ನಿಶ್ಚಿತಾರ್ಥದ ಬಳಿಕ ಮೆಗಾ ಪ್ರಿನ್ಸ್ ಹೊಸ ಸಿನಿಮಾ ಲಾಂಚ್: ವರುಣ್ ತೇಜ್ 14ನೇ ಸಿನಿಮಾಗೆ ಟೈಟಲ್ ಫಿಕ್ಸ್!

ಮೆಗಾ ಕುಟುಂಬದ ಹೀರೊ ವರುಣ್ ತೇಜ್ ಹೊಸ ಸಿನಿಮಾ ಗ್ರ್ಯಾಂಡ್ ಆಗಿ ಲಾಂಚ್ ಆಗಿದೆ. ಇತ್ತೀಚೆಗಷ್ಟೇ ವರುಣ್ ತೇಜ್ ನಟಿ ಲಾವಣ್ಯ ತ್ರಿಪಾಠಿ ಜೊತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಆ ಬಳಿಕ ಸೆಟ್ಟೇರಿದ ಸಿನಿಮಾವಿದು. ಹಾಗಾಗಿ ಈ ಸಿನಿಮಾ ವರುಣ್ ತೇಜ್‌ಗೆ ತುಂಬಾನೇ ಸ್ಪೆಷಲ್.

ಅಂದ್ಹಾಗೆ, ನಟ ವರುಣ್ ತೇಜ್‌ಗೆ ಇದು 14ನೇ ಸಿನಿಮಾ. ಈ ಸಿನಿಮಾಗೆ ಟೈಟಲ್ ಇಟ್ಟಿದ್ದು, 'ಮಟ್ಕಾ' ಎಂದು ಹೆಸರಿಡಲಾಗಿದೆ. ಈ ಸಿನಿಮಾದ ಮುಹೂರ್ತವನ್ನು ಹೈದರಾಬಾದ್‌ನಲ್ಲಿ ಅದ್ಧೂರಿಯಾಗಿ ಸೆಟ್ಟೇರಿದೆ. ಟಾಲಿವುಡ್‌ನ ದಿಗ್ಗಜರೇ ಈ ಸಿನಿಮಾ ಸಾಥ್ ಕಟ್ಟಿದ್ದಾರೆ. ನಿರ್ಮಾಪಕ ಅಲ್ಲು ಅರವಿಂದ್ ಈ ಸಿನಿಮಾಗೆ ಕ್ಲಾಪ್ ಮಾಡಿದ್ದಾರೆ. ನಿರ್ದೇಶಕ ಮಾರುತಿ ಕ್ಯಾಮರಾಗೆ ಚಾಲನೆ ಕೊಟ್ಟಿದ್ದಾರೆ. ಹಾಗೇ ಮತ್ತೊಬ್ಬ ನಿರ್ದೇಶಕ ಮಟ್ಕಾ ಸಿನಿಮಾದ ಪೋಸ್ಟರ್ ಅನ್ನು ಬಿಡುಗಡೆ ಮಾಡಿದ್ದಾರೆ.

ಈ ಸಿನಿಮಾ ಜೂಜಾಟದ ಕಥೆಯನ್ನು ಆಧರಿಸಿದ ಸಿನಿಮಾ. 1958ರಿಂದ 82ರ ಅವಧಿಯಲ್ಲಿ ವೈಜಾಗ್‌ನಲ್ಲಿ ನಡೆದ ಸತ್ಯ ಘಟನೆಯನ್ನೇ ಆಧರಿಸಿದ ಸಿನಿಮಾವಾಗಿದೆ. ಈ ಸಿನಿಮಾದಲ್ಲಿ ವರುಣ್ ತೇಜ್ ಬರೋಬ್ಬರು ನಾಲ್ಕು ಶೇಡ್‌ಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಸುಮಾರು 24 ವರ್ಷಗಳ ಹಿಂದಿನ ಕಥೆಯನ್ನು ಅದ್ಧೂರಿಯಾಗಿ ನಿರ್ಮಾಣ ಮಾಡಲಾಗುತ್ತಿದೆ. ಈ ಸಿನಿಮಾ ಮೆಗಾ ಪ್ರಿನ್ಸ್ ಸಿನಿ ಕರಿಯರ್‌ನ ಬಿಗ್ ಬಜೆಟ್ ಎಂದು ಅಂದಾಜಿಸಲಾಗಿದೆ.

'ಮಟ್ಕಾ' ಸಿನಿಮಾವನ್ನು 'ಫಲಾಸ' ಸಿನಿಮಾವನ್ನು ನಿರ್ದೇಶನ ಮಾಡಿದ್ದ ಕರುಣ್ ಕುಮಾರ್ ಆಕ್ಷನ್ ಕಟ್ ಹೇಳುತ್ತಿದ್ದಾರೆ. ವರುಣ್ ತೇಜ್ ಜೊತೆ ಈ ಸಿನಿಮಾದಲ್ಲಿ ಮೀನಾಕ್ಷಿ ಚೌಧರಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಹಾಗೇ ಕನ್ನಡ ನಟ ಕಿಶೋರ್ ವಿಶೇಷ ಪಾತ್ರದಲ್ಲಿ ನಟಿಸುತ್ತಿರೋದು ವಿಶೇಷ. ಇವರೊಂದಿಗೆ ಅಜಯ್ ಘೋಷ್, ಮೈಮ್ ಗೋಪಿ, ರೂಪಲಕ್ಷ್ಮಿ, ವಿಜಯರಾಮ ರಾಜು, ಜಗದೀಶ್ ಹಾಗೂ ರಾಜ್‌ ತಿರಂದಾಸ್ ಸೇರಿದಂತೆ ಹಲವರು ಈ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.

ಈ ಸಿನಿಮಾದ ಮತ್ತೊಂದು ವಿಶೇಷ ಅಂದ್ರೆ, ಮಟ್ಕಾ ಸಿನಿಮಾದಲ್ಲಿ ಬಾಲಿವುಡ್ ಬ್ಯೂಟಿ ನೋರಾ ಫತೇಹಿ ಐಟಂ ಸಾಂಗ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ವರುಣ್ ತೇಜ್ ಈ ಹಾಡಿನಲ್ಲೂ ಕಾಣಿಸಿಕೊಳ್ಳುತ್ತಿದ್ದಾರೆ. ವೈರಾ ಎಂಟರ್‌ಟೈನ್ಮೆಂಟ್ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಮೋಹನ್ ಚೆರುಕುರಿ ಮತ್ತು ಡಾ. ವಿಜೇಂದರ್ ರೆಡ್ಡಿ ಟೀಗಾಲ ಈ ಸಿನಿಮಾದ ನಿರ್ಮಾಪಕರು.

ಈ ಸಿನಿಮಾಗೆ ಜಿ.ವಿ. ಪ್ರಕಾಶ್ ಕುಮಾರ್ 'ಮಟ್ಕಾ' ಸಿನಿಮಾಗೆ ಸಂಗೀತ ನೀಡುತ್ತಿದ್ದಾರೆ. ಪ್ರಿಯ ಸೇಠ್ ಈ ಸಿನಿಮಾ ಕ್ಯಾಮರಾ ಹಿಡಿದ್ದಾರೆ. ಕಾರ್ತಿಕ್ ಶ್ರೀನಿವಾಸ್ ಆರ್ ಎಡಿಟಿಂಗ್, ಸುರೇಶ್ ಕಲಾ ನಿರ್ದೇಶನವಿದೆ. ಇದು ಪ್ಯಾನ್ ಇಂಡಿಯಾ ಸಿನಿಮಾ ಆಗಿದ್ದು, ತೆಲುಗು, ಕನ್ನಡ, ತಮಿಳು, ಹಿಂದಿ ಹಾಗೂ ಮಲಯಾಳಂ ಭಾಷೆಯಲ್ಲಿ ಏಕಕಾಲಕ್ಕೆ ಬಿಡುಗಡೆಯಾಗುತ್ತಿದೆ.