ಕದ್ದು ಮುಚ್ಚಿ ಚಿತ್ರಮಂದಿರಕ್ಕೆ ಬಂದು ಸಿನಿಮಾ ನೋಡಿದ ಸಾಯಿ ಪಲ್ಲವಿ: ಯಾವ ಸಿನಿಮಾ?

ಕದ್ದು ಮುಚ್ಚಿ ಚಿತ್ರಮಂದಿರಕ್ಕೆ ಬಂದ ಸಾಯಿ ಪಲ್ಲವಿ

ಸಾಯಿ ಪಲ್ಲವಿ ಇತ್ತೀಚೆಗೆ ಹೈದರಾಬಾದ್‌ನ ಆರ್‌ಕೆ ಕಾಂಪ್ಲೆಕ್ಸ್‌ನ ಪಿವಿಆರ್‌ ಗೆ ಭೇಟಿ ನೀಡಿ ಸಿನಿಮಾ ನೋಡಿದ್ದಾರೆ. ತಲೆಗೆ ಸ್ಕಾರ್ಫ್ ಸುತ್ತಿಕೊಂಡು, ಮಾಸ್ಕ್ ಧರಿಸಿ, ಸರಳವಾದ ಟಿ-ಶರ್ಟ್ ಹಾಗೂ ನೈಟ್ ಪ್ಯಾಂಟ್ ರೀತಿ ಕಾಣುವ ದೊಗಳೆ ಪ್ಯಾಂಟ್ ಧರಿಸಿ, ಯಾವುದೇ ಆಭರಣಗಳು ಇಲ್ಲದೆ, ಬ್ಯಾಗು ಹಾಗೂ ವಾಟರ್ ಬಾಟೆಲ್ ಹಾಗೂ ಶಾಲೊಂದನ್ನು ಹಿಡಿದುಕೊಂಡು ಸರಳವಾಗಿ ಚಿತ್ರಮಂದಿರಕ್ಕೆ ಬಂದಿದ್ದರು ಸಾಯಿ ಪಲ್ಲವಿ. ಚಿತ್ರಮಂದಿರದಿಂದ ಹೊರಕ್ಕೆ ಸಾಯಿ ಪಲ್ಲವಿ ನಡೆದುಕೊಂಡು ಬರುತ್ತಿರುವ ವಿಡಿಯೋ ಇದೀಗ ವೈರಲ್ ಆಗಿದೆ.

ಯಾವ ಸಿನಿಮಾ ನೋಡಿದರು ಸಾಯಿ ಪಲ್ಲವಿ?

ಸಾಯಿ ಪಲ್ಲವಿ, ಮಹೇಶ್ ಬಾಬು ನಟನೆಯ 'ಸರ್ಕಾರು ವಾರಿ ಪಾಟ' ಸಿನಿಮಾ ನೋಡಲು ಚಿತ್ರಮಂದಿರಕ್ಕೆ ಬಂದಿದ್ದರು ಎನ್ನಲಾಗುತ್ತಿದೆ. ಆದರೆ ಸಾಯಿ ಪಲ್ಲವಿ ಯಾವ ಸಿನಿಮಾವನ್ನು ನೋಡಿ ಹೊರಬಂದರು ಎಂಬ ಬಗ್ಗೆ ಖಾತ್ರಿಯಾಗಿಲ್ಲ. ಹೈದರಾಬಾದ್‌ನ ಆರ್‌ಕೆ ಕಾಂಪ್ಲೆಕ್ಸ್‌ನ ಪಿವಿಆರ್‌ನಲ್ಲಿ 'ಸರ್ಕಾರು ವಾರಿ ಪಾಟ' ಸಿನಿಮಾದ ಜೊತೆಗೆ ತಮಿಳಿನ 'ಡಾನ್', ಇಂಗ್ಲೀಷ್‌ನ 'ಡಾಕ್ಟರ್ ಸ್ಟ್ರೇಂಜ್', ಹಿಂದಿಯ 'ಜಯೇಶ್‌ಭಾಯ್ ಜೋರ್ದಾರ್' ಸಿನಿಮಾಗಳು ಪ್ರದರ್ಶನ ಕಾಣುತ್ತಿರುವ ಇಷ್ಟು ಸಿನಿಮಾಗಳಲ್ಲಿ ಯಾವ ಸಿನಿಮಾವನ್ನು ಸಾಯಿ ಪಲ್ಲವಿ ನೋಡಿದರು ಎಂಬ ಬಗ್ಗೆ ಖಾತ್ರಿ ಇಲ್ಲ.

ಈ ಮೊದಲೂ ಬುರ್ಖಾ ತೊಟ್ಟು ಸಿನಿಮಾ ನೋಡಿದ್ದರು

ಸಾಯಿ ಪಲ್ಲವಿ ಹೀಗೆ ಕದ್ದು ಮುಚ್ಚಿ ಸಿನಿಮಾ ನೋಡುತ್ತಿರುವುದು ಇದು ಮೊದಲೇನೂ ಅಲ್ಲ. ಈ ಹಿಂದೆ ತಮ್ಮದೇ ಸಿನಿಮಾ 'ಶ್ಯಾಮ ಸಿಂಘ ರಾಯ್' ಅನ್ನು ಹೈದರಾಬಾದ್‌ನ ಸಿಂಗಲ್ ಸ್ಕ್ರೀನ್ ಚಿತ್ರಮಂದಿರದಲ್ಲಿ ಅಭಿಮಾನಿಗಳೊಟ್ಟಿಗೆ ಕೂತು ವೀಕ್ಷಿಸಿದ್ದರು. ಆದರೆ ಆಗಲೂ ಸಹ ಯಾರೂ ಸಾಯಿ ಪಲ್ಲವಿಯನ್ನು ಗುರುತು ಹಿಡಿದಿರಲಿಲ್ಲ. ಸಾಯಿ ಪಲ್ಲವಿ, ಬುರ್ಖಾ ತೊಟ್ಟುಕೊಂಡು ಹೋಗಿ ಜನರೊಟ್ಟಿಗೆ ಕೂತು ಸಿನಿಮಾ ನೋಡಿದ್ದರು. ಸಿನಿಮಾದಲ್ಲಿ ತಮ್ಮ ಎಂಟ್ರಿ ಸೀನ್, ಡ್ಯಾನ್ಸ್ ದೃಶ್ಯಗಳು ಬಂದಾಗ ಜನ ಶಿಳ್ಳೆ ಹಾಕುವುದು ನೋಡಿ ಖುಷಿ ಪಟ್ಟಿದ್ದರು ಸಾಯಿ ಪಲ್ಲವಿ.

ಸಾಯಿ ಪಲ್ಲವಿಯ ಮುಂಬರುವ ಸಿನಿಮಾಗಳು

ಸಾಯಿ ಪಲ್ಲವಿ ಪ್ರಸ್ತುತ ಸಖತ್ ಬ್ಯುಸಿ ನಟಿ. ಸಾಯಿ ಪಲ್ಲವಿ ನಟನೆಯ 'ವಿರಾಟ ಪರ್ವಂ' ಸಿನಿಮಾ ಬಿಡುಗಡೆಗೆ ತಯಾರಾಗಿದ್ದು, ಜುಲೈ 1 ರಂದು ತೆರೆಗೆ ಬರಲಿದೆ. ನಟ ಶಿವಕಾರ್ತಿಕೇಯನ್ ಜೊತೆಗೆ ಹೊಸ ಸಿನಿಮಾವೊಂದಕ್ಕೆ ಸಾಯಿ ಪಲ್ಲವಿ ಸಹಿ ಹಾಕಿದ್ದಾರೆ ಆ ಸಿನಿಮಾವನ್ನು ಕಮಲ್ ಹಾಸನ್ ನಿರ್ಮಾಣ ಮಾಡುತ್ತಿದ್ದಾರೆ. ಕತೆಯೂ ಅವರದ್ದೇ. ಜೊತೆಗೆ 'ಗಾರ್ಗಿ' ಹೆಸರಿನ ಪ್ಯಾನ್ ಇಂಡಿಯಾ ಸಿನಿಮಾದಲ್ಲಿಯೂ ಸಾಯಿ ಪಲ್ಲವಿ ನಟಿಸಿದ್ದಾರೆ. ಈ ಸಿನಿಮಾ ಸಹ ಶೀಘ್ರದಲ್ಲಿಯೇ ಬಿಡುಗಡೆ ಆಗಲಿದೆ.