ಸಮಂತಾ 'ಯಶೋದಾ' ಚಿತ್ರದ ಫಸ್ಟ್ ಡೇ ಕಲೆಕ್ಷನ್ ಬಹಿರಂಗ; ಮಾಜಿ ಪತಿ ಚಿತ್ರಕ್ಕಿಂತಲೂ ಹೆಚ್ಚು!

ಯಶೋಧಾ ಮೊದಲ ದಿನ ಗಳಿಸಿದ್ದೆಷ್ಟು?

ಸಮಂತಾ ರುತ್ ಪ್ರಭು ಅಭಿನಯದ ಯಶೋಧಾ ಮೊದಲನೇ ದಿನ ವಿಶ್ವಾದ್ಯಂತ 3.20 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿದೆ ಎಂದು ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ತಿಳಿಸಿದ್ದಾರೆ. ಬಿಡುಗಡೆಯ ದಿನ ಬೆಳಿಗ್ಗೆ ಪ್ರದರ್ಶನಗಳಲ್ಲಿ 19.9%, ಮಧ್ಯಾಹ್ನ 24%, ಸಂಜೆ 29.94% ಹಾಗೂ ರಾತ್ರಿ 45.72% ಬುಕ್ಕಿಂಗ್ ಪಡೆದುಕೊಂಡಿದ್ದ ಯಶೋದಾ ಒಟ್ಟಾರೆಯಾಗಿ ಮೊದಲ ದಿನ 29.98% ಬುಕ್ಕಿಂಗ್ ಪಡೆದಿತ್ತು.

ಮಾಜಿ ಪತಿಯ ಅಂತಿಮ ಚಿತ್ರಕ್ಕಿಂತಲೂ ಹೆಚ್ಚು ಕಲೆಕ್ಷನ್!

ಇನ್ನು ಈ ವರ್ಷ ಸಮಂತಾ ರುತ್ ಪ್ರಭು ಮಾಜಿ ಪತಿ ನಾಗಚೈತನ್ಯ ಅಭಿನಯದ ಥ್ಯಾಂಕ್ ಯೂ ತೆಲುಗು ಚಿತ್ರ ತೆರೆಕಂಡಿತ್ತು. ಪ್ರೇಕ್ಷಕರ ಮನಗೆಲ್ಲುವಲ್ಲಿ ಹಾಗೂ ಗಲ್ಲಾಪೆಟ್ಟಿಗೆ ಎರಡರಲ್ಲಿಯೂ ಮಕಾಡೆ ಮಲಗಿದ ಥ್ಯಾಂಕ್ ಯು ಚಿತ್ರ ಮೊದಲನೇ ದಿನ 2.30 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿತ್ತು. ಈ ಮೂಲಕ ಯಶೋದಾ ಚಿತ್ರ ಥ್ಯಾಂಕ್ ಯೂ ಚಿತ್ರದ ಮೊದಲ ದಿನದ ಕಲೆಕ್ಷನ್ ಉಡೀಸ್ ಮಾಡಿದ್ದು, ಇದು ಸದ್ಯದ ವೈರಲ್ ಸುದ್ದಿಯಾಗಿದೆ. ಎರಡೂ ಚಿತ್ರಗಳ ಮೊದಲನೇ ದಿನದ ಕಲೆಕ್ಷನ್ ಸಂಖ್ಯೆಯನ್ನು ಹೋಲಿಕೆ ಮಾಡಿ ನೆಟ್ಟಿಗರು ನಾಗಚೈತನ್ಯ ಹಾಗೂ ಕುಟುಂಬದವರನ್ನು ಟ್ರೋಲ್ ಮಾಡುತ್ತಿದ್ದಾರೆ.

ಎರಡನೇ ದಿನ ಕಲೆಕ್ಷನ್ ಹೆಚ್ಚುವ ಸಾಧ್ಯತೆ

ಮೊದಲ ದಿನ 3.20 ಕೋಟಿ ಗ್ರಾಸ್ ಕಲೆಕ್ಷನ್ ಮಾಡಿರುವ ಸಮಂತಾ ರುತ್ ಪ್ರಭು ಅಭಿನಯದ ಯಶೋದಾ ಚಿತ್ರ ಎರಡನೇ ದಿನದ ಅಡ್ವಾನ್ಸ್ ಬುಕ್ಕಿಂಗ್ ಮೂಲಕವೇ 1.41 ಕೋಟಿ ಗಳಿಕೆ ಮಾಡಿದ್ದು, ಮೊದಲ ದಿನಕ್ಕಿಂತ ಎರಡನೇ ದಿನ ಹೆಚ್ಚು ಕಲೆಕ್ಷನ್ ಮಾಡುವ ನಿರೀಕ್ಷೆ ಇದೆ. ಅಷ್ಟೇ ಅಲ್ಲದೆ ಚಿತ್ರದ ಕಂಟೆಂಟ್ ಕುರಿತು ಸಿನಿಪ್ರೇಕ್ಷಕರು ಚರ್ಚಿಸುತ್ತಿರುವ ಕಾರಣ ಮೂರನೇ ದಿನವಾದ ಭಾನುವಾರ ಚಿತ್ರ ಮತ್ತಷ್ಟು ದೊಡ್ಡ ಕಲೆಕ್ಷನ್ ಮಾಡುವ ಸಾಧ್ಯತೆಗಳು ಹೆಚ್ಚಿವೆ.