'ಮಹೇಶ್ ಬಾಬು ಹೊಸ ಚಿತ್ರಕ್ಕೆ ಆಕೆಯೇ ಹೀರೋಯಿನ್ ಆಗಲಿ': ಪ್ರಿನ್ಸ್ ಪತ್ನಿ ಸೂಚಿಸಿದ್ದು ಯಾರನ್ನು?

'ಮಹರ್ಷಿ' ಡೈರೆಕ್ಟರ್ ಜೊತೆ ಸಿನಿಮಾ

ಮಹರ್ಷಿ ಸಿನಿಮಾ ನಿರ್ದೇಶನ ಮಾಡಿದ್ದ ನಿರ್ದೇಶಕ ವಂಶಿ ಪೈದಿಪಲ್ಲಿ ಜೊತೆ ಮಹೇಶ್ ಬಾಬು ಮತ್ತೆ ಸಿನಿಮಾ ಮಾಡುತ್ತಿದ್ದಾರೆ. ಪ್ರಿ-ಪ್ರೊಡಕ್ಷನ್ ಕೆಲಸ ನಡೆಯುತ್ತಿದ್ದು, ಸದ್ಯದಲ್ಲೇ ಸಿನಿಮಾ ಸೆಟ್ಟೇರಲಿದೆ. ಈ ಮಧ್ಯೆ ಹೀರೋಯಿನ್ ವಿಷಯ ಸದ್ದು ಮಾಡ್ತಿದೆ.

ನಮ್ರತಾ ಸೂಚಿಸಿದ ನಟಿ ಇವರೇ

ಮಹೇಶ್ ಬಾಬು ಸಿನಿಮಾಗಳಿಗೆ ಕಲಾವಿದರನ್ನು ಆಯ್ಕೆ ಮಾಡಿಕೊಳ್ಳು ಹಂತದಲ್ಲಿ ನಮ್ರತಾ ಅವರ ಪಾತ್ರವೂ ಇರಲಿದೆ ಎನ್ನುವುದು ಟಾಲಿವುಡ್ನಲ್ಲಿ ತಿಳಿದಿರುವ ಸಂಗತಿ. ಇದೀಗ, 27ನೇ ಚಿತ್ರಕ್ಕೆ ಬಾಲಿವುಡ್ ನಟಿ ಕೈರಾ ಅಡ್ವಾನಿ ಹೆಸರು ಸೂಚಿಸಿರುವ ನಮ್ರತಾ, ಈಕೆ ಉತ್ತಮ ಜೋಡಿ ಎಂದಿದ್ದಾರಂತೆ.

ಭರತ್ ಅನೇ ನೇನು ನಾಯಕಿ!

ಕೈರಾ ಅಡ್ವಾನಿ ಈ ಹಿಂದೆ ಮಹೇಶ್ ಬಾಬು ಜೊತೆ ಭರತ್ ಅನೇ ನೇನು ಸಿನಿಮಾ ಮಾಡಿದ್ದರು. ಕೈರಾಗೆ ಈ ಚಿತ್ರ ಮೊದಲ ತೆಲುಗು ಸಿನಿಮಾ. ಸಿನಿಮಾನೂ ಹಿಟ್ ಆಗಿತ್ತು. ಕೈರಾಗೂ ಅದೃಷ್ಟ ತಂದಿತ್ತು. ಇದಾದ ಬಳಿಕ ರಾಮ್ ಚರಣ್ ಜೊತೆ ಒಂದು ಸಿನಿಮಾ ಮಾಡಿದ್ದರು. ಈಗ ಬಾಲಿವುಡ್ನಲ್ಲಿ ಕೈರಾ ಬ್ಯುಸಿಯಾಗಿದ್ದಾರೆ.

ವಂಶಿ ಕೂಡ ಗ್ರೀನ್ ಸಿಗ್ನಲ್!

ಮಹೇಶ್ ಬಾಬು ಅವರ ಪತ್ನಿ ನಮ್ರತಾ ಅವರ ಸಲಹೆಯನ್ನು ಸ್ವೀಕರಿಸಿರುವ ನಿರ್ದೇಶಕ ವಂಶಿ, ಕೈರಾ ಅಡ್ವಾನಿಯನ್ನು ಅಪ್ರೋಚ್ ಮಾಡಲು ನಿರ್ಧರಿಸಿದ್ದಾರಂತೆ. ಸದ್ಯಕ್ಕೆ ಕೈರಾ ಹಿಂದಿಯಲ್ಲಿ ನಾಲ್ಕು ಸಿನಿಮಾ ಮಾಡುತ್ತಿದ್ದಾರೆ. ಈ ಕಡೆ ಮಹೇಶ್ ಬಾಬು ಸಿನಿಮಾ ಎಂಬ ಕಾರಣಕ್ಕೆ ಮತ್ತೆ ಕಾಲ್ ಶೀಟ್ ಕೊಟ್ಟರೂ ಕೊಡಬಹುದು. ಪಕ್ಕಾ ಆಗುತ್ತಾ ಎಂದು ಕಾದುನೋಡಬೇಕಿದೆ.