ಬಟ್ಟೆಗಳಿಗಾಗಿ ಸಾಲ ಮಾಡಿರುವ ಬಿಗ್‌ಬಾಸ್‌ ವಿನ್ನರ್: ಇದು ಕಾರ್ತಿಕ್ ಮಹೇಶ್ ತೆರೆಹಿಂದಿನ ಲೈಫ್ ಸ್ಟೋರಿ

ಬಿಗ್‌ಬಾಸ್ ಕನ್ನಡ ಸೀಸನ್ 10ರ ಗ್ರ್ಯಾಂಡ್ ಫಿನಾಲೆಗೂ ಮುನ್ನ ಕಾರ್ತಿಕ್ ಕುರಿತಾಗಿ ಸೋಶಿಯಲ್ ಮೀಡಿಯಾದಲ್ಲಿ 'ಬಡವರ ಮಕ್ಕಳು ಬೆಳೀಬೇಕು ಕಣ್ರಯ್ಯ' ಟ್ರೆಂಡ್ ಆಗಿತ್ತು. ಮಿಡಲ್ ಕ್ಲಾಸ್ ಕುಟುಂಬದ ಕಾರ್ತಿಕ್ ಟ್ರೋಫಿ ಗೆಲ್ಲಬೇಕು ಅಂತ ಹಲವರು ಬಯಸಿದ್ದರು. ತಾಯಿಗಾಗಿ ಸ್ವಂತ ಮನೆ ಕಟ್ಟಿಸಬೇಕೆಂಬ ಆಸೆ ಹೊಂದಿದ್ದ ಕಾರ್ತಿಕ್ ಹಲವರು ಮಿಡಲ್ ಕ್ಲಾಸ್ ಹುಡುಗರಿಗೆ ಇಷ್ಟವಾಗಿದ್ರು.  

ನಟ-ನಟಿಯರು ಅಂದ್ಮೇಲೆ ಒಳ್ಳೊಳ್ಳೆ ಬಟ್ಟೆ ಧರಿಸಬೇಕು, ಪ್ರೇಕ್ಷಕರ ಮುಂದೆ ಚೆನ್ನಾಗಿ ಕಾಣಿಸಿಕೊಳ್ಳಬೇಕು. ಸೀರಿಯಲ್‌ಗಳಲ್ಲೂ ತಮ್ಮ ಪಾತ್ರಗಳಿಗೆ ಅನುಗುಣವಾಗಿ ಸ್ವಂತ ಬಟ್ಟೆ ಧರಿಸಬೇಕು. ಕಾರ್ತಿಕ್ ಸೀರಿಯಲ್ ಹಾಗೂ ಬಿಗ್‌ಬಾಸ್‌ ಮನೆ ಎರಡರಲ್ಲೂ ಸ್ಟೈಲಿಶ್ ಆಗಿ ಕಾಣಿಸಿಕೊಂಡಿದ್ದರು. ಆದರೆ, ಆ ಸ್ಟೈಲ್‌ ಹಿಂದೆಯೂ ಒಂದು ಒದ್ದಾಟವಿದೆ. ಬಿಗ್‌ಬಾಸ್‌ ರಿಯಾಲಿಟಿ ಶೋನಲ್ಲಿ ಧರಿಸಲು ಬಟ್ಟೆಗಳಿಗಾಗಿ ಕಾರ್ತಿಕ್ ಸಾಲ ಮಾಡಿಕೊಂಡಿದ್ದರು. ಸಂಬಂಧಿಕರೇ ಅವರಿಗೆ ಸಾಲ ಕೊಟ್ಟಿದ್ದರಂತೆ. ಬಟ್ಟೆಗಳಿಗಾಗಿ ನಾನು ಸಾಲ ಮಾಡಿಕೊಂಡಿದ್ದೇನೆ. ಫ್ಯಾಮಿಲಿಯವರು ಸಾಲ ಕೊಟ್ಟಿದ್ದಾರೆ. ಅದನ್ನು ತೀರಿಸಬೇಕಿದೆ ಅಂತ ಕಾರ್ತಿಕ್ ಸಂದರ್ಶನಗಳಲ್ಲಿ ಹೇಳಿಕೊಂಡಿದ್ದಾರೆ.

ಕಾರ್ತಿಕ್ ಬೆಂಗಳೂರಿನಲ್ಲಿ ಬಾಡಿಗೆ ಮನೆಯಲ್ಲಿದ್ದು, ಮೂರು ತಿಂಗಳಿನಿಂದ ಬಾಡಿಗೆ ಕಟ್ಟಿಲ್ಲ. ಬಿಗ್‌ಬಾಸ್‌ ಮನೆಯೊಳಗೆ ಕಾಲಿಟ್ಟಾಗಿನಿಂದ ಓನರ್‌ಗೆ ಬಾಡಿಗೆ ಕೊಡಲು ಸಾಧ್ಯವಾಗಿಲ್ಲ. ಕಾರ್ತಿಕ್ ಮತ್ತು ಫ್ಯಾಮಿಲಿಯ ಪರಿಸ್ಥಿತಿ ಅರಿತು ಮಾಲೀಕರು ಕೂಡ ಸಫೋರ್ಟ್‌ ಮಾಡುತ್ತಿದ್ದಾರೆ. ಕಳೆದ ಆರೆಳು ತಿಂಗಳಿನಿಂದ ಬಾಡಿಗೆ ಮನೆಯಲ್ಲಿರುವ ಕಾರ್ತಿಕ್, ಅಡ್ವಾನ್ಸ್ ಹಣವನ್ನು ಒಮ್ಮೆಲೆ ಕೊಡಲಾಗದೇ ಇನ್‌ಸ್ಟಾಲ್‌ಮೆಂಟ್‌ನಲ್ಲಿ ನೀಡಿದ್ದರಂತೆ. 

ಫಿನಾಲೆ ವೀಕ್‌ನಲ್ಲಿ ಕಾರ್ತಿಕ್ ತಮ್ಮ ತಂಗಿಯೊಂದಿಗೆ ಮಾತನಾಡಬೇಕೆಂಬ ಆಸೆ ವ್ಯಕ್ತಪಡಿಸಿದ್ದರು. ಅದರಂತೆ ಬಿಗ್‌ಬಾಸ್‌ ಕಾರ್ತಿಕ್ ತಂಗಿ ತೇಜಸ್ವಿನಿ ಅವರಿಂದ ವಿಡಿಯೋ ಕಾಲ್ ಮಾಡಿಸಿದ್ದರು. ಈ ಪೋಟೋ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಅಂದ್ಹಾಗೆ ಕಾರ್ತಿಕ್ ತಂಗಿ ಸದ್ಯ ಚಾಮರಾಜನಗರದ ಹಳ್ಳಿಯೊಂದರಲ್ಲಿರುವ ಅವರ ತಾಯಿಯ ತವರು ಮನೆಯಲ್ಲಿದ್ದಾರೆ. ಮೀನಾಕ್ಷಿಯವರು ತಮ್ಮ ಮಗಳಿಗೆ ತಮ್ಮ ತವರು ಮನೆಯಲ್ಲಿ ಬಾಣಂತನ ಮಾಡುತ್ತಿದ್ದಾರೆ.  

ತಮ್ಮ ಬಗ್ಗೆ ಸಂದರ್ಶನಗಳಲ್ಲಿ ಮಾತನಾಡಿರುವ ಕಾರ್ತಿಕ್, ನಾನು ಮಿಡಲ್ ಕ್ಲಾಸ್ ಹುಡುಗ. ನಾನು ಬಡವ ಅಲ್ಲ, ಎಂಟು ಕೋಟಿ ಕನ್ನಡಿಗರ ಪ್ರೀತಿ ಸಿಕ್ಕಿದೆ. ಕನ್ನಡಿಗರು ತೋರಿರುವ ಪ್ರೀತಿಯಲ್ಲಿ ನಾನು ಶ್ರೀಮಂತ ಅಂತ ಬಹಳ ಖುಷಿಯಿಂದ ಹೇಳಿಕೊಳ್ಳುತ್ತಿದ್ದಾರೆ. 

ಕಾರ್ತಿಕ್ ಬಿಗ್‌ಬಾಸ್‌ ಕನ್ನಡ ಸೀಸನ್ 10ಕ್ಕೆ  ಅಸಮರ್ಥರಾಗಿ ಎಂಟ್ರಿಕೊಟ್ಟಿದ್ದರು. ನಂತರದಲ್ಲಿ ಪ್ರಬಲ ಸ್ಪರ್ಧಿಯಾಗಿ ಗುರುತಿಸಿಕೊಂಡಿದ್ದ ಅವರು, ಇದೀಗ ಬಿಗ್‌ಬಾಸ್‌ ಸೀಸನ್ 10ರ ಟ್ರೋಫಿ ಮುಡಿಗೇರಿಸಿಕೊಂಡಿದ್ದಾರೆ. ಕಾರ್ತಿಕ್‌ಗೆ 50 ಲಕ್ಷ ರೂಪಾಯಿ ಹಣದ ಜೊತೆಗೆ ಮಾರುತಿ ಸುಜುಕಿ ಬ್ರೆಜಾ ಕಾರು ಹಾಗೂ ಎಲೆಕ್ಟ್ರಿಕ್ ಸ್ಕೂಟರ್ ಸಿಕ್ಕಿದೆ.