ಚಂದನವನದ ಚೆಂದದ ಜೋಡಿ ಅನಂನ್‌ನಾಗ್‌-ಲಕ್ಷ್ಮಿಯ ನಟನೆಯ ನೀವು ನೋಡಲೇಬೇಕಾದ ಅತ್ಯುತ್ತಮ ಸಿನಿಮಾಗಳಿವು!

ಬಿ ದೂರೈರಾಜ್ ನಿರ್ದೇಶನದಲ್ಲಿ ಮೂಡಿ ಬಂದ `ಬೆಂಕಿಯ ಬಲೆ' ಚಿತ್ರ ತರಾಸು ರವರ ಕಾದಂಬರಿ ಆಧಾರಿತವಾಗಿತ್ತು. ಬಡ ಶಿಕ್ಷಕನೊಬ್ಬನ ಬವಣೆಯನ್ನು ಚಿತ್ರ ಮನೋಘ್ನವಾಗಿ ಚಿತ್ರಿಸಿತು. ನರಸಿಂಹ ಎಂಬ ಶಾಲಾ ಶಿಕ್ಷಕ ರುಕ್ಮಿಣಿಯನ್ನು ಮೆಚ್ಚಿ ಮದುವೆಯಾಗುತ್ತಾನೆ. ಆದರೆ ಮುಂದೆ ನರಸಿಂಹನಿಗೆ ಕ್ಯಾನ್ಸರ್ ಬಂದಾಗ ರುಕ್ಮಿಣಿ ಅವನನ್ನು ಉಳಿಸಿಕೊಳ್ಳಲು ಹರಸಾಹಸ ಪಡುತ್ತಾಳೆ ಎಂಬುದು ಚಿತ್ರದ ಕಥೆ. ನರಸಿಂಹ-ರುಕ್ಮಿಣಿ ಪಾತ್ರದಲ್ಲಿ ಅನಂತನಾಗ್-ಲಕ್ಷ್ಮಿ ಗಮನ ಸೆಳೆದರು.

ತರಾಸುರವರ 'ಚಂದನದ ಗೊಂಬೆ' ಕಾದಂಬರಿಯನ್ನು ಚಿತ್ರವನ್ನಾಗಿ ಮಾಡಿದ ಬಿ ದೊರೈರಾಜ್ ಮತ್ತೆ ಅನಂತನಾಗ್ ಮತ್ತು ಲಕ್ಷ್ಮಿಯನ್ನು ಮುಖ್ಯ ಪಾತ್ರಧಾರಿಗಳನ್ನಾಗಿ ಮಾಡಿದರು. ಒಬ್ಬ ಶಾಲಾ ಶಿಕ್ಷಕ ಕಷ್ಟಪಟ್ಟು ತನ್ನ ಮಗಳು ರತ್ನಾಳನ್ನು ಶ್ರೀಮಂತ ಯುವಕ ಸೀತಾರಾಮುವಿಗೆ ಕೊಟ್ಟು ಮದುವೆ ಮಾಡುತ್ತಾನೆ. ಆದರೆ ಸ್ವಲ್ಪ ಕಾಲದಲ್ಲಿಯೇ ಸೀತಾರಾಮು ಅಪಘಾತದಿಂದ ಮರಣ ಹೊಂದುತ್ತಾನೆ. ನಂತರ ಆ ಹಳ್ಳಿ ರಾಜಕೀಯದ ಮಧ್ಯೆ ರತ್ನ ತನ್ನನ್ನು ಮತ್ತು ತನ್ನ ಮಗುವನ್ನು ಹೇಗೆ ಕಾಪಾಡಿಕೊಳ್ಳುತ್ತಾಳೆ ಎಂಬುದು ಚಿತ್ರದ ಕಥೆ.

ಸಾಯಿಸುತೆಯವರ `ಇಬ್ಬನಿ ಕರಗಿತು' ಕಾದಂಬರಿ ಆಧಾರಿತ ಚಿತ್ರವನ್ನು ಕೆ.ವಿ ಜಯರಾಮ್ ನಿರ್ದೇಶನ ಮಾಡಿದ್ದರು. ಅನಂತನಾಗ್ ಮತ್ತು ಲಕ್ಷ್ಮಿ ಸಿನಿ ಜೀವನದ ಅತ್ಯುತ್ತಮ ಚಿತ್ರಗಳಲ್ಲೊಂದಾದ ಈ ಚಿತ್ರದ ಎಲ್ಲಾ ಗೀತೆಗಳು ತುಂಬಾ ಜನಪ್ರಿಯವಾಗಿದ್ದವು. ಇದೇ ಚಿತ್ರದಲ್ಲಿ ಚಿಕ್ಕ ಪಾತ್ರದ ಮೂಲಕ ಜಗ್ಗೇಶ್ ಚಂದನವನದಲ್ಲಿ ಸಿನಿ ಜೀವನ ಆರಂಭಿಸಿದರು.

ಚಿತ್ರಲೇಖಾರ ಕಾದಂಬರಿ ಆಧಾರಿತ `ಮುದುಡಿದ ತಾವರೆ ಅರಳಿತು' ಚಿತ್ರದಲ್ಲಿ ಕೆ.ವಿ ಜಯರಾಮ್ ಮತ್ತೆ ಅನಂತನಾಗ್-ಲಕ್ಷ್ಮಿ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದರು. ಅನಂತ್-ಲಕ್ಷ್ಮಿಯ ಅತ್ಯುತ್ತಮ ಚಿತ್ರಗಳಲ್ಲಿ ಒಂದಾದ ಈ ಚಿತ್ರದ ಗೀತೆಗಳು ಕನ್ನಡ ಕೇಳುಗರ ಮನಸ್ಸನ್ನು ಗೆದ್ದಿದ್ದವು.

ಟಿ.ಎಸ್. ನಾಗಾಭರಣ ನಿರ್ದೇಶನದಲ್ಲಿ ಮೂಡಿಬಂದಿದ್ದ `ಮಕ್ಕಳಿರಲವ್ವ ಮನೆ ತುಂಬ' ಚಿತ್ರದಲ್ಲಿ ಅನಂತನಾಗ್ ಮತ್ತು ಲಕ್ಷ್ಮಿ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದರೆ, ಶಂಕರನಾಗ್, ಗಾಯತ್ರಿ ಮತ್ತು ರಮೇಶ್ ಭಟ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ದಂಪತಿಗಳಿಗೆ ಮಕ್ಕಳಾಗದಿದ್ದಾಗ ಅನುಭವಿಸುವ ಸಾಮಾಜಿಕ ಸಂಕಷ್ಟಗಳನ್ನು ಚಿತ್ರ ಮನೋಘ್ನವಾಗಿ ಚಿತ್ರಿಸಿತು.

ವಿಜಯ್ ನಿರ್ದೇಶನದಲ್ಲಿ ಮೂಡಿಬಂದ `ನಾ ನಿನ್ನ ಬಿಡಲಾರೆ' ಕನ್ನಡದ ಅತ್ಯುತ್ತಮ ಹಾರರ್ ಚಿತ್ರಗಳಲ್ಲೊಂದು. ಕನ್ನಡದಲ್ಲಿ ಯಶಸ್ವಿಯಾದ ಈ ಚಿತ್ರವನ್ನು ಹಿಂದಿಯಲ್ಲಿ ಮಂಗಳಸೂತ್ರ ಹೆಸರಿನಲ್ಲಿ ರಿಮೇಕ್ ಮಾಡಲಾಯಿತು. ಹಿಂದಿಯಲ್ಲಿ ಅನಂತನಾಗ್ ಗೆ ರೇಖಾ ನಾಯಕಿಯಾಗಿ ನಟಿಸಿದ್ದರು. ಅನಂತನಾಗ್-ಲಕ್ಷ್ಮಿ ಜೋಡಿಯ ಮೊದಲ ಚಿತ್ರ.

ತರಾಸು ಕಾದಂಬರಿ ಆಧಾರಿತ `ಬಿಡುಗಡೆಯ ಬೇಡಿ' ಚಿತ್ರವನ್ನು ದೊರೈ-ಭಗವಾನ್ ನಿರ್ದೇಶನ ಮಾಡಿದ್ದರು. ಈ ಚಿತ್ರ ಬಾಕ್ಸಾಫೀಸಿನಲ್ಲಿ ಯಶಸ್ಸು ಪಡೆಯದಿದ್ದರೂ ಲಕ್ಷ್ಮಿ ಅಭಿನಯಕ್ಕೆ ಅಪಾರ ಮೆಚ್ಚುಗೆ ಪಡೆಯಿತು. ಆರ್.ಎನ್.ಜಯಗೋಪಾಲ್ ಸಾಹಿತ್ಯದಲ್ಲಿ ಮೂಡಿಬಂದ ಗೀತೆಗಳಿಗೆ ರಾಜನ್-ನಾಗೇಂದ್ರ ಸಂಗೀತ ನೀಡಿದ್ದರು. 

ಬಿ ಮಲ್ಲೇಶ್ ನಿರ್ದೇಶನದಲ್ಲಿ ಮೂಡಿಬಂದ `ಒಲವು ಮೂಡಿದಾಗ' ಚಿತ್ರದಲ್ಲಿ ಅನಂತನಾಗ್-ಲಕ್ಷ್ಮಿ ಜೊತೆ ರಾಮಕೃಷ್ಣ ಮತ್ತು ಲೀಲಾವತಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು. ಚಿತ್ರದ ಸಂಭಾಷಣೆ ಮತ್ತು ಸಾಹಿತ್ಯವನ್ನು ಚಿ. ಉದಯಶಂಕರ್ ಬರೆದಿದ್ದರು.