ರಾಮ್ ಚರಣ್ ಬರ್ತ್ಡೇಗೆ 'ಕುಸ್ತಿ' ಫಿಕ್ಸ್: 'ಪೆದ್ದಿ' ಟೀಸರ್ ರಿಲೀಸ್ ಡೇಟ್ ಔಟ್; ಫ್ಯಾನ್ಸ್‌ಗೆ ಹಬ್ಬವೋ ಹಬ್ಬ…

ಗ್ಲೋಬಲ್ ಸ್ಟಾರ್ ರಾಮ್ ಚರಣ್ ಅಭಿಮಾನಿಗಳಿಗೆ ಈಗ ಹಬ್ಬದ ಸಂಭ್ರಮ. ಮಾರ್ಚ್ 27 ಬಂತೆಂದರೆ ಸಾಕು, ಮೆಗಾ ಪವರ್ ಸ್ಟಾರ್ ಫ್ಯಾನ್ಸ್ ಸೋಷಿಯಲ್ ಮೀಡಿಯಾದಲ್ಲಿ ಅಬ್ಬರ ಶುರು ಮಾಡುತ್ತಾರೆ. ಈ ಬಾರಿ ಚರಣ್ ಅವರ 41ನೇ ಹುಟ್ಟುಹಬ್ಬಕ್ಕೆ ದೊಡ್ಡ ಉಡುಗೊರೆ ಕಾದಿದೆ ಎಂಬ ಸುದ್ದಿ ಫಿಲ್ಮ್‌ನಗರ್‌ನಲ್ಲಿ ಸಖತ್ ಸೌಂಡ್ ಮಾಡುತ್ತಿದೆ.

ಹೌದು, ಬುಚ್ಚಿಬಾಬು ಸನಾ ನಿರ್ದೇಶನದ 'ಪೆದ್ದಿ' ಚಿತ್ರದ ಅಪ್ಡೇಟ್‌ಗಾಗಿ ಕಾದು ಕುಳಿತಿದ್ದವರಿಗೆ ಈಗ ಗುಡ್ ನ್ಯೂಸ್ ಸಿಕ್ಕಿದೆ. ಚಿತ್ರತಂಡವು ರಾಮ್ ಚರಣ್ ಹುಟ್ಟುಹಬ್ಬದ ಅಂಗವಾಗಿ ಚಿತ್ರದ ವಿಶೇಷ ಟೀಸರ್ ಬಿಡುಗಡೆ ಮಾಡಲು ಪ್ಲಾನ್ ಮಾಡಿಕೊಂಡಿದೆ. ಈ ಟೀಸರ್ ಚಿತ್ರದ ಮೇಲಿರುವ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡುವುದರಲ್ಲಿ ಅನುಮಾನವೇ ಇಲ್ಲ.

ವಿಶೇಷವೆಂದರೆ, ಈ ಟೀಸರ್‌ಗೆ 'ಕುಸ್ತಿ' ಎಂದು ಹೆಸರಿಡಲಾಗಿದೆ ಎಂದು ಹೇಳಲಾಗುತ್ತಿದೆ. ಚಿತ್ರದ ಕಥೆಯ ಬಗ್ಗೆ ಒಂದು ಸಣ್ಣ ಝಲಕ್ ಈ ಟೀಸರ್ನಲ್ಲಿ ಸಿಗಲಿದೆ. ಚರಣ್ ಅವರ ಲುಕ್ ಮತ್ತು ಆಕ್ಷನ್ ಸೀನ್‌ಗಳು ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿವೆ.

'ಪೆದ್ದಿ' ರಿಲೀಸ್ ಮುಂದಕ್ಕೆ?

ಈ ಮೊದಲು 'ಪೆದ್ದಿ' ಸಿನಿಮಾ ಮಾರ್ಚ್ 27ರಂದು ತೆರೆಗೆ ಬರಬೇಕಿತ್ತು. ಆದರೆ ಕೆಲಸಗಳು ಬಾಕಿ ಇರುವ ಕಾರಣ, ಚಿತ್ರದ ಬಿಡುಗಡೆಯನ್ನು ಏಪ್ರಿಲ್ 30, 2026ಕ್ಕೆ ಮುಂದೂಡಲಾಗಿದೆ. ಚಿತ್ರವು ಅಚ್ಚುಕಟ್ಟಾಗಿ ಮೂಡಿಬರಲಿ ಎಂಬ ಕಾರಣಕ್ಕೆ ಚಿತ್ರತಂಡ ಈ ನಿರ್ಧಾರ ತಂದಿದೆ. ಇದು ಅಭಿಮಾನಿಗಳಿಗೆ ಸ್ವಲ್ಪ ಬೇಸರ ತಂದಿದ್ದರೂ, ಹುಟ್ಟುಹಬ್ಬದಂದು ಸಿಗಲಿರುವ ಟೀಸರ್ ಆ ಬೇಸರವನ್ನು ಮರೆಸಲಿದೆ.

ಗ್ರಾಮೀಣ ಸೊಗಡಿನ ಕ್ರಿಕೆಟ್ ಕಥೆ

ಈ ಚಿತ್ರವು ಕೇವಲ ಆಕ್ಷನ್ ಸಿನಿಮಾವಲ್ಲ. ಇದೊಂದು ಗ್ರಾಮೀಣ ಹಿನ್ನೆಲೆಯ ಕ್ರೀಡಾ ಸಿನಿಮಾ. ಹಳ್ಳಿಯಲ್ಲಿ ನಡೆಯುವ ಕ್ರಿಕೆಟ್ ಪಂದ್ಯಾವಳಿಯ ಸುತ್ತ ಕಥೆ ಸಾಗುತ್ತದೆ ಎನ್ನಲಾಗಿದೆ. ರಾಮ್ ಚರಣ್ ಈ ಸಿನಿಮಾದಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರ ಜೊತೆಗೆ ಬಾಲಿವುಡ್ ಬ್ಯೂಟಿ ಜಾನ್ವಿ ಕಪೂರ್ ನಾಯಕಿಯಾಗಿ ನಟಿಸಿದ್ದಾರೆ. ಜಾನ್ವಿ ಅವರ ಪಾತ್ರದ ಹೆಸರು 'ಅಚಿಯಮ್ಮ'. ಈಗಾಗಲೇ ಅವರ ಫಸ್ಟ್ ಲುಕ್ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.

ತಾರಾಗಣದಲ್ಲಿ ಸ್ಟಾರ್ ನಟರ ದಂಡೇ ಇದೆ...

'ಪೆದ್ದಿ' ಸಿನಿಮಾದಲ್ಲಿ ಕೇವಲ ಚರಣ್ ಮಾತ್ರವಲ್ಲ, ದೊಡ್ಡ ತಾರಾಬಳಗವೇ ಇದೆ. ಕನ್ನಡ ನಟ ಶಿವರಾಜ್ಕುಮಾರ್ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ದಿವ್ಯೇಂದು ಶರ್ಮಾ, ಜಗಪತಿ ಬಾಬು, ಬೋಮನ್ ಇರಾನಿ ಅವರಂತಹ ದಿಗ್ಗಜ ನಟರು ಈ ಸಿನಿಮಾದಲ್ಲಿದ್ದಾರೆ. ಇದು ಸಿನಿಮಾದ ತೂಕವನ್ನು ಹೆಚ್ಚಿಸಿದೆ.

ಎ.ಆರ್. ರೆಹಮಾನ್ ಮ್ಯೂಸಿಕ್

ಸಿನಿಮಾದ ಹಾಡುಗಳ ಬಗ್ಗೆ ಹೇಳಲೇಬೇಕು. ಆಸ್ಕರ್ ವಿಜೇತ ಎ.ಆರ್. ರೆಹಮಾನ್ ಈ ಚಿತ್ರಕ್ಕೆ ಸಂಗೀತ ನೀಡಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾದ 'ರೈ ರೈ ರಾ ರಾ ರಾ' ಹಾಡು ಈಗಾಗಲೇ ಚಾರ್ಟ್ಬಸ್ಟರ್ ಆಗಿದೆ. ಈ ಹಾಡಿನಲ್ಲಿ ರಾಮ್ ಚರಣ್ ಅವರ ಸ್ಟೆಪ್ಸ್ಗೆ ಫ್ಯಾನ್ಸ್ ಫಿದಾ ಆಗಿದ್ದಾರೆ. ಮ್ಯೂಸಿಕ್ ವಿಷಯದಲ್ಲಿ ಈ ಸಿನಿಮಾ ಸಖತ್ ರಿಚ್ ಆಗಿದೆ.

'ಗೇಮ್ ಚೇಂಜರ್' ಬಳಿಕ ಚರಣ್ ಹವಾ...

ರಾಮ್ ಚರಣ್ ಅವರ ಹಿಂದಿನ ಸಿನಿಮಾ 'ಗೇಮ್ ಚೇಂಜರ್' ಮೇಲೆ ಬಹಳ ನಿರೀಕ್ಷೆ ಇತ್ತು. ಆದರೆ ಆ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಅಷ್ಟೇನು ಕಮಾಯಿಸಿಲ್ಲ. ವಿಮರ್ಶಕರಿಂದಲೂ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಹಾಗಾಗಿ ಚರಣ್ ಈ ಬಾರಿ 'ಪೆದ್ದಿ' ಮೂಲಕ ಭರ್ಜರಿ ಕಮ್ಬ್ಯಾಕ್ ಮಾಡಲು ರೆಡಿಯಾಗಿದ್ದಾರೆ. ಈ ಚಿತ್ರದ ಮೇಲೆ ಮೆಗಾ ಅಭಿಮಾನಿಗಳಿಗೆ ಭರವಸೆ ಹೆಚ್ಚಿದೆ.

ಮುಂದಿನ ಸಿನಿಮಾ ಸುಕುಮಾರ್ ಜೊತೆ..

'ಪೆದ್ದಿ' ಮುಗಿದ ನಂತರ ಚರಣ್ ಮತ್ತೊಮ್ಮೆ ಸುಕುಮಾರ್ ಜೊತೆ ಕೈಜೋಡಿಸಲಿದ್ದಾರೆ. 'ರಂಗಸ್ಥಳಂ' ಅಂತಹ ಮೈಲಿಗಲ್ಲು ಸಿನಿಮಾ ನೀಡಿದ ಈ ಜೋಡಿ 'RC17' ಗಾಗಿ ಒಂದಾಗುತ್ತಿರುವುದು ಅಭಿಮಾನಿಗಳಲ್ಲಿ ರೋಮಾಂಚನ ಉಂಟುಮಾಡಿದೆ. ಸದ್ಯಕ್ಕಂತೂ ಎಲ್ಲರ ಕಣ್ಣು ಮಾರ್ಚ್ 27 ರಂದು ಬಿಡುಗಡೆಯಾಗಲಿರುವ 'ಕುಸ್ತಿ' ಟೀಸರ್ ಮೇಲಿದೆ.