ಬಾಕ್ಸಾಫೀಸ್‌ನಲ್ಲಿ 'ಸಲಾರ್' ಸುನಾಮಿ ತಡೆಯುವವರೇ ಇಲ್ಲ!: ಎರಡು ದಿನಕ್ಕೆ ಸಿನಿಮಾ ಬಾಚಿದ್ದು ಎಷ್ಟು ಕೋಟಿ ರೂ. ಗೊತ್ತಾ?

ಸಲಾರ್ ಭಾಗ 1 - ಕದನ ವಿರಾಮ ವಿಶ್ವಾದ್ಯಂತ ಡಿಸೆಂಬರ್ 22ರ ಶುಕ್ರವಾರ ಬಿಡುಗಡೆಯಾಗಿ ಭರ್ಜರಿ ಓಪನಿಂಗ್ ಪಡೆದಿದೆ. ಪ್ರಶಾಂತ್ ನೀಲ್ ನಿರ್ದೇಶನದ ಈ ಚಲನಚಿತ್ರವು ತೆಲುಗು, ಕನ್ನಡ, ತಮಿಳು, ಮಲಯಾಳಂ ಮತ್ತು ಹಿಂದಿಯಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದೆ. ಚಿತ್ರತಂಡ ಸಿನಿಮಾ ಗಳಿಸಿರುವ ಗಲ್ಲಾ ಪೆಟ್ಟಿಗೆ ಮಾಹಿತಿಯನ್ನು ಹಂಚಿಕೊಂಡಿದೆ.

ಸಿನಿಮಾಕ್ಕೆ ಸಿನಿ ಪ್ರೇಮಿಗಳಿಂದ ಉತ್ತಮ ಪ್ರತಿಕ್ರಿಯೆ ಬರುತ್ತಿದ್ದು, ಎಲ್ಲಾ ಭಾಷೆಗಳಲ್ಲೂ ಗಲ್ಲಾ ಪೆಟ್ಟಿಗೆಯಲ್ಲಿ ಸದ್ದು ಮಾಡುತ್ತಿದೆ. ಸಲಾರ್ ಸಿನಿಮಾದ ಗಳಿಕೆಯ ಮೇಲೆ ಪ್ರೇಕ್ಷಕರು ಕಣ್ಣು ನೆಟ್ಟಿದ್ದಾರೆ. ಭಾನುವಾರ ಟ್ವಿಟರ್ ಖಾತೆಯಲ್ಲಿ ಹೊಂಬಾಳೆ ಫಿಲ್ಮಂ ಮತ್ತು ಸಲಾರ್‌ನ ಅಧಿಕೃತ ಹ್ಯಾಂಡಲ್ ಬಾಕ್ಸ್ ಆಫೀಸ್ ಮಾಹಿತಿ ಹಂಚಿಕೊಂಡಿದೆ.

ವಿಶ್ವಾದ್ಯಂತ 'ಸಲಾರ್' ಗಳಿಕೆ ತಡೆಯುವವರೆ ಇಲ್ಲ!

ಸಿನಿಮಾ ಬಾಕ್ಸ್ ಆಫೀಸ್ ಮಾಹಿತಿ ಹಂಚಿಕೊಂಡಿರುವ ಪೋಸ್ಟ್‌ನಲ್ಲಿ ಪ್ರಭಾಸ್ ಅವರನ್ನು ಒಳಗೊಂಡ ಪೋಸ್ಟರ್ ಅನ್ನು ಹಂಚಿಕೊಂಡಿದೆ. ಅದರಲ್ಲಿ "ರೆಕಾರ್ಡ್ ಬ್ರೇಕಿಂಗ್ ಬ್ಲಾಕ್ಬಸ್ಟರ್. 2 ದಿನಗಳಲ್ಲಿ ವಿಶ್ವಾದ್ಯಂತ 295.7 ಕೋಟಿ"ಎಂದು ಬರೆಯಲಾಗಿದೆ. ಶೀರ್ಷಿಕೆಯಲ್ಲಿ, "ಬೇಟೆ ಪ್ರಾರಂಭವಾಗಿದೆ. ಸಲಾರ್ ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಪ್ರಾಬಲ್ಯ ಸಾಧಿಸಿದೆ. 2 ದಿನಗಳಲ್ಲಿ ವಿಶ್ವಾದ್ಯಂತ 295.7 ಕೋಟಿ ರೂಪಾಯಿಗಳನ್ನು ದಾಟಿದೆ!" ಎಂದು ಹೇಳಿದೆ.

ಸಲಾರ್ ಸಿನಿಮಾವನ್ನು ಡಿಸೆಂಬರ್ 2020 ರಲ್ಲಿ ಘೋಷಿಸಲಾಯಿತು, ನಂತರ 2021 ರ ಜನವರಿಯಲ್ಲಿ ತೆಲಂಗಾಣದ ಗೋದಾವರಿಖಾನಿ ಸುತ್ತಮುತ್ತಲ ಪ್ರದೇಶಗಳಲ್ಲಿ ಶೂಟಿಂಗ್ ಪ್ರಾರಂಭಿಸಲಾಯಿತು. ರವಿ ಬಸ್ರೂರು ಚಿತ್ರಕ್ಕೆ ಸಂಗೀತ ನೀಡಿದ್ದು, ಭುವನ್ ಗೌಡ ಛಾಯಾಗ್ರಹಣ ಮಾಡಿದ್ದಾರೆ. 'ಸಲಾರ್' ಕಥೆ ಕಾಲ್ಪನಿಕ ನಗರ ಖಾನ್‌ಸಾರ್‌ದಿಂದ ಪ್ರಾರಂಭವಾಗುತ್ತದೆ.

ಇಬ್ಬರು ಸ್ನೇಹಿತರ ಸುತ್ತ ಸುತ್ತುತ್ತದೆ. ದೇವಾ ಮತ್ತು ವರದ ಪಾತ್ರಗಳಲ್ಲಿ ಪ್ರಭಾಸ್ ಮತ್ತು ಪೃಥ್ವಿರಾಜ್ ಸುಕುಮಾರನ್ ನಟಿಸಿದ್ದಾರೆ. ಸಲಾರ್ ಚಿತ್ರದಲ್ಲಿ ಶ್ರುತಿ ಹಾಸನ್, ಈಶ್ವರಿ ರಾವ್, ಜಗಪತಿ ಬಾಬು ಮತ್ತು ಶ್ರೀಯಾ ರೆಡ್ಡಿ ಕೂಡ ನಟಿಸಿದ್ದಾರೆ.