5 ನಿಮಿಷದ ಸುಖಕ್ಕೆ ನಟಿಯ ಮೇಲೆ 20 ಕೋಟಿ ಸುರಿತ್ತಾರಾ ? ಕಾಸ್ಟಿಂಗ್ ಕೌಚ್ ಬಗ್ಗೆ ನಟಿ ಪ್ರಗತಿ ಓಪನ್ ಟಾಕ್

ಇಂತಹವರು ಎಲ್ಲಾ ಕ್ಷೇತ್ರಗಳಲ್ಲೂ ಇರುತ್ತಾರೆ- ಪ್ರಗತಿ

"ಸಕ್ಸಸ್ ಆಗಿ ಒಂದು ಹಂತಕ್ಕೆ ಬೆಳೆದಿರುವ ನಟಿಯರನ್ನು ಕೇಳಿ, ಅವರು ತಮಗೆ ಕಾಸ್ಟಿಂಗ್ ಕೌಚ್ ಅನುಭವ ಆಗಿಲ್ಲ ಎಂದು ಹೇಳುತ್ತಾರೆ. ಚಿತ್ರರಂಗದಲ್ಲಿ ನಡೆಯುವ ಇಂತಹ ಸಣ್ಣಪುಟ್ಟ ವಿಚಾರಗಳ ಬಗ್ಗೆ ಸಕ್ಸಸ್ ಆಗಿರುವ ನಟಿಯರು ಹೆಚ್ಚು ತಲೆ ಕೆಡಿಸಿಕೊಳ್ಳುವುದಿಲ್ಲ. ಕಾಸ್ಟಿಂಗ್‌ ಕೌಚ್ ಆರೋಪ ಬರೀ ಸಕ್ಸಸ್ ಆಗದೇ ಇರುವ ನಟಿಯರಿಂದಲೇ ಕೇಳಿ ಬರುತ್ತದೆ. ಇಂತಹ ಕೆಟ್ಟ ಅನುಭವ ಕೆಲವೊಮ್ಮೆ ಎದುರಾಗಿರಬಹುದು. ಅದನ್ನು ಸುಳ್ಳು ಎನ್ನಲು ಸಾಧ್ಯವಿಲ್ಲ. ಆದರೆ ಅಂತಹವರನ್ನು ಸಂಪರ್ಕಿಸಿರುವ ನಿರ್ದೇಶಕರು, ನಿರ್ಮಾಪಕರು ಖ್ಯಾತರೇನು ಆಗಿರುವುದಿಲ್ಲ. ಇಂತಹವರು ಎಲ್ಲಾ ಕ್ಷೇತ್ರಗಳಲ್ಲೂ ಇರ್ತಾರೆ."

5 ನಿಮಿಷ ಸುಖಕ್ಕೆ ಕೋಟಿ ಕೋಟಿ ಸುರಿಯುವುದಿಲ್ಲ

"ಒಂದು ಹುಡುಗಿಗಾಗಿ ಯಾರು ಸಿನಿಮಾ ಮಾಡಲ್ಲ. ನಟಿಯರ ಮೇಲೆ ಕೋಟಿ ಕೋಟಿ ಹಣ ಹಾಕುವುದು, ಅವರಿಗೆ ಸಂಭಾವನೆ ಕೊಡುವುದು 5 ನಿಮಿಷದ ಸುಖಕ್ಕಾಗಿ ಅಲ್ಲ. ಒಬ್ಬ ಹುಡುಗಿ ಅದಕ್ಕೆ ಒಪ್ಪಿಕೊಂಡರೆ ಮಾತ್ರ ಅವಕಾಶ ಕೊಡುತ್ತೇನೆ ಎನ್ನುವುದು ಸಾಧ್ಯವಿಲ್ಲ. ಪಾತ್ರಕ್ಕೆ ಆಕೆ ಸೂಟ್ ಆದರೆ ಮಾತ್ರ ಆಯ್ಕೆ ಮಾಡಿಕೊಳ್ಳುತ್ತಾರೆ. ಯಾಕೆಂದರೆ ಸಿನಿಮಾ ಫಲಿತಾಂಶ ಆಕೆಯ ಮೇಲೆ ಆಧಾರವಾಗಿರುತ್ತದೆ. ಚಿತ್ರರಂಗದಲ್ಲಿ ಬಹಳ ಪೈಪೋಟಿ ಇದೆ. ಸೂಪರ್ ಸ್ಟಾರ್ ಆದರೂ ಕೂಡ ಸಿನಿಮಾ ಗೆದ್ದರೆ ಮಾತ್ರ ಉಳಿಗಾಲ. ಕಾಸ್ಟಿಂಗ್ ಕೌಚ್ ನಟಿಯರ ಕರಿಯರ್‌ ಮೇಲೆ ಪ್ರಭಾವ ಬೀರುತ್ತದೆ ಎಂದರೆ ನಾನು ಒಪ್ಪುವುದಿಲ್ಲ. ಪ್ರತಿಭೆ, ಸಾಮರ್ಥ್ಯ ಇದ್ದರೆ ಒಂದು ವರ್ಷ ತಡವಾಗಿ ಆದರೂ ಒಳ್ಳೆಯ ಅವಕಾಶ ಸಿಗುತ್ತದೆ".

ನನಗೆ ಚಿತ್ರರಂಗದಲ್ಲಿ ಇಂತಹ ಕೆಟ್ಟ ಅನುಭವ ಆಗಿಲ್ಲ

"ಪ್ರತಿಭೆ ಇಲ್ಲದೇ ಕಾಸ್ಟಿಂಗ್‌ ಕೌಚ್‌ನ ಕಾರಣವಾಗಿ ಹೇಳುವವರು ಸಾಕಷ್ಟು ಜನ ಇದ್ದಾರೆ. ಒಂದು ಕಥೆಯಲ್ಲಿ ಯಾವ ಪಾತ್ರಕ್ಕೆ ಯಾರು ಸೂಟ್ ಆಗ್ತಾರೆ ಅನ್ನುವುದನ್ನು ನೋಡಿ ನಿರ್ಮಾಪಕ, ನಿರ್ದೇಶಕರು ಆಯ್ಕೆ ಮಾಡುತ್ತಾರೆ. ಎಷ್ಟೇ ನಷ್ಟ ಆದರೂ ಕೆಲ ನಿರ್ಮಾಪಕರು ಸಿನಿಮಾಗಳನ್ನು ಮಾಡುತ್ತಲೇ ಇದ್ದಾರೆ. ಅಂತಹವರನ್ನೆಲ್ಲಾ ಇದೇ ದೃಷ್ಟಿಯಲ್ಲಿ ನೋಡುವುದು ತಪ್ಪು. ನಾನು ಇಷ್ಟು ವರ್ಷಗಳಿಂದ ಚಿತ್ರರಂಗದಲ್ಲಿ ಇದ್ದೀನಿ. ನನಗೆ ಇಂತಹ ನೆಗೆಟಿವಿಟಿ ಕಾಣಿಸಿಲ್ಲ. ಆದರೆ ಒಂದು ಎರಡೂ ಸಿನಿಮಾದಲ್ಲಿ ನಟಿಸಿ ಹೋದವರು ಇಡೀ ಚಿತ್ರರಂಗವೇ ಹೀಗೆ ಎಂದು ಮಾತನಾಡುವುದನ್ನು ನೋಡಿದರೆ ನಗು ಬರುತ್ತದೆ. ಅವರಿಗೆ ಸಿನಿಮಾ ಬಗ್ಗೆ ಏನು ಗೊತ್ತು ಅನಿಸುತ್ತದೆ".

ಕಾಸ್ಟಿಂಗ್‌ ಕೌಚ್‌ನಿಂದ ಚಿತ್ರರಂಗವನ್ನು ಅಳೆಯಬಾರದು

"ನನಗೆ ಚಿತ್ರರಂಗದಲ್ಲಿ ಕಾಸ್ಟಿಂಗ್ ಕೌಚ್ ಅನುಭವ ಆಗಿಲ್ಲ. ಆದರೆ ಯಾರಾದರೂ ಪರೋಕ್ಷವಾಗಿ ಆ ರೀತಿ ಮಾತನಾಡಿದರೆ ಅಲ್ಲಿಂದ ಹೊರಬಂದು ಬೇರೆ ಸಿನಿಮಾದಲ್ಲಿ ಅವಕಾಶ ಪಡೆದ ಸಂದರ್ಭವೂ ಇದೆ. ಹಾಗಂತ ನಾನು ಚಿತ್ರರಂಗವನ್ನು ದೂಷಿಸುವುದಿಲ್ಲ. ಒಂದು ಹುಡುಗಿ ಸುಂದರವಾಗಿ ಇದ್ದರೆ ಅಪ್ರೋಚ್ ಆಗುವವರು ಇರುತ್ತಾರೆ. ಆಕೆಯಿಂದ ಏನಾದರೂ ಬಯಸುತ್ತಾರೆ. ಇದೊಂದು ಪಾಯಿಂಟ್ ಹಿಡಿದುಕೊಂಡು ಚಿತ್ರರಂಗದಲ್ಲಿ ನಡೆಯುತ್ತಿರುವ ನೂರಾರು ಕೋಟಿ ವ್ಯವಹಾರ ಎಲ್ಲವೂ ಅದಕ್ಕಾಗಿಯೇ ಎನ್ನುವುದು ಸರಿಯಲ್ಲ. ಸಿನಿಮಾ ಸಾವಿರಾರು ಜನರ ಜೀವನಾಧಾರ. ಅಂತಹ ಕ್ಷೇತ್ರದಲ್ಲಿ ಕಾಸ್ಟಿಂಗ್ ಕೌಚ್‌ ಒಂದೇ ಎಲ್ಲಾ ಎನ್ನುವುದು ತಪ್ಪು" ಎಂದು ಪ್ರಗತಿ ಹೇಳಿದ್ದಾರೆ.

ನೆಪೋಟಿಸಂ ಬಗ್ಗೆ ನಟಿ ಪ್ರಗತಿ ಮಾತು

ಚಿತ್ರರಂಗದಲ್ಲಿ ಸದ್ದು ಮಾಡುತ್ತಿರುವ ನೆಪೋಟಿಸಂ ಬಗ್ಗೆ ಕೂಡ ನಟಿ ಪ್ರಗತಿ ಮಾತನಾಡಿದ್ದಾರೆ. "ಪೊಲೀಸ್ ಮಗ ಪೊಲೀಸ್ ಆಗಬೇಕು, ಡಾಕ್ಟರ್ ಮಗ ಡಾಕ್ಟರ್ ಆಗಬೇಕು ಎಂದುಕೊಳ್ಳುವುದು ತಪ್ಪಲ್ಲ. ಅದೇ ರೀತಿ ನಟನ ಮಗ ನಟ ಆಗಬೇಕು ಎಂದುಕೊಳ್ಳುತ್ತಾರೆ. ಆದರೆ ಸಾಮರ್ಥ್ಯ ಇದ್ದರೆ ಮಾತ್ರ ಕ್ಲಿಕ್ ಆಗುವುದಕ್ಕೆ ಸಾಧ್ಯ. ತಂದೆಯಿಂದ ಚಿತ್ರರಂಗಕ್ಕೆ ಎಂಟ್ರಿ ಆಗುವುದು ಸುಲಭ ಇರಬಹುದು. ಆದರೆ ಗೆಲ್ಲುವುದಕ್ಕೆ ಪರಿಶ್ರಮ ಬಹಳ ಅಗತ್ಯ. ಅವರವರ ನಟನೆಯನ್ನು ಅವರೇ ಮಾಡಬೇಕು" ಎಂದು ಪ್ರಗತಿ ವಿವರಿಸಿದ್ದಾರೆ.