2022ರಲ್ಲಿ ಅತಿದೊಡ್ಡ ನಷ್ಟ ಕಂಡ 5 ಚಿತ್ರಗಳು; 125 ಕೋಟಿ ಲಾಸ್ ಮಾಡಿತ್ತು ಸ್ಟಾರ್ ನಟನ ದೊಡ್ಡ ಚಿತ್ರ!

1. ರಾಧೆ ಶ್ಯಾಮ್

ಸುಮಾರು 300 ಕೋಟಿ ಬಜೆಟ್‌ನಲ್ಲಿ ತಯಾರಾಗಿದ್ದ ಪ್ರಭಾಸ್ ಹಾಗೂ ಪೂಜಾ ಹೆಗ್ಡೆ ನಟನೆಯ ಬಹುನಿರೀಕ್ಷಿತ ಚಿತ್ರ ರಾಧೆ ಶ್ಯಾಮ್ ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿತು. ಚಿತ್ರ ನೋಡಿದ ಪ್ರೇಕ್ಷಕರು ಅಷ್ಟಕ್ಕಷ್ಟೇ ಎಂದ ಕಾರಣ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಚಿತ್ರಮಂದಿರಗಳತ್ತ ಬರಲಿಲ್ಲ. ಪರಿಣಾಮ ಚಿತ್ರ ಹೀನಾಯ ನಷ್ಟ ಕಂಡಿತು. ಸಾಹೋ ಚಿತ್ರವನ್ನು ರಕ್ಷಿಸಿದ್ದ ಪ್ರಭಾಸ್ ಸ್ಟಾರ್‌ಡಂ ಈ ಚಿತ್ರವನ್ನು ರಕ್ಷಿಸಲು ಆಗಲಿಲ್ಲ. ನಿರ್ಮಾಪಕರು ಸೇಫ್ ಆಗಲು 210 ಕೋಟಿ ಗಳಿಸಬೇಕಿದ್ದ ರಾಧೆ ಶ್ಯಾಮ್ 84.15 ಕೋಟಿ ಶೇರ್ ಕೋಟಿ ಶೇರ್ ಕಲೆಕ್ಷನ್ ಮಾಡಿತು. ಈ ಮೂಲಕ ಚಿತ್ರ 125.85 ಕೋಟಿ ನಷ್ಟ ಅನುಭವಿಸಿತು.

2. ಆಚಾರ್ಯ

2022ರಲ್ಲಿ ಮಕಾಡೆ ಮಲಗಿದ ಸ್ಟಾರ್ ನಟರ ಚಿತ್ರಗಳಲ್ಲಿ ಮೆಗಾ ಸ್ಟಾರ್ ಚಿರಂಜೀವಿ ಹಾಗೂ ರಾಮ್ ಚರಣ್ ನಟನೆಯ ಆಚಾರ್ಯ ಕೂಡ ಒಂದು. ಬೃಹತ್ ನಿರೀಕ್ಷೆ ಹುಟ್ಟುಹಾಕಿದ್ದ ಈ ಸಿನಿಮಾ ಸೋತಿತ್ತು. ತಂದೆ ಮಗನ ಸ್ಟಾರ್‌ಡಂ ಕೂಡ ಚಿತ್ರದ ಕೈ ಹಿಡಿಯಲಿಲ್ಲ. ಲಾಭ ಗಳಿಸಲು 140 ಕೋಟಿ ಸಂಪಾದಿಸಿಲೇಬೇಕಿದ್ದ ಈ ಚಿತ್ರ 45.20 ಕೋಟಿ ಶೇರ್ ಕಲೆಕ್ಷನ್ ಮಾಡಿತು. ಪರಿಣಾಮ 94.80 ಕೋಟಿ ನಷ್ಟವನ್ನು ಅನುಭವಿಸಿತು.

3.ಲೈಗರ್

ಬಿಡುಗಡೆಗೂ ಮೊದಲೇ ನಮ್ಮ ಚಿತ್ರ ಮತ್ತೊಂದು ಹಂತದಲ್ಲಿ ಇರುತ್ತೆ, ಇಡೀ ಇಂಡಿಯಾನ ಅಲ್ಲಾಡಿಸಿಬಿಡುತ್ತೆ ಎಂದು ಚಿತ್ರಮಂದಿರದ ಅಂಗಳಕ್ಕೆ ಬಂದ ವಿಜಯ್ ದೇವರಕೊಂಡ ಹಾಗೂ ಪುರಿ ಜಗನ್ನಾಥ್ ಕಾಂಬಿನೇಶನ್‌ನ ಲೈಗರ್ ಚಿತ್ರವನ್ನು ಸಿನಿ ಪ್ರೇಕ್ಷಕರು ತಳ್ಳಿ ಹಾಕಿದರು. ಅತಿ ಕಳಪೆ ವಿಮರ್ಶೆ ಪಡೆದುಕೊಂಡ ಈ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿತ್ತು. ಸೇಫ್ ಆಗಲು 90 ಕೋಟಿ ಬ್ರೇಕ್ ಈವೆನ್ ಕಲೆಕ್ಷನ್ ಮಾಡಬೇಕಿದ್ದ ಈ ಚಿತ್ರ 27.65 ಕೋಟಿ ಗಳಿಸಿತು. ಪರಿಣಾಮವಾಗಿ 62.35 ಕೋಟಿ ನಷ್ಟ ಅನುಭವಿಸಿತು.

4. ಗಾಡ್‌ಫಾದರ್

ಈ ಪಟ್ಟಿಯಲ್ಲಿ ಮೆಗಾಸ್ಟಾರ್ ಚಿರಂಜೀವಿ ನಟನೆಯ ಮತ್ತೊಂದು ಚಿತ್ರ ಗಾಡ್‌ಫಾದರ್ ಕೂಡ ಸೇರಿಕೊಂಡಿದೆ. ನೂರು ಕೋಟಿ ಕ್ಲಬ್ ಸೇರಿದರೂ ಸಹ ಚಿತ್ರ ಲಾಭ ತಂದುಕೊಡುವಲ್ಲಿ ವಿಫಲವಾಗಿದೆ. ಮಲಯಾಳಂನ ರಿಮೇಕ್ ಚಿತ್ರವಾಗಿದ್ದ ಗಾಡ್‌ಫಾದರ್ 92 ಕೋಟಿ ಬ್ರೇಕ್ ಈವೆನ್ ಕಲೆಕ್ಷನ್ ಮಾಡಿದ್ದರೆ ಸೇಫ್ ಆಗುತ್ತಿತ್ತು. ಆದರೆ ಚಿತ್ರ ಕೇವಲ 54.65 ಕೋಟಿ ಶೇರ್ ಕಲೆಕ್ಷನ್ ಮಾಡಿ 37.35 ಕೋಟಿ ನಷ್ಟ ಕಂಡಿತು.

5. ದ ವಾರಿಯರ್

ಇನ್ನು ರಾಮ್ ಪೋತಿನೇನಿ ಹಾಗೂ ಕೃತಿ ಶೆಟ್ಟಿ ನಟನೆಯ ದ ವಾರಿಯರ್ ಕೂಡ ಕಳೆದ ವರ್ಷ ಮುಗ್ಗರಿಸಿದ ಚಿತ್ರಗಳಲ್ಲಿ ಒಂದು. 45 ಕೋಟಿ ಗಳಿಸಿದರೆ ಸೇಫ್ ಆಗಬಹುದಾಗಿದ್ದ ಈ ಚಿತ್ರ 20.45 ಶೇರ್ ಕಲೆಕ್ಷನ್ ಮಾಡಿತು. ಹೀಗಾಗಿ 24.55 ಕೋಟಿ ನಷ್ಟವನ್ನು ಕಂಡಿತು.