ಇದೇನಿದು? ಗುರುವಾರ ಥಿಯೇಟರ್‌ನಲ್ಲಿ ಬಿಡುಗಡೆಯಾಗಿ ಅದರ ನಾಳೆಯೇ ಓಟಿಟಿಗೆ ಬರಲಿದೆ ಶಿವಣ್ಣನ ಈ ಚಿತ್ರ!

ಗುರುವಾರ ಥಿಯೇಟ್ರಿಕಲ್ ರಿಲೀಸ್, ಶುಕ್ರವಾರ ಓಟಿಟಿಗೆ!

ಸದ್ಯ ವೇದ ಚಿತ್ರದ ತೆಲುಗು ವರ್ಷನ್ ಶಿವ ವೇದ ಚಿತ್ರ ಇದೇ ಗುರುವಾರ ( ಫೆಬ್ರವರಿ 9 ) ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ಘೋಷಣೆ ಮಾಡಿದ್ದು, ಚಿತ್ರದ ಬಿಡುಗಡೆಗೆ ಸಾಲು ಸಾಲು ಪೋಸ್ಟ್‌ಗಳನ್ನು ಮಾಡಿ ಭರ್ಜರಿ ತಯಾರಿ ನಡೆಸಿ ಪ್ರಮೋಟ್ ಮಾಡ್ತಿದೆ. ಆದರೆ ವೇದ ಚಿತ್ರ ಓಟಿಟಿಯಲ್ಲಿ ಇದೇ ಶುಕ್ರವಾರ ( ಫೆಬ್ರವರಿ 10 ) ಜೀ 5 ಓಟಿಟಿಯಲ್ಲಿ ಬಿಡುಗಡೆಯಾಗಲಿದೆ ಎಂಬುದು ಸಿನಿ ರಸಿಕರನ್ನು ಗೊಂದಲಕ್ಕೆ ದೂಡಿದೆ.

ವೇದ ತೆಲುಗು ಕೂಡ ಬಿಡುಗಡೆಯಾಗಲಿದೆ!

ಹೀಗೆ ವೇದ ತೆಲುಗು ವರ್ಷನ್ ಬಿಡುಗಡೆಯಾದ ನಾಳೆಯೇ ಓಟಿಟಿಯಲ್ಲಿ ಬಿಡುಗಡೆಯಾಗಲಿರುವ ಸುದ್ದಿ ಗೊಂದಲ ಮೂಡಿಸಲು ಕಾರಣ ಜೀ 5 ಹಂಚಿಕೊಂಡಿರುವ ವಿಡಿಯೊ. ಈ ವಿಡಿಯೊದಲ್ಲಿ ವೇದ ಫೆಬ್ರವರಿ 10ಕ್ಕೆ ಓಟಿಟಿಯಲ್ಲಿ ಬಿಡುಗಡೆಯಾಗಲಿದೆ ಎಂದು ತಿಳಿಸಲಾಗಿದ್ದು, ಕನ್ನಡ, ಹಿಂದಿ, ಮಲಯಾಳಂ, ತಮಿಳು ಹಾಗೂ ತೆಲುಗಿನಲ್ಲೂ ಚಿತ್ರ ಲಭ್ಯವಿರಲಿದೆ ಎಂದು ತಿಳಿಸಿದೆ. ಹೀಗೆ ತೆಲುಗಿನಲ್ಲಿಯೂ ಓಟಿಟಿ ಬಿಡುಗಡೆ ಮಾಡುವುದಾದರೆ ವೇದ ಚಿತ್ರದ ತೆಲುಗು ವರ್ಷನ್ ಅನ್ನು ಇಷ್ಟು ದೊಡ್ಡ ಮಟ್ಟದಲ್ಲಿ ಚಿತ್ರಮಂದಿರದಲ್ಲಿ ಬಿಡುಗಡೆ ಮಾಡುವ ಅವಶ್ಯಕತೆ ಏನಿತ್ತು, ಒಂದು ದಿನದ ಪ್ರದರ್ಶನಕ್ಕಾಗಿ ಎಷ್ಟೆಲ್ಲಾ ಯಾಕೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಪ್ರಿರಿಲೀಸ್ ಇವೆಂಟ್ ಸಹ ನಡೆಯಲಿದೆ

ಇನ್ನು ವೇದ ಸಿನಿಮಾದ ತೆಲುಗು ವರ್ಷನ್ ಶಿವ ವೇದ ಬಿಡುಗಡೆಗೆ ದೊಡ್ಡದಾಗಿ ಪ್ರಿ ರಿಲೀಸ್ ಇವೆಂಟ್ ಅನ್ನೂ ಸಹ ಆಯೋಜಿಸಲಾಗಿದೆ. ಇಂದು ( ಫೆಬ್ರವರಿ 7 ) ಸಂಜೆ ಆರು ಗಂಟೆಗೆ ಹೈದರಾಬಾದ್‌ನ ದಾಸ್ಪಲ್ಲದಲ್ಲಿ ಶಿವ ವೇದ ಚಿತ್ರದ ಪ್ರಿ ರಿಲೀಸ್ ಕಾರ್ಯಕ್ರಮ ಜರುಗಲಿದ್ದು, ಈ ಕಾರ್ಯಕ್ರಮಕ್ಕೆ ನಂದಮೂರಿ ಬಾಲಕೃಷ್ಣ ಮುಖ್ಯ ಅತಿಥಿಯಾಗಿದ್ದಾರೆ. ಇನ್ನು ಇದನ್ನೆಲ್ಲಾ ಗಮನಿಸಿದ ಸಿನಿ ರಸಿಕರು ವೇದ ಓಟಿಟಿ ಬಿಡುಗಡೆಯನ್ನು ಸ್ವಲ್ಪ ದಿನಗಳ ಕಾಲ ಮುಂದೂಡಿ ಒಂದು ದಿನದ ಅಂತರದಲ್ಲಿ ಈ ರೀತಿ ಬಿಡುಗಡೆ ಮಾಡಿದರೆ ಚಿತ್ರಮಂದಿರದಲ್ಲಿ ಚಿತ್ರವನ್ನು ಯಾರು ನೋಡ್ತಾರೆ ಎಂದು ಬೇಸರ ಹೊರಹಾಕಿದ್ದಾರೆ.