ವಿರೋಷ್ 'ರಾಯಲ್' ವೆಡ್ಡಿಂಗ್; ಅಂದು 'ಅರ್ಜುನ್ ರೆಡ್ಡಿ' ಕಂಡು ಬೆದರಿದ್ದ ಬೆಡಗಿ ಇಂದು 'ರೌಡಿ' ಪತ್ನಿ…

ದಕ್ಷಿಣ ಭಾರತದ ಮೋಸ್ಟ್ ಬ್ಯೂಟಿಫುಲ್ ಜೋಡಿ ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ಈಗ ದಂಪತಿಗಳು. ಉದಯಪುರದ ಅರಾವಳಿ ಬೆಟ್ಟಗಳ ನಡುವೆ ಈ ಜೋಡಿ ಹೊಸ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಇಷ್ಟು ದಿನ "ನಾವು ಬರೀ ಫ್ರೆಂಡ್ಸ್" ಎನ್ನುತ್ತಿದ್ದವರು ಈಗ ಸಪ್ತಪದಿ ತುಳಿದು ಒಂದಾಗಿದ್ದಾರೆ. ಈ ವಿವಾಹದ ಸುದ್ದಿ ಕೇಳಿ ಅಭಿಮಾನಿಗಳು ಸಖತ್ ಖುಷಿಯಾಗಿದ್ದಾರೆ.

ಸುಮಾರು ಒಂಬತ್ತು ವರ್ಷಗಳ ಹಿಂದೆ ಶುರುವಾದ ಈ ಪ್ರೇಮ ಕಥೆ ಈಗ ಸುಖಾಂತ್ಯ ಕಂಡಿದೆ. ಅಂದು ವಿಜಯ್ ದೇವರಕೊಂಡ ಅವರನ್ನು ಕಂಡರೆ ರಶ್ಮಿಕಾ ಅವರಿಗೆ ಎಲ್ಲಿಲ್ಲದ ಭಯವಿತ್ತು. ಆದರೆ ಆ ಭಯವೇ ಇಂದು ಸುಂದರವಾದ ಪ್ರೇಮವಾಗಿ ಬದಲಾಗಿ ಮದುವೆಯವರೆಗೆ ಬಂದಿದೆ.

ರಾಜಸ್ಥಾನದ ಅರಮನೆಯಲ್ಲಿ ನಡೆದ ಈ ಮದುವೆಗೆ ಸಿನಿರಂಗದ ಗಣ್ಯರು ಸಾಕ್ಷಿಯಾದರು. ಈ ಜೋಡಿ ತಮ್ಮ ಪ್ರೀತಿಯ ಹೆಸರನ್ನೇ ಅಂದರೆ 'ವಿರೋಷ್' ಎನ್ನುವ ಹೆಸರನ್ನೇ ಮದುವೆಗೆ ಬಳಸಿಕೊಂಡಿದ್ದಾರೆ. ಇವರ ಸುದೀರ್ಘ ಪ್ರೇಮ ಪಯಣದ ಹಾದಿ ನಿಜಕ್ಕೂ ಕುತೂಹಲಕಾರಿ.

ಆರಂಭದಲ್ಲಿ ವಿಜಯ್ ಅಂದ್ರೆ ರಶ್ಮಿಕಾಗೆ ಭಯ

'ಗೀತಾ ಗೋವಿಂದಂ' ಸಿನಿಮಾ ಶೂಟಿಂಗ್ ಶುರುವಾದಾಗ ವಿಜಯ್ ತುಂಬಾ ಸೀರಿಯಸ್ ಆಗಿ ಇರುತ್ತಿದ್ದರು. ಅಷ್ಟೊತ್ತಿಗಾಗಲೇ ಅವರು 'ಅರ್ಜುನ್ ರೆಡ್ಡಿ'ಯಾಗಿ ಇಡೀ ದೇಶವನ್ನೇ ಗೆದ್ದಿದ್ದರು. ಅವರ ಆಟಿಟ್ಯೂಡ್ ಕಂಡು ರಶ್ಮಿಕಾ ಆರಂಭದಲ್ಲಿ ಅವರ ಜೊತೆ ಮಾತನಾಡಲು ಹೆದರುತ್ತಿದ್ದರು. ವಿಜಯ್ ಅವರ ಗಾಂಭೀರ್ಯ ನೋಡಿ ರಶ್ಮಿಕಾ ಶೂಟಿಂಗ್ ಸೆಟ್‌ನಲ್ಲಿ ಅಂತರ ಕಾಯ್ದುಕೊಂಡಿದ್ದರಂತೆ. ಈ ವಿಚಾರವನ್ನು ಸಂದರ್ಶನವೊಂದರಲ್ಲಿ ಆಕೆ ಹೇಳಿಕೊಂಡಿದ್ದರು.

ಭಯದಿಂದ ಶುರುವಾಗಿ ಸ್ನೇಹದಲ್ಲಿ ಅರಳಿದ ಪ್ರೀತಿ...

ಶೂಟಿಂಗ್ ದಿನಗಳು ಕಳೆದಂತೆ ಇಬ್ಬರ ನಡುವೆ ಸ್ನೇಹ ಬೆಳೆಯಿತು. ನಂತರ ಬಂದ 'ಡಿಯರ್ ಕಾಮ್ರೇಡ್' ಸಿನಿಮಾ ಇವರನ್ನು ಮತ್ತಷ್ಟು ಹತ್ತಿರ ತಂದಿತು. ತೆರೆಯ ಮೇಲೆ ಇವರ ಕೆಮಿಸ್ಟ್ರಿ ನೋಡಿ ಅಭಿಮಾನಿಗಳು ಫಿದಾ ಆಗಿದ್ದರು. ಸಿನಿಮಾದಲ್ಲಿ ಮುತ್ತಿನ ದೃಶ್ಯ ಮಾಡುವಾಗ ರಶ್ಮಿಕಾ ಸಖತ್ ಆತಂಕ ಪಟ್ಟಿದ್ದರಂತೆ. ಆದರೆ ವಿಜಯ್ ಅವರ ಬೆಂಬಲದಿಂದ ಆ ದೃಶ್ಯಗಳು ಅದ್ಭುತವಾಗಿ ಮೂಡಿಬಂದವು ಎಂದಿದ್ದರು.

ರಶ್ಮಿಕಾ ಮನದ ನೋವಿಗೆ ಮದ್ದಾದ ವಿಜಯ್

ಕೊಡಗಿನ ರಶ್ಮಿಕಾ ಮಂದಣ್ಣ ವೈಯಕ್ತಿಕ ಜೀವನದಲ್ಲಿ ಹಲವು ಕಠಿಣ ದಿನಗಳನ್ನು ಎದುರಿಸಿದ್ದರು. ಟ್ರೋಲ್ ಮಾಡುವವರಿಂದ ಬೇಸತ್ತು ಹೋಗಿದ್ದ ರಶ್ಮಿಕಾಗೆ ವಿಜಯ್ ಧೈರ್ಯ ತುಂಬಿದರು. ಎಂಗೇಜ್ಮೆಂಟ್ ಮುರಿದು ಬಿದ್ದಾಗ ಕೂಡ ವಿಜಯ್ ಜೊತೆ ನಿಂತಿದ್ದರು ಎಂದು ಪರೋಕ್ಷವಾಗಿ ಹೇಳಿದ್ದರು. "ನನಗೆ ಬೇರೆ ದಾರಿಯೇ ಇಲ್ಲದ ಪರಿಸ್ಥಿತಿಯಲ್ಲಿ ವಿಜಯ್ ನನ್ನನ್ನು ಕಾಪಾಡಿದರು" ಎಂದು ರಶ್ಮಿಕಾ ಹೇಳಿಕೊಂಡಿದ್ದರು. ರಶ್ಮಿಕಾ ಅವರ ಮನಸ್ಸಿನ ಗಾಯಗಳನ್ನು ಗುಣಪಡಿಸಿದ 'ಆಸರೆ' ಆಗಿ ವಿಜಯ್ ಕಾಣಿಸಿಕೊಂಡರು.

ಕಿರುತೆರೆ ಕಾರ್ಯಕ್ರಮದಲ್ಲಿ ಗುಟ್ಟು ರಟ್ಟು

'ಅನಿಮಲ್' ಸಿನಿಮಾ ಪ್ರಚಾರದ ವೇಳೆ ರಶ್ಮಿಕಾ ಲೈವ್‌ನಲ್ಲಿ ವಿಜಯ್‌ಗೆ ಕಾಲ್ ಮಾಡಿದ್ದರು. ಆಗ ವಿಜಯ್ "ಏನಾಯ್ತು ರೀ?" ಎಂದು ಪ್ರೀತಿಯಿಂದ ಕೇಳಿದ್ದು ಎಲ್ಲೆಡೆ ವೈರಲ್ ಆಗಿತ್ತು. ರಶ್ಮಿಕಾ ಅವರ ಮುಖದಲ್ಲಿ ಅಂದು ಕಂಡ ನಾಚಿಕೆಯೇ ಇವರ ಪ್ರೀತಿಯನ್ನು ಸಾಬೀತು ಮಾಡಿತ್ತು. ಸದ್ದಿಲ್ಲದೆ ಬೇರೆ ಬೇರೆ ದೇಶಗಳಿಗೆ ಪ್ರವಾಸ ಹೋಗಿ ಬರುತ್ತಿದ್ದ ಈ ಜೋಡಿ ಈಗ ಅಧಿಕೃತವಾಗಿ ಒಂದಾಗಿದ್ದಾರೆ.

'ವಿರೋಷ್' ಜೋಡಿಗೆ ಶುಭಾಶಯಗಳ ಸುರಿಮಳೆ...

ಅಭಿಮಾನಿಗಳು ಪ್ರೀತಿಯಿಂದ ಇವರಿಬ್ಬರಿಗೂ 'ವಿರೋಷ್' ಎಂದು ಹೆಸರಿಟ್ಟಿದ್ದರು. ಅದೇ ಹೆಸರನ್ನು ಇವರು ತಮ್ಮ ಮದುವೆಯ ಲೇಬಲ್ ಆಗಿ ಬಳಸಿಕೊಂಡಿದ್ದಾರೆ. ಇಷ್ಟು ವರ್ಷಗಳ ಕಾಯುವಿಕೆ ಈಗ ಸಾರ್ಥಕವಾಗಿದೆ. ಅಭಿಮಾನಿಗಳು, ಆಪ್ತರು ಜೋಡಿಗೆ ಶುಭ ಹಾರೈಸುತ್ತಿದ್ದಾರೆ.