ಭವ್ಯಾಗೆ ನೀವೇ ನನ್ನ ಲಿಲ್ಲಿಪುಟ್ಟು ಎಂದ ತ್ರಿವಿಕ್ರಮ್: ಇತ್ತ ಶಿಶಿರ್‌ಗೆ ಮಂಡಿಯೂರಿ ಕೆಂಗುಲಾಬಿ ನೀಡಿದ ಐಶ್ವರ್ಯಾ

ಬಿಗ್‌ಬಾಸ್ ಆರಂಭದಿಂದಲೂ ಭವ್ಯಾ ಗೌಡ ಹಾಗೂ ತ್ರಿವಿಕ್ರಮ್ ನಡುವೆ ಉತ್ತಮ ಬಾಂಧವ್ಯವಿದೆ. ಕಳೆದ ಸಂಚಿಕೆಯಲ್ಲಿ ಬಿಗ್‌ಬಾಸ್ ನೀಡಿದ ಚಟುವಟಿಕೆಯಲ್ಲಿ ತ್ರಿವಿಕ್ರಮ್ ತಮ್ಮ ಮನಸಿನ ಭಾವನೆ ಹೇಳಿಕೊಂಡಿದ್ದು, ಇವರಿಬ್ಬರ ಸ್ನೇಹ ಮತ್ತಷ್ಟು ಬಿಗಿಯಾಗಿದೆ. ಭವ್ಯಾಗೆ ಕೆಂಗುಲಾಬಿ ನೀಡಿದ ತ್ರಿವಿಕ್ರಮ್, 'ನಾನು ಈ ಮನೆಯಲ್ಲಿ ಆನೆ ತರಹ ಇದ್ದರೆ, ಮಾವುತನ ತರಹ ಈ ಮನೆಯಲ್ಲಿ ಒಂದು ಲಿಲ್ಲಿಪುಟ್ಟು ಓಡಾಡುತ್ತಾ ಇರುತ್ತೆ'. ಫ್ರೆಂಡ್‌ಶಿಪ್ ಅಂದ್ರೆ ಮಾತನಲ್ಲ, ಮೌನವನ್ನು ಅರ್ಥ ಮಾಡಿಕೊಳ್ಳುವವರು ಎಂದರು. ಭವ್ಯಾ ವೇದಿಕೆಗೆ ಬರುತ್ತಿದ್ದಂತೆ ನನ್ನ ಗೆಳತಿಯಾಗಿದ್ದಕ್ಕೆ ಧನ್ಯವಾದ. ಹೊರಗಿದ್ದಾಗ ಇವರ ನಂಬರ್ ಕೂಡ ಇರ್ಲಿಲ್ಲ. ಇವತ್ತು ಗೆಳತಿಯಾಗಿ ನನ್ನ ಜೊತೆ ಇದ್ದೀರಿ. ತುಂಬಾ ದೂರ ನೋಡುವ ಆಸೆಯಿದೆ ಅಂತ ಹೇಳಿದ್ದಾರೆ.

ಭವ್ಯಾ ಗೌಡ ಕೂಡ ತ್ರಿವಿಕ್ರಮ್‌ಗೆ ರೆಡ್‌ರೋಸ್ ನೀಡಿದರು. ನಾನು ಈ ವ್ಯಕ್ತಿ ಜೊತೆ ಮಾತೇ ಆಡಲ್ಲ ಅಂದುಕೊಂಡಿದ್ದೆ.  ಹೊರಗೆ ಹಾಯ್‌ಬಾಯ್ ಕೂಡ ಸರಿಯಾಗಿರಲಿಲ್ಲ. ಅವರ ಜೊತೆ ಈಗ ಚೆನ್ನಾಗಿ ಕನೆಕ್ಟ್ ಆಗಿದ್ದೇನೆ. ಗೆಳೆತನದಲ್ಲಿ ಅವರು ಏನನ್ನೂ ನಿರೀಕ್ಷಿಸಲ್ಲ. ಆ ಗುಣ ಇಷ್ಟ. ಹೊರಹೋದ ಮೇಲೆಯೂ ನಾನು ಈ ಗೆಳೆತನ ಮುಂದುವರೆಸಲು ಬಯಸುತ್ತೇನೆ ಎಂದರು.

ಇತ್ತೀಚೆಗೆ ಬಿಗ್‌ಬಾಸ್ ಮನೆಯಲ್ಲಿ ಶಿಶಿರ್ ಹಾಗೂ ಐಶ್ವರ್ಯಾ ಸಿಂಧೋಗಿ ನಡುವೆ ಒಳ್ಳೇ ಗೆಳೆತನ ಬೆಳೆದಿದೆ. ಈ ವಿಷಯವನ್ನಿಟ್ಟುಕೊಂಡು ಅನೇಕರು ಅವರಿಬ್ಬರ ಕಾಲೆಯುತ್ತಿರುತ್ತಾರೆ. ಕಳೆದ ಸಂಚಿಕೆಯಲ್ಲಿ ಶಿಶಿರ್‌ಗೆ ಮಂಡಿಯೂರಿ ರೆಡ್‌ರೋಸ್ ನೀಡಿದ ಐಶ್ವರ್ಯಾ, ಫ್ರೆಂಡ್‌ಶಿಪ್ ಅಂದ್ರೆ ಸಂತೋಷದ ಸಮಯದಲ್ಲಿ ಮಾತ್ರ ಇರೋದಲ್ಲ. ದುಃಖದಲ್ಲಿದ್ದಾಗ ಕರೆದುಕೊಂಡು ಹೋಗುವವರು ನಿಜವಾದ ಸ್ನೇಹಿತರು. ಮಾನವೀಯ ಗುಣ ತುಂಬಾನೇ ಮುಖ್ಯ, ಆ ಗುಣ ಅವರಲ್ಲಿದೆ ಎಂದರು. ಇತ್ತ ಶಿಶಿರ್ ಕೂಡ ಐಶ್ವರ್ಯಾ ಅವರಿಗೆ ಕೆಂಗುಲಾಬಿ ನೀಡಿದ್ದಾರೆ.

ರೆಡ್ ಹಾಗೂ ಬ್ಲ್ಯಾಕ್ ರೋಸ್ ನೀಡುವ ಟಾಸ್ಕ್ ಮುಗಿದ ಬಳಿಕ ಬಿಗ್‌ಬಾಸ್ ಮನೆಯ ಸದಸ್ಯರಿಗೆ ಹೊಸ ಟಾಸ್ಕ್ ನೀಡಿದರು. ಕತ್ತಲೆ-ಬೆಳಕು, ಅಮೃತ, ಸ್ವರ್ಗ-ನರಕ, ಮನಸ್ಸು-ಮೆದಳು..ಇವು ಒಂದಕ್ಕೊಂದು ವಿರುದ್ಧ ಗುಣ ಹೊಂದಿದ್ದರೂ, ಸಮಕ್ಷಮ ಹಾಗೂ ಸಹಕಾಣಿಕೆ ಜಗತ್ತಿನ ಸಮತೋಲನಕ್ಕೆ ಬಹಳ ಮುಖ್ಯ. ಈ ವಾರ ಇದೇ ಪರಿಕಲ್ಪನೆಯೊಂದಿಗೆ ಮನೆಯ ಸದಸ್ಯರನ್ನು ಬಿಗ್‌ಬಾಸ್ ಪರೀಕ್ಷಿಸಲಿದ್ದಾರೆ. ವೈಯಕ್ತಿಕ ಆಟಗಳನ್ನು ಜೋಡಿಗಳಾಗಿ ಆಡಲಿದ್ದೀರಿ. ಆಟದ ರೋಚಕತೆಯನ್ನು ಹೆಚ್ಚಿಸಲು ನಿಮ್ಮೆಲ್ಲರನ್ನು ಜೋಡಿಗಳಾಗಿ ವಿಂಗಡಿಸಲಾಗಿದೆ. ಸಾಮರಸ್ಯದ ಜೋಡಿಗಳಲ್ಲ, ವ್ಯತಿರಿಕ್ತದ ಜೋಡಿಗಳಾಗಿ ವಿಂಗಡಿಸಲಾಗಿದೆ. ಭಿನ್ನತೆಯಲ್ಲೂ ಸಾಮರಸ್ಯ ಕಂಡುಕೊಳ್ಳಬೇಕಾಗುತ್ತೆ ಬಿಗ್‌ಬಾಸ್ ತಿಳಿಸಿದ್ದಾರೆ.