ದರ್ಶನ್ ಜತೆ ಇದೇ ವರ್ಷ ಸಿನಿಮಾ ಎಂದ ತೆಲುಗು ನಿರ್ಮಾಪಕ; ಈ ಹಿಂದೆ ಪುನೀತ್‌ ಜತೆ ಸೆಂಚುರಿ ಬಾರಿಸಿದ್ರು!

ದರ್ಶನ್‌ಗೆ ಬಂಡವಾಳ ಹೂಡಲು ಅನಿಲ್ ಸುಂಕರ ಸಿದ್ಧ, ಇದೇ ವರ್ಷ ಸಿನಿಮಾ

ಚಾಲೆಂಜಿಂಗ್ ಸ್ಟಾರ್‌ಗೆ ಬಂಡವಾಳ ಹೂಡಲು ಸಿದ್ಧರಾಗಿರುವುದು ತೆಲುಗಿನ ಖ್ಯಾತ ನಿರ್ಮಾಪಕ ಅನಿಲ್ ಸುಂಕರ. ಇವರು ಆಹಾ ನಾ ಪೆಲ್ಲಂಟ, ಮಹೇಶ್ ಬಾಬು ಸಿನಿಮಾಗಳಾದ ದೂಕುಡು, ಆಗಡು, ನೇನೊಕ್ಕಡಿನೆ, ಸರಿಲೇರು ನೀಕೆವ್ವರು, ನಾನಿ ನಟನೆಯ ಕೃಷ್ಣ ಗಾಡಿ ವೀರ ಪ್ರೇಮ ಗಾಥ ಚಿತ್ರಗಳು ಸೇರಿದಂತೆ ಸುಮಾರು ಮೂವತ್ತಕ್ಕೂ ಹೆಚ್ಚಿನ ತೆಲುಗು ಸಿನಿಮಾಗಳಿಗೆ ಬಂಡವಾಳ ಹೂಡಿದ್ದಾರೆ. ಸದ್ಯ ಎಕೆ ಎಂಟರ್‌ಟೈನ್‌ಮೆಂಟ್ಸ್ ಬ್ಯಾನರ್‌ನ ನಿರ್ಮಾಪಕನಾಗಿರುವ ಅನಿಲ್ ಸುಂಕರ ಇದೇ ಬ್ಯಾನರ್ ಅಡಿಯಲ್ಲಿ ದರ್ಶನ್ ಸಿನಿಮಾ ನಿರ್ಮಿಸುವುದಾಗಿ ಘೋಷಿಸಿದ್ದಾರೆ. ಈ ಕುರಿತಾಗಿ ಟ್ವೀಟ್ ಮಾಡಿರುವ ಅವರು ಇದೇ ವರ್ಷ ಸಿನಿಮಾ ಎಂದೂ ಸಹ ಬರೆದುಕೊಂಡಿದ್ದಾರೆ. ಸದ್ಯ ಮೆಗಾಸ್ಟಾರ್ ಚಿರಂಜೀವಿ ನಟನೆಯ ಭೋಲಾ ಶಂಕರ್ ಹಾಗೂ ಅಖಿಲ್ ಅಕ್ಕಿನೇನಿ ನಟನೆಯ ಏಜೆಂಟ್ ಚಿತ್ರಗಳನ್ನು ಇವರು ನಿರ್ಮಿಸುತ್ತಿದ್ದಾರೆ.

ಈ ಹಿಂದೆ ಪುನೀತ್ ಜತೆ ಸಿನಿಮಾ

ಇನ್ನು ಅನಿಲ್ ಸುಂಕರ ನಿರ್ಮಿಸಲಿರುವ ಎರಡನೇ ಕನ್ನಡ ಸಿನಿಮಾ ಇದಾಗಲಿದ್ದು, ಈ ಹಿಂದೆ 2014ರಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಟನೆಯ ಪವರ್ ಸಿನಿಮಾಗೆ ಇವರು ಬಂಡವಾಳ ಹೂಡಿದ್ರು. ಪವರ್ ಸಿನಿಮಾಗೆ ತೆಲುಗಿನ ಖ್ಯಾತ 14 ರೀಲ್ಸ್ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ಬಂಡವಾಳ ಹೂಡಿದ್ದ ಮೂವರು ನಿರ್ಮಾಪಕರಲ್ಲಿ ಅನಿಲ್ ಸುಂಕರ ಸಹ ಓರ್ವರಾಗಿದ್ದರು. ಆಗಿನ ಕಾಲಕ್ಕೆ ಪವರ್ 22 ಕೋಟಿ ಗಳಿಕೆ ಮಾಡಿತ್ತು. ಮೊದಲ ವಾರದ ಕಲೆಕ್ಷನ್‌ನಲ್ಲಿ ಎಲ್ಲಾ ಚಿತ್ರಗಳ ದಾಖಲೆಯನ್ನು ಹಿಂದಿಕ್ಕಿದ್ದ ಪವರ್ ಶತದಿನೋತ್ಸವವನ್ನೂ ಸಹ ಆಚರಿಸಿಕೊಂಡಿತ್ತು. ಪುನೀತ್‌ ರಾಜ್‌ಕುಮಾರ್ ಈ ಸಿನಿಮಾ ಮೂಲಕ ಕಮ್‌ಬ್ಯಾಕ್ ಮಾಡಿದ್ದರು. ಇದು ತೆಲುಗಿನ ಮಹೇಶ್ ಬಾಬು ನಟನೆಯ ದೂಕುಡು ಸಿನಿಮಾದ ರಿಮೇಕ್ ಆಗಿತ್ತು.

ದರ್ಶನ್ ಜತೆ ಮತ್ತೊಂದು ತೆಲುಗು ಬ್ಯಾನರ್ ಸಿನಿಮಾ?

ಅನಿಲ್ ಸುಂಕರ ಮಾತ್ರವಲ್ಲದೇ ತೆಲುಗಿನ ಮತ್ತೋರ್ವ ನಿರ್ಮಾಪಕರೂ ಸಹ ದರ್ಶನ್ ಸಿನಿಮಾಗೆ ಬಂಡವಾಳ ಹೂಡುವ ಸಾಧ್ಯತೆ ಇದೆ. ಶ್ರೀ ವೆಂಕಟೇಶ್ವರ ಸಿನಿ ಚಿತ್ರ ಎಂಬ ಪ್ರಸಿದ್ಧ ಬ್ಯಾನರ್ ದರ್ಶನ್ ಹುಟ್ಟುಹಬ್ಬಕ್ಕೆ ಶುಭ ಕೋರಿದ್ದು, ಸಿನಿಮಾ ಮಾಡುವ ಮುನ್ಸೂಚನೆ ನೀಡಿದೆ. ತಮ್ಮ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಟ್ವೀಟ್ ಮಾಡಿರುವ ಈ ಪ್ರೊಡಕ್ಷನ್ ಹೌಸ್ ನಮ್ಮ ಪ್ರೀತಿಯ ಹೀರೊ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರಿಗೆ ಹುಟ್ಟುಹಬ್ಬದ ಶುಭಾಶಯಗಳು ಎಂದು ಬರೆದುಕೊಂಡಿದೆ.