಮಾಗಳು ಬಂದಿರಲಿಲ್ಲ. ಹಾಗಾಗಿ 'ಬ್ರೋ' ಸಿನಿಮಾ ನೋಡಲು ದೊಡ್ಡಮಟ್ಟದಲ್ಲಿ ಪ್ರೇಕ್ಷಕರು ಥಿಯೇಟರ್‌ಗೆ ಹೋಗುತ್ತಿದ್ದಾರೆ. ತಮಿಳಿನ 'ವಿನೋದಯ ಸಿತಂ' ಚಿತ್ರವನ್ನು ಸಮುದ್ರ ಖನಿ ತೆಲುಗಿಗೆ ರೀಮೆಕ್ ಮಾಡಿದ್ದಾರೆ. ಪವನ್ ಕಲ್ಯಾಣ್ ಜೊತೆಗೆ ಸೋದರಳಿಯ ಸಾಯಿ ಧರಮ್ ತೇಜ್ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ. ಕೊಂಚ ಮಟ್ಟಿಗೆ ಬಾಲಿವುಡ್‌ನ 'ಓ ಮೈ ಗಾಡ್' ಸಿನಿಮಾ ನೆನಪಿಸುವ ಬ್ರೋ ಪ್ರೇಕ್ಷಕರ ಮನಗೆದ್ದಿದೆ.

ಇಡೀ ಕುಟುಂಬದ ಜವಾಬ್ದಾರಿ ಹೆಗಲೇರಿಸಿಕೊಂಡ ನಾಯಕ ಕಾಲದ ಜೊತೆ ಹೋರಾಟ ಮಾಡುತ್ತಾ ಬದುಕುತ್ತಿರುತ್ತಾನೆ. ಹಠಾತ್ತನೆ ಆತ ಅಪಘಾತದಲ್ಲಿ ಜೀವ ಚೆಲ್ಲುತ್ತಾನೆ. ಆದರೆ ಆ ಕಾಲವೇ ಅವನಿಗೆ 90 ದಿನಗಳ ಹೆಚ್ಚಿನ ಆಯಸ್ಸು ನೀಡಿದರೇ ಏನಾಗುತ್ತದೆ? ಅನ್ನುವ ಸಣ್ಣ ಎಳೆ ಇಟ್ಟುಕೊಂಡು 'ಬ್ರೋ': ದಿ ಅವತಾರ್ ಸಿನಿಮಾ ಕಟ್ಟಿಕೊಟ್ಟಿದ್ದಾರೆ. ತಮಿಳಿನಲ್ಲಿ ಸ್ವತಃ ಸಮುದ್ರ ಖನಿ ನಿರ್ದೇಶಿಸಿ ಈ ಚಿತ್ರದಲ್ಲಿ ನಟಿಸಿದ್ದರು.

ಮೊದಲ ದಿನ ₹30 ಕೋಟಿ ಗಳಿಕೆ

ಬಾಕ್ಸಾಫೀಸ್‌ನಲ್ಲಿ 'ಬ್ರೋ' ಕಲೆಕ್ಷನ್ ಸುನಾಮಿ ಜೋರಾಗಿದೆ. ಮೊದಲ ದಿನವೇ ಸಿನಿಮಾ ಅಂದಾಜು 30 ಕೋಟಿ ರೂ. ಕಲೆಕ್ಷನ್ ಮಾಡಿದೆ ಎಂದು ಬಾಕ್ಸಾಫೀಸ್ ಪಂಡಿತರು ಹೇಳುತ್ತಿದ್ದಾರೆ. ವಿಶ್ವದಾದ್ಯಂತ ದೊಡ್ಡಮಟ್ಟದಲ್ಲಿ ಸಿನಿಮಾ ರಿಲೀಸ್ ಆಗಿದೆ. ಆಂಧ್ರ, ತೆಲಂಗಾಣದಲ್ಲಿ ಕಲೆಕ್ಷನ್ ಜೋರಾಗಿದೆ. ಚಿತ್ರ ಮೊದಲ ದಿನ 20ರಿಂದ 22 ಕೋಟಿ ರೂ. ಗಳಿಸುವ ಅಂದಾಜಿತ್ತು. ಆದರೆ ನಿರೀಕ್ಷೆ ಮೀರಿ ಸಿನಿಮಾ ಕಲೆಕ್ಷನ್ ಮಾಡಿದೆ ಎನ್ನಲಾಗ್ತಿದೆ.

ಬೆಂಗಳೂರಿನಲ್ಲೂ 'ಬ್ರೋ' ಹವಾ

'ಆದಿಪುರುಷ್' ರೀತಿಯ ಪ್ಯಾನ್ ಇಂಡಿಯಾ ಸಿನಿಮಾ ಕೂಡ ಪ್ರೇಕ್ಷಕರಿಗೆ ನಿರಾಸೆ ಮೂಡಿಸಿತ್ತು. ಹಾಗಾಗಿ 'ಬ್ರೋ' ಸಿನಿಮಾ ನೋಡಲು ಕೆಲವರು ಉತ್ಸುಕರಾಗಿದ್ದಾರೆ. ಕರ್ನಾಟದಲ್ಲೂ ಈ ಫ್ಯಾಂಟಸಿ ಡ್ರಾಮಾ ಸಿನಿಮಾ ದೊಡ್ಡಮಟ್ಟದಲ್ಲಿ ರಿಲೀಸ್ ಆಗಿದೆ. ಬೆಂಗಳೂರಿನಲ್ಲಿ ಟಿಕೆಟ್ ಬುಕ್ಕಿಂಗ್ ಜೋರಾಗಿದೆ. 2ನೇ ದಿನ ಕೆಲ ಶೋಗಳು ಹೌಸ್‌ಫುಲ್ ಆಗುತ್ತಿದೆ. ಆ ಮೂಲಕ ವೀಕೆಂಡ್‌ನಲ್ಲಿ ಭರ್ಜರಿ ಕಲೆಕ್ಷನ್ ಸುಳಿವು ಸಿಗುತ್ತಿದೆ.

ಪವರ್ ಸ್ಟಾರ್ ಹ್ಯಾಟ್ರಿಕ್ ಹಿಟ್

ಪವನ್ ಕಲ್ಯಾಣ್ ನಟನೆಯ ಕೆಲ ಸಿನಿಮಾಗಳು ಅಷ್ಟಾಗಿ ಸದ್ದು ಮಾಡಿರಲಿಲ್ಲ. ಆದರೆ 'ವಕೀಲ್ ಸಾಬ್' ಸೂಪರ್ ಹಿಟ್ ಆಗಿತ್ತು. ಬಳಿಕ ಬಂದ ಭೀಮ್ಲಾ ನಾಯಕ್ ಸಿನಿಮಾ ಬಾಕ್ಸಾಫೀಸ್ ಶೇಕ್ ಮಾಡಿತ್ತು. ಇದೀಗ ಅದೇ ಹಾದಿಯಲ್ಲಿ 'ಬ್ರೋ' ದರ್ಬಾರ್ ನಡೀತಿದೆ. ಅಚ್ಚರಿ ಎಂದರೆ ಈ ಮೂರು ಸಿನಿಮಾಗಳು ಕೂಡ ರೀಮೆಕ್. ಮುಂದೆ 'ಹರಿಹರ ವೀರಮಲ್ಲು', 'ಓಜಿ' ಎನ್ನುವ ಮತ್ತೆರಡು ಸಿನಿಮಾಗಳಲ್ಲಿ ಪವರ್ ಸ್ಟಾರ್ ನಟಿಸ್ತಿದ್ದಾರೆ.

40 ಕೋಟಿ ಸಂಭಾವನೆ 'ಬ್ರೋ'

ನಟ ಸಾಯಿ ಧರಮ್ ತೇಜ್ ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡಿದ್ದರು. ಬದುಕೋದೇ ಇಲ್ಲ ಎನ್ನುವ ಮಟ್ಟಕ್ಕೆ ಹೋಗಿದ್ದ ಸಾಯಿ ಪವಾಡದ ರೀತಿಯಲ್ಲಿ ವಾಪಸ್ ಬಂದಿದ್ದರು. ಈ ಚಿತ್ರದಲ್ಲೂ ನಾಯಕ ಅಪಘಾತದಲ್ಲಿ ಸಾಯುವ ಸನ್ನಿವೇಶ ಇದೆ. ಅದು ಪ್ರೇಕ್ಷಕರಿಗೆ ಕನೆಕ್ಟ್ ಆಗುತ್ತಿದೆ. ಇನ್ನು ಈ ಚಿತ್ರಕ್ಕಾಗಿ ದಿನವೊಂದಕ್ಕೆ 2 ಕೋಟಿ ರೂ.ನಂತೆ 22 ದಿನಕ್ಕೆ 45 ಕೋಟಿ ಸಂಭಾವನೆ ಪಡೆದಿದ್ದೇನೆ ಎಂದು ಸ್ವತಃ ಪವನ್ ಕಲ್ಯಾಣ್ ಹೇಳಿದ್ದರು.