2024ರಲ್ಲಿ ಹೊಸದಾಗಿ ಶುರುವಾಗಿ ಪ್ರೇಕ್ಷಕರ ಮನಗೆದ್ದ ಕನ್ನಡ ಧಾರಾವಾಹಿಗಳಿವು!

2024ರ ಸೆಪ್ಟಂಬರ್ 9ರಂದು ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾದ 'ದೃಷ್ಟಿಬೊಟ್ಟು' ಎಂಬ ಸೀರಿಯಲ್ ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ಈ ಧಾರಾವಾಹಿಯಲ್ಲಿ ಅಗ್ನಿಸಾಕ್ಷಿ ಮೂಲಕ ಪ್ರೇಕ್ಷಕರ ಮನಗೆದ್ದಿದ್ದ ವಿಜಯ್ ಸೂರ್ಯ ನಾಯಕನಾಗಿ ನಟಿಸಿದ್ದು, ನಾಯಕಿಯ ಪಾತ್ರದಲ್ಲಿ ಅರ್ಪಿತಾ ಮೋಹಿತೆ ಕಾಣಿಸಿಕೊಂಡಿದ್ದಾರೆ.  ಉಳಿದಂತೆ ಹಿರಿಯ ನಟಿ ಅಂಬಿಕಾ, ದೀಪಶ್ರೀ, ರಾಘು ಶಿವಮೊಗ್ಗ, ಅಶೋಕ್ ಹೆಗ್ಡೆ ಮುಂತಾದವರು ತಾರಾಗಣದಲ್ಲಿದ್ದಾರೆ. ರೂಪವೇ ಶಾಪವಾದ ಹುಡುಗಿಯೊಬ್ಬಳ ಕಥೆಯನ್ನು ಈ ಧಾರಾವಾಹಿಯಲ್ಲಿ ಮನೆಮುಟ್ಟುವಂತೆ ಹೇಳಲಾಗಿದೆ. ವಿಜಯ್ ಸೂರ್ಯ ರಗಡ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. 

2024ರ ಜನವರಿ 16ರಿಂದ  ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಬಹುತಾರಾಗಣವಿರುವ 'ಲಕ್ಷ್ಮೀ ನಿವಾಸ' ಧಾರಾವಾಹಿ ವಿಭಿನ್ನ ಕಥೆಯ ಮೂಲಕ ವೀಕ್ಷಕರ ಗಮನ ಸೆಳೆಯುತ್ತಿದೆ. ನಿರ್ದೇಶಕರು ಈ ಧಾರಾವಾಹಿಯಲ್ಲಿ ಮಿಡಲ್ ಕ್ಲಾಸ್ ಜೀವನವನ್ನು ಅದ್ಭುತವಾಗಿ ತೋರಿಸುವ ಪ್ರಯತ್ನ ಮಾಡಿದ್ದು, ಪ್ರತಿಯೊಂದು ಪಾತ್ರಗಳಿಗೂ ಅದರದ್ದೇಯಾದ ಮಹತ್ವ ನೀಡಿದ್ದಾರೆ. ಈ ಸೀರಿಯಲ್‌ನಲ್ಲಿ ಸ್ಯಾಂಡಲ್‌ವುಡ್ ಹಿರಿಯ ನಟಿ ಶ್ವೇತಾ, ದೀಪಕ್ ಸುಬ್ರಮಣ್ಯ, ಚಂದನಾ ಅನಂತಕೃಷ್ಣ, ಅಜಯ್ ರಾಜ್‌, ದಿಶಾ ಮದನ್, ಧನಂಜಯ್, ಮಧು ಹೆಗಡೆ,  ಲಕ್ಷ್ಮೀ ಹೆಗಡೆ ಮುಂತಾದವರು ನಟಿಸಿದ್ದು, ಟಿಆರ್‌ಪಿ ರೇಸಿಂಗ್‌ನಲ್ಲೂ ಮುಂದಿದೆ. 

ಜೀ ಕನ್ನಡ ವಾಹಿನಿಯಲ್ಲಿ 2024ರ ಆಗಸ್ಟ್ 12ರಿಂದ 'ಅಣ್ಣಯ್ಯ' ಎಂಬ ಸೀರಿಯಲ್ ಪ್ರಸಾರವಾಗ್ತಿದೆ. ಇದರಲ್ಲಿ ಗಟ್ಟಿಮೇಳ ಸೀರಿಯಲ್‌ನಲ್ಲಿ ರೌಡಿ ಬೇಬಿ ಅಂತಲೇ ಸಿಕ್ಕಾಪಟ್ಟೆ ಖ್ಯಾತಿ ಗಳಿಸಿದ್ದ ನಿಶಾ ರವಿಕೃಷ್ಣನ್ ನಾಯಕಿಯಾಗಿ ನಟಿಸಿದ್ದರೆ, ವಿಕಾಸ್ ಉತ್ತಯ್ಯ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ.  ಉಳಿದಂತೆ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಸೂಪರ್ ಹಿಟ್ ಸಿನಿಮಾ ಕಾಟೇರದಲ್ಲಿ ಆರಾಧಾನಾ ರಾಮ್ ಅವರ ಬಾಲ್ಯದ ವರ್ಷನ್‌ನಲ್ಲಿ ಕಾಣಿಕೊಂಡಿದ್ದ ಅಂಕಿತಾ ಗೌಡ, ವೈಶಂಪಾಯನ ತೀರ ಮತ್ತು ಜಲಪಾತ ಸಿನಿಮಾಗಳಲ್ಲಿ ಅಭಿನಯಿಸಿರುವ ನಾಗಶ್ರೀ ಬೇಗಾರ್,  ಪ್ರತೀಕ್ಷಾ ಶ್ರೀನಾಥ್ ಹಾಗೂ ಪ್ರಾಯಶಃ ಚಿತ್ರದಲ್ಲಿ ಅಭಿನಯಿಸಿರುವ ರಾಘವಿ ನಾಯಕನ ಮುದ್ದಿaನ ತಂಗಿಯರಾಗಿ ಕಾಣಿಸಿಕೊಂಡಿದ್ದಾರೆ. ಈ ಧಾರಾವಾಹಿಯಲ್ಲಿ ಅಣ್ಣ-ತಂಗಿಯರ ಬಾಂಧವ್ಯದ ಕಥೆ ಹೆಣೆಯಲಾಗಿದೆ. 

2024ರ ಜನವರಿ 29ರಿಂದ ಕಲರ್ಸ್ ಕನ್ನಡ ವಾಹಿನಿಯಲ್ಲಿ 'ಶ್ರೀಗೌರಿ' ಎಂಬ ಧಾರಾವಾಹಿ ಪ್ರಸಾರವಾಗುತ್ತಿದೆ. ಇದರಲ್ಲಿ 'ಕಮಲಿ' ಸೀರಿಯಲ್ ಮೂಲಕ ಕನ್ನಡಿಗರಿಗೆ ಹತ್ತಿರವಾಗಿದ್ದ ಅಮೂಲ್ಯ ಗೌಡ ನಾಯಕಿಯಾಗಿ ಹಾಗೂ ಯಶೋಧೆ ಖ್ಯಾತಿಯ ಕಾರ್ತಿಕ್ ಅತ್ತಾವರ್ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಸುನೀಲ್ ಪುರಾಣಿಕ್, ನಂದಿನಿ ಗೌಡ, ಗಾಯಿತ್ರಿ ಪ್ರಭಾಕರ್, ಸಂಜಯ್ ಸೂರಿ, ರಾಜೇಶ್ ಧ್ರುವಾ ಮುಂತಾದವರು ತಾರಾಗಣದಲ್ಲಿದ್ದಾರೆ.  ಈ ಸೀರಿಯಲ್‌ನ ಕಥೆ ಹಾಗೂ ನಿರೂಪಣೆ ಎರಡೂ ವಿಭಿನ್ನವಾಗಿದ್ದು, ಕರ್ನಾಟಕ ಕರಾವಳಿ ಭಾಗದಲ್ಲಿ ಚಿತ್ರೀಕರಣ ನಡೆದಿದೆ.

ಜೀ ಕನ್ನಡದಲ್ಲಿ 2024ರ ಜೂನ್ 17ರಿಂದ ಪ್ರಸಾರ ಕಂಡ 'ಬ್ರಹ್ಮಗಂಟು' ಧಾರಾವಾಹಿ ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದೆ. ಅಕ್ಕ-ತಂಗಿಯ ಕಥೆ ಹೊಂದಿರುವ ಈ ಧಾರಾವಾಹಿಯಲ್ಲಿ ಅಕ್ಕ ತುಂಬಾ ಚೆಂದ, ತಂಗಿ ಒಂಚೂರು ಕಪ್ಪು. ಚಿಕ್ಕಂದಿನಿಂದ ಒಂದಷ್ಟು ತಾರತಮ್ಯದ ಜೊತೆಗೆ ಇಬ್ಬರು ದೊಡ್ಡವರಾಗುತ್ತಾರೆ. ಅಕ್ಕನಿಗೆ ತಂಗಿ ಕಂಡರೆ ಅಷ್ಟಕಷ್ಟೇ. ಆದರೆ, ತಂಗಿಗೆ ಅಕ್ಕ ಅಂದರೆ ಬಹಳ ಇಷ್ಟ. ತಂಗಿ ಚಿಕ್ಕಂದಿನಿಂದಲೂ ಅಕ್ಕ ಮಾಡಿದ ತಪ್ಪುಗಳನ್ನೆಲ್ಲಾ ತನ್ನ ಮೇಲೆ ಹಾಕಿಕೊಳ್ಳುತ್ತಾ ಅಮ್ಮನಿಂದ ಪೆಟ್ಟು ತಿನ್ನುತ್ತಿರುತ್ತಾಳೆ. ಸದ್ಯ ಅಕ್ಕ ಮದುವೆಯಾಗಬೇಕಿದ್ದ ಹುಡುಗನ್ನನು ಮದುವೆಯಾಗಿರು ತಂಗಿ ದೀಪಾ, ಗಂಡನ ಮನೆಯಲ್ಲೂ ಸಾಕಷ್ಟು ಸಮಸ್ಯೆಗಳನ್ನು ಎದುರಿಸುತ್ತಿದ್ದಾಳೆ. ಕಿನ್ನರಿ ಸೀರಿಯಲ್‌ನಲ್ಲಿ ಐಶ್ವರ್ಯ ಪಾತ್ರದಲ್ಲಿ ಬಾಲನಟಿಯಾಗಿ ಕಾಣಿಸಿಕೊಂಡಿದ್ದ ದಿಯಾ ಪಾಲಕ್ಕಲ್ ಇದರಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ.