ತುಂಬು ಕುಟುಂಬದ ಪ್ರೀತಿ, ಬಾಂಧವ್ಯ ತಿಳಿಸುವ ಕನ್ನಡದ ಅದ್ಭುತ ಸಿನಿಮಾಗಳಿವು!

ಕನ್ನಡ ಚಿತ್ರರಂಗದಲ್ಲಿ ದಾಖಲೆಗಳ ಮೇಲೆ ದಾಖಲೆ ಸೃಷ್ಟಿಸಿದ್ದ 'ಯಜಮಾನ' ಇಂದಿಗೂ ಸಾರ್ವಕಾಲಿಕ ಹಿಟ್. ಇದು ತಮಿಳಿನ  'ವಾನತ್ತೆಪೋಲ' ಎಂಬ ಚಿತ್ರದ ರಿಮೇಕ್. ತಮಿಳಿನ ರಿಮೇಕ್ ಆಗಿದ್ದರೂ ಮೂಲ ಭಾಷೆಗಿಂತ ಕನ್ನಡದಲ್ಲೆ ದೊಡ್ಡ ಹಿಟ್ ಆಗಿತ್ತು.  ಈ ಸಿನಿಮಾದಲ್ಲಿ ವಿಷ್ಣುವರ್ಧನ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಸಿನಿಮಾದಲ್ಲಿ ವಿಷ್ಣುವರ್ಧನ್ ತಂದೆ ಹಾಗೂ ಮಗನ ಪಾತ್ರವನ್ನು ನಿರ್ವಹಿಸಿದ್ದು, ಅವರ ಅದ್ಭುತ ನಟನೆಗೆ ಪ್ರೇಕ್ಷಕರು ಫಿದಾ ಆಗಿದ್ದರು. ಇವರ ಜೊತೆಗೆ ಶಶಿಕುಮಾರ್ ಮತ್ತು ಅಭಿಜಿತ್ ವಿಷ್ಣು ತಮ್ಮಂದಿರಾಗಿ ಅಭಿನಯಿಸಿದ್ದರು. ತುಂಬು ಕುಟುಂಬ ಕಥೆಯನ್ನು ಹೊಂದಿದ್ದ 'ಯಜಮಾನ' ತಮಿಳಿನ ರಿಮೇಕ್ ಆಗಿದ್ದರೂ ಮೂಲ ಭಾಷೆಗಿಂತ ಕನ್ನಡದಲ್ಲೆ ದೊಡ್ಡ ಹಿಟ್ ಆಗಿತ್ತು. 

ಎಸ್ ನಾರಾಯಣ್ ನಿರ್ದೇಶನದಲ್ಲಿ ಮೂಡಿಬಂದ ಸೂರ್ಯವಂಶ ಚಿತ್ರದಲ್ಲೂ ಸಾಹಸಸಿಂಹ ಡಾ.ವಿಷ್ಣುವರ್ಧನ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಸೂರ್ಯವಂಶ ಚಿತ್ರದಲ್ಲಿ ವಿಷ್ಣುವರ್ಧನ್ ಅವರು ಸತ್ಯಮೂರ್ತಿ ಮತ್ತು ಕನಕಮೂರ್ತಿ  ಎಂಬ ತಂದೆ ಮತ್ತು ಮಗನ ಪಾತ್ರ ನಿರ್ವಹಿಸಿದ್ದರು. ಇ‍ಷಾ ಕೊಪ್ಪಿಕರ್, ವಿಜಯಲಕ್ಷ್ಮಿ ನಾಯಕಿಯರ ಪಾತ್ರದಲ್ಲಿ ನಟಿಸಿದ್ದ ಈ ಚಿತ್ರಕ್ಕೆ ವಿ ಮನೋಹರ್ ಅದ್ಭುತ ಸಂಗೀತ ನೀಡಿದ್ದರು. ಅಭೂತಪೂರ್ವ ಪ್ರದರ್ಶನ ಕಂಡ ಈ ಚಿತ್ರ ಬಾಕ್ಸಾಫೀಸಿನಲ್ಲಿ ಸುಮಾರು 20 ಕೋಟಿ ಗಳಿಕೆ ಕಂಡಿತ್ತು. ತನ್ನ ತಂದೆಗೆ ವಿರುದ್ಧವಾಗಿ ನಡೆಯುವ ಮಗ ಮತ್ತು ತಂದೆಯ ಕೋಪವನ್ನೇ ಆಶೀರ್ವಾದ ಎಂದು ಭಾವಿಸಿ ಮೇಲಕ್ಕೆ ಬೆಳೆಯುವ ಮಗನ ಕಥೆಯನ್ನು ಸೂರ್ಯವಂಶ ಚಿತ್ರ ಹೊಂದಿತ್ತು. ವಿಷ್ಣು ಮೊದಲ ಬಾರಿಗೆ ಈ ಚಿತ್ರದಲ್ಲಿ ದೊಡ್ಡದಾದ ಮೀಸೆಯನ್ನು ಬಿಟ್ಟಿದ್ದರು.

2001ರಲ್ಲಿ ಬಿಡುಗಡೆಯದ ಜೇನುಗೂಡು ಸಿನಿಮಾದಲ್ಲಿಯೂ ಕೂಡ ಕುಟುಂಬ ಕಥೆ ಹೆಣೆಯಲಾಗಿತ್ತು. ಚಿತ್ರದಲ್ಲಿ ಶೃತಿ, ಕುಮಾರ್ ಗೋವಿಂದ್, ಸಿತಾರಾ,  ದೇವರಾಜ್, ಜಗ್ಗೇಶ್, ಉಮಾಶ್ರೀ ಮುಂಆತದವರು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ಅವಿಭಕ್ತ ಕುಟುಂಬದಲ್ಲಿ ಹೇಗೆ ಬಾಳಬೇಕು ಎಂಬುದನ್ನು ತಿಳಿಸಿಕೊಡಲಾಗಿತ್ತು.

1999ರಲ್ಲಿ ತೆರೆಕಂಡ ಸೂಪರ್ ಹಿಟ್ ಕೌಟುಂಬಿಕ ಸಿನಿಮಾ ಹಬ್ಬ. ಈ ಸಿನಿಮಾದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್, ರೆಬಲ್ ಸ್ಟಾರ್ ಅಂಬರೀಶ್, ದೇವರಾಜ್, ವಿಜಯಲಕ್ಷ್ಮೀ, ಚಾರುಲತಾ, ಶಶಿಕುಮಾರ್, ಜಯಪ್ರಧಾ, ಊರ್ವಶಿ, ರಾಮ್‌ಕುಮಾರ್ ಸೇರಿದಂತೆ ಕಲಾವಿದರ ದಂಡೇ ಇತ್ತು. ಈ ಮಲ್ಟಿ ಸ್ಟಾರರ್ ಸಿನಿಮಾದ ಹಬ್ಬ ಹಬ್ಬ ಹಾಗೂ ಜೇನಿನ ಗೂಡ ನಾವೆಲ್ಲಾ ಹಾಡುಗಳು ಇಂದಿಗೂ ಜನಪ್ರಿಯವಾಗಿವೆ.

ಜೇಷ್ಠ ಸಿನಿಮಾದಲ್ಲಿ ಡಾ.ವಿಷ್ಣುವರ್ಧನ್, ಅನಿರುದ್ಧ್, ದೇವರಾಜ್, ಮಾಸ್ಟರ್ ಆನಂದ್, ಸೌರವ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಐವರು ಸಹೋದರರ ಕಥೆ ಹೆಣೆಯಲಾಗಿತ್ತು. ವಿಷ್ಣುವರ್ಧನ್ ತನ್ನ ತಂದೆಯ ಮರಣದ ನಂತರ ತನ್ನ ಸಹೋದರರನ್ನು ಬೆಳೆಸುತ್ತಾನೆ. ಅವರೆಲ್ಲರೂ ದೊಡ್ಡವರಾದ ಬಳಿಕ ತಮ್ಮ ತಂದೆ ವಾಸಿಸುತ್ತಿದ್ದ ಹಳ್ಳಿಗೆ  ಬರ್ತಾರೆ. ಈ ಸಂದರ್ಭ ಅವರ ಸಹೋದರಸಂಬಂಧಿ ಇವರ ಕುಟುಂಬ ಒಡೆಯಲು ಪ್ರಯತ್ನಸುವ ಕಥೆ ಚಿತ್ರದಲ್ಲಿದೆ.