ಈ ವಾರ ಎಲಿಮಿನೇಷನ್ ಇಲ್ಲ: ಈ ಐವರು ಸ್ಪರ್ಧಿಗಳ ಪೈಕಿ ಕ್ಯಾಪ್ಟನ್ ಆಗೋರು ಯಾರು?

ಬಿಗ್‌ಬಾಸ್ ಮನೆಯ ಮೂಲ ನಿಯಮ ಮುರಿದ ಕಾರಣ ಈ ಎರಡನೇ ವಾರ ಬಿಗ್‌ಬಾಸ್‌ ಎಲ್ಲರನ್ನು ನಾಮಿನೇಟ್ ಮಾಡಿದ್ದರು. ಬಳಿಕ ನಾಮಿನೇಷನ್‌ನಿಂದ ಬಚಾವ್ ಆಗಲು ಹಾಗೂ ನೇರವಾಗಿ ನಾಮಿನೇಟ್ ಮಾಡುವುದಕ್ಕೆ ಹಲವು ಟಾಸ್ಕ್‌ಗಳನ್ನು ನೀಡಿದ್ದರು. ಇದರ ಅನುಸಾರ, ನಾಮಿಷನ್‌ನಿಂದ ಸೇವ್ ಆಗಿರುವ ಮೋಕ್ಷಿತಾ ಪೈ, ಉಗ್ರಂ ಮಂಜು, ಗೌತಮಿ ಜಾದವ್, ಚೈತ್ರಾ ಕುಂದಾಪುರ, ಶಿಶಿರ್ ಶಾಸ್ತ್ರಿ ಸದ್ಯ ಕ್ಯಾಪ್ಟನ್ಸಿ ರೇಸ್‌ನಲ್ಲಿದ್ದಾರೆ. ಈ ಐವರ ಪೈಕಿ ಯಾರು ಕ್ಯಾಪ್ಟನ್ ಆಗುತ್ತಾರೆ ಎಂಬುದನ್ನು ಕಾದು ನೋಡಬೇಕು. 

ಈ ವಾರ ಮನೆಯಿಂದ ಹೊರಹೋಗಲು ಭವ್ಯಾ ಗೌಡ, ಧನರಾಜ್, ಧರ್ಮ ಕೀರ್ತಿರಾಜ್, ರಂಜಿತ್, ತ್ರಿವಿಕ್ರಮ್, ಮಾನಸಾ, ಐಶ್ವರ್ಯಾ ಸಿಂಧೋಗಿ, ಗೋಲ್ಡ್ ಸುರೇಶ್, ಹಂಸಾ, ಜಗದೀಶ್ ಹಾಗೂ ಅನುಷಾ ರೈ ನಾಮಿನೇಟ್ ಆಗಿದ್ದರು. ಆದರೆ, ವೋಟಿಂಗ್ ಲೈನ್ಸ್ ತೆರೆದಿರುವುದಿಲ್ಲ ಎಂಬ ಸೂಚನೆ ನೀಡಲಾಗಿದೆ. ಹೀಗಾಗಿ, ಈ ವಾರ ಎಲಿಮಿನೇಷನ್ ಇಲ್ಲ ಎಂಬುದು ಖಾತ್ರಿಯಾಗಿದೆ. ಇದೇ ಶನಿವಾರ ವಿಜಯ ದಶಮಿ ಇರುವ ಕಾರಣ ಹಬ್ಬದಂದು ಯಾರನ್ನೂ ಎಲಿಮಿನೇಟ್ ಮಾಡುವುದಿಲ್ಲ. 

ಈ ವಾರದ ಕೊನೆಯ ಟಾಸ್ಕ್ ಮೈತುಂಬಾ ಕೆಸರು, ನಾಮಿನೇಷನ್‌ನಿಂದ ಪಾರು. ಈ ಟಾಸ್ಕ್‌ನಲ್ಲಿ ಕ್ಯಾಪ್ಟನ್ ಹಂಸ ತೆಗೆದುಕೊಂಡ ನಿರ್ಧಾರದಿಂದಾಗಿ ಎರಡು ತಂಡಗಳ ನಡುವೆ ಕಲಹ ಉಂಟಾಗಿತ್ತು. ಆಗ ಸ್ವರ್ಗ-ನರಕದ ಕ್ಯಾಪ್ಟನ್‌ಗಳಾದ ಗೌತಮಿ ಹಾಗೂ ಮೋಕ್ಷಿತಾ ಮಾತನಾಡಿಕೊಂಡು ಸಮಸ್ಯೆ ಬಗೆಹರಿಸಿಕೊಳ್ಳಬೇಕು ಎಂಬ ನಿರ್ಧಾರಕ್ಕೆ ಬರಲಾಯಿತು. ಇದರ ಮಧ್ಯೆ ಲಾಯರ್ ಜಗದೀಶ್ ಬಂದು ಕೂಗಾಡುವುದಕ್ಕೆ ಬಂದರು. ಇದರಿಂದ ಸಿಟ್ಟಾದ ಮೋಕ್ಷಿತಾ, ಜಗದೀಶ್‌ಗೆ ಖಡಕ್ ಎಚ್ಚರಿಕೆ ಕೊಟ್ಟರು. ಮೋಕ್ಷಿತಾ ಇಷ್ಟು ಸಿಟ್ಟಿನಿಂದ, ಕೋಪದಿಂದ ಕೂಗಾಡಿದ್ದು ಇದೇ ಮೊದಲ ಬಾರಿ. 

ಎರಡನೇ ವಾರ ದೊಡ್ಮನೆ ಸದಸ್ಯರ ನಡುವೆ ಕಾಂಪಿಟೇಶನ್, ಕಿತ್ತಾಟ ಎಲ್ಲವೂ ಜೋರಾಗಿದೆ. ಈ ನಡುವೆ ತುಕಾಲಿ ಮಾನಸ ಕಾಲಿಗೆ ಪೆಟ್ಟು ಮಾಡಿಕೊಂಡು ಆಸ್ಪತ್ರೆ ಸೇರಿದ್ದಾರೆ. ಮಾನಸ ಬಿಗ್‌ಬಾಸ್‌ ಮನೆಗೆ ಬಂದಾಗಿನಿಂದಲೂ ಅಂದುಕೊಂಡಷ್ಟು ಮನೋರಂಜನೆ ನೀಡುತ್ತಿಲ್ಲ. ಟಾಸ್ಕ್‌ನಲ್ಲೂ ಅಷ್ಟಕಷ್ಟೇ. ಹೀಗಾಗಿ, ಸೋಶಿಯಲ್ ಮೀಡಿಯಾದಲ್ಲಿ ಈಗಾಗಲೇ ಮಾನಸಾ ಅವರನ್ನು ಹೊರ ಕಳುಹಿಸಬೇಕು ಎಂಬ ಮಾತುಗಳು ಕೇಳಿಬರ್ತಿವೆ. ಹೀಗಾಗಿ, ಮಾನಸ ಬೇಗ ಚೇತರಿಸಿಕೊಂಡು ಟಾಸ್ಕ್‌ಗಳಲ್ಲಿ ಭಾಗವಹಿಸುವ ಅಗತ್ಯವಿದೆ.