ಆಗಸ್ಟ್ 1 ರಿಂದ ತೆಲುಗು ಸಿನಿಮಾಗಳ ಶೂಟಿಂಗ್ ಸ್ಥಗಿತ

ನಿರ್ಮಾಪಕರಿಗೆ ಸಂಕಷ್ಟ

''ಕೋವಿಡ್ ನಂತರ ಬದಲಾದ ಸನ್ನಿವೇಶದಲ್ಲಿ ನಿರ್ಮಾಪಕರಿಗೆ ಅನುಕೂಲಕರವಲ್ಲದ ವಾತಾವರಣ ಸೃಷ್ಟಿಯಾಗಿದೆ. ಸಿನಿಮಾದ ಬಜೆಟ್‌ಗಳು ಏರಿಕೆಯಾಗಿವೆ, ಬರುತ್ತಿರುವ ಆದಾಯ ತೀವ್ರವಾಗಿ ಕುಸಿದಿದೆ. ಸಿನಿಮಾರಂಗದ ಭಾಗವಾಗಿ ನಾವು ನಿರ್ಮಾಪಕರು ಈ ವಿಷಯವಾಗಿ ಚರ್ಚೆ ಮಾಡುವ, ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ತುರ್ತು ಅಗತ್ಯ ಈಗಿದೆ. ನಾವುಗಳು ಸಿನಿಮಾ ನಿರ್ಮಾಣಕ್ಕೆ ಇನ್ನಷ್ಟು ಆರೋಗ್ಯಕರ ವಾತಾವರಣ ಸೃಷ್ಟಿಸಿಕೊಳ್ಳಬೇಕಿದೆ. ಆರೋಗ್ಯವಂತ ಸ್ಪರ್ಧೆಯ ನಡುವೆ ಸಿನಿಮಾಗಳ ಬಿಡುಗಡೆ ಮಾಡಬೇಕಿದೆ'' ಎಂದು ಪ್ರಕಟಣೆಯಲ್ಲಿ ನಿರ್ಮಾಪಕ ಸಂಘ ತಿಳಿಸಿದೆ.

ಅನಿರ್ದಿಷ್ಟಾವದಿ ಕಾಲ ಚಿತ್ರೀಕರಣ ಬಂದ್

ಸಿನಿಮಾಗಳ ಚಿತ್ರೀಕರಣವನ್ನು ಸ್ಥಗಿತಗೊಳಿಸುವಂತೆ ಪ್ರಕಟಣೆಯನ್ನು ನಿರ್ಮಾಪಕರ ಸಂಘ ಹೊರಡಿಸಿದೆ ಆದರೆ ಎಂದಿನ ವರೆಗೆ ಈ ಬಂದ್ ಮುಂದುವರೆಯಲಿದೆ ಎಂಬುದನ್ನು ಹೇಳಿಲ್ಲ. ಈಗಿರುವ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವವರೆಗೆ ಚಿತ್ರೀಕರಣ ಬಂದ್ ಮುಂದುವರೆಯಲಿದೆ ಎಂದಿದೆ. ಈಗಾಗಲೇ ಚಿತ್ರೀಕರಣ ನಡೆಸುತ್ತಿರುವ ಸಿನಿಮಾಗಳು ಚಿತ್ರೀಕರಣ ಮುಂದುವರೆಸಬಹುದು ಎನ್ನಲಾಗಿತ್ತು, ಆದರೆ ಅದಕ್ಕೂ ಅವಕಾಶ ನೀಡಿಲ್ಲ ನಿರ್ಮಾಪಕರ ಸಂಘ.

ಸ್ಟಾರ್ ನಟ ಸಂಭಾವನೆ ಇಳಿಕೆಗೆ ಒತ್ತಾಯ

ಟಿಕೆಟ್‌ ದರಗಳನ್ನು ಸರ್ಕಾರ ತೀವ್ರವಾಗಿ ಇಳಿಸಿರುವುದು, ಮನೊರಂಜನಾ ತೆರಿಗೆ ಏರಿಕೆ ಮತ್ತು ಸ್ಟಾರ್ ನಟರ ಭಾರಿ ದುಬಾರಿ ಸಂಭಾವನೆಯಿಂದಾಗಿ ನಿರ್ಮಾಪಕರಿಗೆ ನಷ್ಟವಾಗುತ್ತಿದೆ. ಒಂದೊಮ್ಮೆ ಸಿನಿಮಾ ಹಿಟ್ ಆದರೂ ಸಹ ಬರುವ ಆದಾಯ ಬಹಳ ಕಡಿಮೆಯಾಗಿದೆ ಎಂಬುದು ನಿರ್ಮಾಪಕ ಆಂಭೋಣವಾಗಿದೆ. ಸರ್ಕಾರದ ವಿರುದ್ಧ ಈಗಾಗಲೇ ನ್ಯಾಯಾಲಯದಲ್ಲಿ ಹೋರಾಟಕ್ಕೆ ನಿಂತಿರುವ ನಿರ್ಮಾಪಕರು, ಇದೀಗ ಸ್ಟಾರ್ ನಟರು ಸಂಭಾವನೆ ಇಳಿಸಿಕೊಳ್ಳುವಂತೆ ಒತ್ತಡ ಹೇರುತ್ತಿದ್ದಾರೆ. ಅದರ ಭಾಗವಾಗಿಯೇ ಈಗ ಚಿತ್ರೀಕರಣಗಳನ್ನು ಬಂದ್ ಮಾಡಲಾಗಿದೆ.

ಸ್ಟಾರ್ ನಟರ ಸಿನಿಮಾಗಳ ಚಿತ್ರೀಕರಣ ಬಂದ್

ಅಲ್ಲು ಅರ್ಜುನ್ ನಟಿಸುತ್ತಿರುವ 'ಪುಷ್ಪ 2', ಪ್ರಭಾಸ್ ನಟಿಸುತ್ತಿರುವ ಇನ್ನೂ ಹೆಸರಿಡದ ಸಿನಿಮಾ, ಚಿರಂಜೀವಿ ನಟನೆಯ 'ಭೋಲಾ ಶಂಕರ್', ಜೂ ಎನ್‌ಟಿಆರ್ ನಟಿಸುತ್ತಿರುವ ಕೊರಟಾಲ ಶಿವ ನಿರ್ದೇಶನದ ಸಿನಿಮಾ, ಪ್ರಭಾಸ್ ನಟನೆಯ 'ಸಲಾರ್' ಇನ್ನೂ ಹಲವಾರು ಸಿನಿಮಾಗಳು ಪ್ರಸ್ತುತ ಚಿತ್ರೀಕರಣ ನಡೆಸುತ್ತಿದ್ದವು, ಆ ಎಲ್ಲ ಚಿತ್ರೀಕರಣಗಳು ಇದೀಗ ಬಂದ್ ಆಗಲಿವೆ. ಬೇರೆ ರಾಜ್ಯಗಳಿಂದಲೂ ನಟರು, ತಂತ್ರಜ್ಞರನ್ನು ಕರೆತಂದು ಚಿತ್ರೀಕರಣ ಮಾಡಲಾಗುತ್ತಿತ್ತು, ದೊಡ್ಡ ದೊಡ್ಡ ಸೆಟ್‌ಗಳ ನಿರ್ಮಾಣ ಆಗಿತ್ತು, ಈಗ ನಿರ್ಮಾಪಕರ ಈ ನಿರ್ಣಯದಿಂದ ಭಾರಿ ಮೊತ್ತ ನಷ್ಟವಾಗುವ ಜೊತೆಗೆ ಸ್ಟಾರ್ ನಟ-ನಟಿಯರ ಸಮಯವೂ ವ್ಯರ್ಥವಾಗಲಿದೆ.