ಪಾರ್ವತಮ್ಮ ರಾಜ್‌ಕುಮಾರ್ ಕುರಿತು ನೀವು ತಿಳಿದುಕೊಳ್ಳಲೇಬೇಕಾದ ಆಸಕ್ತಿಕರ ವಿಷಯಗಳು ಇಲ್ಲಿವೆ.

ಪಾರ್ವತಮ್ಮ 1939ರಲ್ಲಿ ಮೈಸೂರಿನ ಸಾಲಿಗ್ರಾಮ ಎಂಬಲ್ಲಿ ಅಪ್ಪಾಜಿ ಗೌಡ ಹಾಗೂ ಲಕ್ಷ್ಮಮ್ಮ ಮಗಳಾಗಿ ಜನಿಸಿದರು. 1953ರ ಜೂನ್ 25ರಂದು ತಮ್ಮ ತಂದೆ ರಾಜ್‌ಕುಮಾರ್ ಅವರ ತಂದೆ ಸಿಂಗಾನಲ್ಲೂರು ಪುಟ್ಟಸ್ವಾಮಿಯವರಿಗೆ ಕೊಟ್ಟ ಮಾತಿನಂತೆ 13ನೇ ವಯಸ್ಸಿನಲ್ಲಿ  ಡಾ.ರಾಜ್‌ಕುಮಾರ್ ಅವರನ್ನು ಮದುವೆಯಾದರು. ಆಗ ರಾಜ್‌ಕುಮಾರ್ ಅವರಿಗೆ 24 ವರ್ಷವಾಗಿತ್ತು. ಅಂದಿನಿಂದ ಡಾ.ರಾಜ್ ಮತ್ತು ಕುಟುಂಬದ ಬೆನ್ನೆಲುಬಾಗಿ ನಿಲ್ಲುತ್ತಾರೆ.

ಪಾರ್ವತಮ್ಮ ಕನ್ನಡ ಚಿತ್ರರಂಗದ ಖ್ಯಾತ ನಿರ್ಮಾಪಕರಲ್ಲಿ ಒಬ್ಬರು. ಈವರೆಗೂ 80ಕ್ಕೂ ಹೆಚ್ಚು ಸಿನಿಮಾಗಳನ್ನು ನಿರ್ಮಿಸಿದ್ದಾರೆ. ಈ ಪೈಕಿ ಆನಂದ್, ಓಂ, ಜನುಮದ ಜೋಡಿ, ಕವಿರತ್ನ ಕಾಳಿದಾಸ, ಹಾಲು ಜೇನು ಸೇರಿದಂತೆ ಅನೇಕ ಸಿನಿಮಾಗಳು ಸೇರಿವೆ. 

ಪಾರ್ವತಮ್ಮ ರಾಜ್‌ಕುಮಾರ್ ಅವರು ವಿದ್ಯಾಭ್ಯಾಸಕ್ಕೆ ಹೆಚ್ಚಿನ ಒತ್ತು ನೀಡುತ್ತಿದ್ದರು. ಗಣಿತ ಅವರ ನೆಚ್ಚಿನ ವಿಷಯವಾಗಿತ್ತು. ಇದರಿಂದಾಗಿಯೇ ಅವರು ಸಿನಿಮಾದ ನಿರ್ಮಾಣದ ಹಣಕಾಸಿನ ವಿಚಾರದಲ್ಲಿ ಬಲವಾದ ಹಿಡಿತ ಸಾಧಿಸಲು ಸಾಧ್ಯವಾಗಿತ್ತು.  

ಪಾರ್ವತಮ್ಮ ನಿರ್ಮಾಣದ ಶಂಕರ್ ಗುರು, ಅನುರಾಗ ಅರಳಿತು, ಜೀವನ ಜೈತ್ರ, ಜನುಮದ ಜೋಡಿ ಹಾಗೂ ನಂಜುಂಡಿ ಕಲ್ಯಾಣ ಸಿನಿಮಾಗಳು ಚಿತ್ರಮಂದಿರಗಳಲ್ಲಿ ಒಂದು ವರ್ಷ ಪ್ರದರ್ಶನ ಕಂಡಿವೆ. ಅವರ ನಿರ್ಮಾಣದ 16 ಸಿನಿಮಾಗಳು 25 ವಾರ ಪ್ರದರ್ಶನ ಕಂಡರೆ, 33 ಸಿನಿಮಾಗಳು 100 ದಿನಗಳು ಹಾಗೂ 19 ಸಿನಿಮಾಗಳು 50 ದಿನ ಪ್ರದರ್ಶನ ಕಂಡಿವೆ.  

ರಾಜ್‌ಕುಮಾರ್ ಅವರು ಮೊದಲೆಲ್ಲ ಬೇರೆ  ನಿರ್ಮಾಪಕರ ಸಿನಿಮಾಗಳಿಗೆ ಕೆಲಸ ಮಾಡುತ್ತಿದ್ದರು. ಆದರೆ, ಯಾವಾಗ ಸಿನಿಮಾಗಳು ಸೋಲುತ್ತಿವೆ ಎಂದು ಪಾರ್ವತಮ್ಮ ಮುಂದೆ ನಿರ್ಮಾಪಕರು ಹೇಳಿದರೋ ಆಗ ಪಾರ್ವತಮ್ಮ ತಮ್ಮದೇ ನಿರ್ಮಾಣ ಸಂಸ್ಥೆ ಮಾಡುವ ನಿರ್ಧಾರಕ್ಕೆ ಬಂದರು. ಅದರಂತೆ ವಜ್ರೇಶ್ವರಿ ಕಂಬೈನ್ಸ್ ಮತ್ತು ಪೂರ್ಣಿಮಾ ಎಂಟರ್‌ಪ್ರೈಸಸ್ ಹುಟ್ಟುಹಾಕಿದರು. ರಾಜ್ ಕುಟುಂಬದ ಸಂಸ್ಥೆಯಿಂದ ನಿರ್ಮಾಣಗೊಂಡ ಮೊದಲ ಸಿನಿಮಾ ತ್ರಿಮೂರ್ತಿ. ಈ ಸಿನಿಮಾ ಹಿಟ್ ಆಯಿತು. ಅಂದಿನಿಂದ ರಾಜ್ ಕುಟುಂಬದ ಸಿನಿಮಾಗಳು ಈ ಸಂಸ್ಥೆಯಿಂದಲೇ ನಿರ್ಮಾಣಗೊಂಡವು. 

ಪಾರ್ವತಮ್ಮ ರಾಜ್‌ಕುಮಾರ್ ಅವರಿಗೆ ಕರ್ನಾಟಕ ಸರ್ಕಾರದಿಂದ ಫಾಲ್ಕೆ ಅಕಾಡೆಮಿ ಪ್ರಶಸ್ತಿ, ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಮತ್ತು ಜೀವಮಾನ ಸಾಧನೆ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ. ಕನ್ನಡ ಸಂಸ್ಕೃತಿ ಮತ್ತು ಪರಂಪರೆಗೆ ಧಕ್ಕೆಯುಂಟಾದಾಗ ಪಾರ್ವತಮ್ಮ ಯಾವಾಗಲೂ ಧ್ವನಿ ಎತ್ತುತ್ತಿದ್ದರು.

ಕನ್ನಡ ಚಿತ್ರರಂಗಕ್ಕೆ ದೊಡ್ಡ-ದೊಡ್ಡ ನಟಿಯರನ್ನು ಪರಿಚಯಿಸಿದ ಹೆಗ್ಗಳಿಕೆ ಪಾರ್ವತಮ್ಮ ಅವರಿಗೆ ಸಲ್ಲುತ್ತದೆ. ಮಾಲಾಶ್ರೀ, ಪ್ರೇಮಾ, ಸುಮಲತಾ, ಅನುಪ್ರಭಾಕರ್, ಸುಧಾರಾಣಿ, ರಕ್ಷಿತ, ರಮ್ಯಾ ಸೇರಿದಂತೆ ಹಲವಾರು ನಟ-ನಟಿಯರನ್ನು ಪಾರ್ವತಮ್ಮ ಚಿತ್ರರಂಗಕ್ಕೆ ಪರಿಚಯಿಸಿದ್ದಾರೆ.  

ಪಾರ್ವತಮ್ಮ ಅವರು ರಾಜ್‌ಕುಮಾರ್ ರೀತಿಯೇ ಮಕ್ಕಳ ವಿಷಯದಲ್ಲೂ ಒಳ್ಳೊಳ್ಳೆಯ ಕಥೆಗಳನ್ನು ಆಯ್ಕೆ ಮಾಡುತ್ತಿದ್ದರು. ಶಿವಣ್ಣ ಅವರಿಗೆ ಆನಂದ್, ಓಂ, ಜನುಮದ ಜೋಡಿ ಸಿನಿಮಗಳನ್ನು ಮಾಡಿದರು. ರಾಘವೇಂದ್ರ ರಾಜ್ ಕುಮಾರ್ ಅವರಿಗೆ ನಂಜುಡಿ ಕಲ್ಯಾಣದಂತಹ ಸಿನಿಮಾ ಮಾಡಿದರು. ಪ್ರೀತಿಯ ಅಪ್ಪುಗಾಗಿ ಅಪ್ಪು, ಅಭಿ, ಹುಡುಗರು ಇಂತಹ ಸಿನಿಮಗಳು ಬಂದವು. ಹೀಗೆ ಪಾರ್ವತಮ್ಮ ತಮ್ಮ ಕುಟುಂಬದ ಬೆಳವಣಿಗೆಗೆ ಸದಾ ಬೆನ್ನೆಲುಬಾಗಿದ್ದರು.  

ಪಾರ್ವತಮ್ಮ ಅವರ ತಂದೆ ಅಪ್ಪಾಜಿಗೌಡ ಅವರು ಸಂಗೀತ ಶಿಕ್ಷಕರಾಗಿದ್ದರು. ಮೂಲಗಳ ಪ್ರಕಾರ ಡಾ.ರಾಜ್‌ಕುಮಾರ್ ಅವರಿಗೂ ಅಪ್ಪಾಜಿಗೌಡ ಅವರೇ ಸಂಗೀತ ಕಳಿಲಿಸಿದ್ದು.  ರಾಜ್‌ಕುಮಾರ್ ಅವರಿಗೆ ಉತ್ತಮ ಕಂಠ ಹಾಗೂ ಆಸಕ್ತಿ ಇದ್ದಿದ್ದರಿಂದ ಬೇಗ ಕಲಿತರು.