ಇವರೇ ನೋಡಿ ರಾಕಿಂಗ್ ಸ್ಟಾರ್‌ ಯಶ್ ಯಶಸ್ಸಿನ ಹಿಂದಿರುವ ನಿರ್ದೇಶಕರು!

Author Sowmya Bairappa | Updated: Monday, February 17, 2025, 09:51 AM [IST]

ಹಾಸನದಲ್ಲಿ ನವೀನ್‌ಕುಮಾರ್ ಗೌಡ ಆಗಿ ಹುಟ್ಟಿದ ಯಶ್, ಇಂದು ರಾಕಿಂಗ್ ಸ್ಟಾರ್ ಆಗಿ ಅಸಂಖ್ಯಾತ ಅಭಿಮಾನಿಗಳ ಆರಾಧ್ಯ ದೈವ ಎನಿಸಿಕೊಂಡಿದ್ದಾರೆ. KGF ರೀತಿಯ ಸೆನ್ಸೇಷನ್‌ ಸಿನಿಮಾದಿಂದ ದೇಶ ವಿದೇಶದಲ್ಲೂ ರಾಕಿ ಭಾಯ್ ಆಗಿ ಚಿರಪರಿಚಿತರಾಗಿದ್ದಾರೆ. ಕೇವಲ 18 ಸಿನಿಮಾಗಳಲ್ಲಿ ನಟಿಸಿ, ಸೂಪರ್ ಸ್ಟಾರ್ ಪಟ್ಟಕ್ಕೇರಿದ್ದಾರೆ. ಒಂದೇ ಒಂದು ಸಿನಿಮಾದಿಂದ ಇಡೀ ಭಾರತೀಯ ಚಿತ್ರರಂಗ ಮತ್ತೊಮ್ಮೆ ಸ್ಯಾಂಡಲ್‌ವುಡ್‌ನತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ. ಆದರೆ, ಯಶ್ ಒಂದೇ ದಿನದಲ್ಲಿ ಇಷ್ಟೆಲ್ಲಾ ಸಾಧಿಸಲು ಸಾಧ್ಯವಾಗಿಲ್ಲ. ರಾಕಿಭಾಯ್ ಯಶಸ್ಸಿನ ಹಿಂದೆ ಅವರ ಪರಿಶ್ರಮ, ಕನಸು ನನಸಾಗಿಸುವ ಮನಸ್ಸು, ಸಿನಿಮಾ ಮೇಲಿನ ಪ್ರೀತಿ ಎಷ್ಟು ಕಾರಣವೋ, ಅಷ್ಟೇ ನಿರ್ದೇಶಕರ ಪಾತ್ರ ಕೂಡ ಅನ್ನೋದನ್ನ ಅಲ್ಲಗಳೆಯುವಂತಿಲ್ಲ. ಯಶ್ ಮೊದಲ ಸಿನಿಮಾದಿಂದ ಕೆಜಿಎಫ್ ವರೆಗಿನ ಸಿನಿಮಾಗಳ ಯಶಸ್ಸಿನ ಹಿಂದೆ ಕೆಲವು ನಿರ್ದೇಶಕರ ಹೆಸರು ಎದ್ದು ಕಾಣುತ್ತದೆ. ಅಂತಹ ನಿರ್ದೇಶಕರ ಪಟ್ಟಿಯನ್ನು ಇಲ್ಲಿ ನೀಡಲಾಗಿದೆ.

Table of content

ಯಶ್ ಎನ್ನುವ ಉದಯೋನ್ಮುಖ ನಟನನ್ನು ಚಂದನವನಕ್ಕೆ ಪರಿಚಯಿಸಿದವರು ನಿರ್ದೇಶಕ ಶಶಾಂಕ್. ಧಾರಾವಾಹಿಗಳಲ್ಲಿ ನಟಿಸಿದ್ದ ಯಶ್ ಮೇಲೆ ನಂಬಿಕೆಯಿಟ್ಟು ಮೊಗ್ಗಿನ ಮನಸ್ಸು ಸಿನಿಮಾದಲ್ಲಿ ನಾಯಕನ ಪಾತ್ರ ಕೊಟ್ಟಿದ್ದರು. 2008ರಲ್ಲಿ ತೆರೆಕಂಡ ಈ ಸಿನಿಮಾ ಹೊಸ ಬಗೆಯ ನಿರೂಪಣೆ, ವಿಭಿನ್ನ ಪ್ರೇಮಕಥೆ, ಮನಸೆಳೆಯುವ ಹಾಡುಗಳ ಮೂಲಕ ಆ ವರ್ಷದ ಸೂಪರ್ ಹಿಟ್ ಸಿನಿಮಾವಾಯಿತು. ಲವರ್ ಬಾಯ್ ಆಗಿ ಕಾಣಿಸಿಕೊಂಡಿದ್ದ ಯಶ್‌ಗೆ ಈ ಸಿನಿಮಾ ಒಳ್ಳೆಯ ಹೆಸರು ತಂದು ಕೊಟ್ಟಿದ್ದು ಮಾತ್ರವಲ್ಲದೆ, ಕನ್ನಡ ಚಿತ್ರರಂಗದಲ್ಲಿ ನೆಲೆಯೂರಲು ಮೊದಲ ಮೆಟ್ಟಿಲಾಯಿತು. ಹಲವು ಅವಕಾಶಗಳ ಬಾಗಿಲು ತೆರೆಯಿತು.

ಮೊಗ್ಗಿನ ಮನಸ್ಸು ಸಿನಿಮಾದ ಬಳಿಕ ರಾಕಿ, ಕಳ್ಳರ ಸಂತೆ, ಮೊದಲ ಸಲ, ರಾಜಧಾನಿ, ಕಿರಾತಕ, ಲಕ್ಕಿ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ನಟಿಸಿದ ಯಶ್ ಚಿತ್ರರಂಗದಲ್ಲಿ ಪ್ಲಸ್ ಮೈನಸ್ ಎರಡನ್ನೂ ಅನುಭವಿಸಿದ್ದರು. ಆದ್ರೆ, ಹಲವು ಏರುಪೇರುಗಳ ಬಳಿಕ ತೆರೆಕಂಡ ಗೂಗ್ಲಿ ಸಿನಿಮಾ ರಾಕಿಂಗ್ ಸ್ಟಾರ್‌ಗೆ ಸ್ಯಾಂಡಲ್‌ವುಡ್‌ನಲ್ಲಿ ದೊಡ್ಡ ಬ್ರೇಕ್ ನೀಡಿತು. ಪವನ್ ಒಡೆಯರ್ ಎಸೆದ ಗೂಗ್ಲಿ ಹೊಸ ತಿರುವು ನೀಡಿತು. ನೂರು ದಿನ ಯಶಸ್ವಿಯಾಗಿ ಓಡಿದ ಈ ಸಿನಿಮಾ, ಇಂದಿಗೂ ಹಲವರ ಫೇವರಿಟ್ ಸಿನಿಮಾಗಳ ಪಟ್ಟಿಯಲ್ಲಿದೆ ಅನ್ನೋದು ಸುಳ್ಳಲ್ಲ. ಅಲ್ಲಿಂದ ಯಶ್ ತಿರುಗಿ ನೋಡಿದ್ದೇ ಇಲ್ಲ. ಅವರು ಸ್ಯಾಂಡಲ್‌ವುಡ್‌ನ ಭರವಸೆಯ ಹೀರೋ ಆಗಿ ನಿಂತಿದ್ದರು.

ಸಂತೋಷ್ ಆನಂದ್ ರಾಮ್ ನಿರ್ದೇಶನದ 'ಮಿಸ್ಟರ್‌ ಆ್ಯಂಡ್‌ ಮಿಸಸ್‌ ರಾಮಾಚಾರಿʼ ಸಿನಿಮಾದಲ್ಲಿ ಯಶ್ ಆ್ಯಕ್ಷನ್ ಹೀರೋ ಆಗಿ ಮಿಂಚಿದ್ದರು. ಈ ಸಿನಿಮಾ ಅವರಿಗೆ ಮಾಸ್ ಇಮೇಜ್ ತಂದುಕೊಟ್ಟಿತು. ನಿರ್ದೇಶಕ ಆನಂದ್ ರಾಮ್‌ಗೆ ಇದು ಚೊಚ್ಚಲ ಸಿನಿಮಾವಾದರೂ, ಅವರು ಚಿತ್ರವನ್ನು ಅಚ್ಚುಕಟ್ಟಾಗಿ ಕಟ್ಟಿಕೊಟ್ಟ ಬಗೆ, ಉತ್ತಮ ಕಥಾಹಂದರ ಫ್ಯಾಮಿಲಿ ಪ್ರೇಕ್ಷಕರನ್ನು ಸೆಳೆಯಿತು. ಈ ಸಿನಿಮಾದಲ್ಲಿ ಎರಡು ಶೇಡ್‌ ಇರುವ ಪಾತ್ರವನ್ನು ಯಶ್‌ ಚೆನ್ನಾಗಿ ನಿರ್ವಹಿಸಿದ್ದರು. ಚಿತ್ರದಲ್ಲಿ ವಿಷ್ಣುವರ್ಧನ್‌ ಅಭಿಮಾನಿಯಾಗಿ, ಆ್ಯಂಗ್ರಿ ಯಂಗ್‌ ಮ್ಯಾನ್‌ ಆಗಿ ಯಶ್‌ ಮಿಂಚಿದ್ದರು. ಈ ಸಿನಿಮಾವೂ ಹಲವು ಥಿಯೇಟರ್‌ಗಳಲ್ಲಿ ನೂರು ದಿನ ಪೂರೈಸಿತ್ತು.

ಸ್ಯಾಂಡಲ್‌ವುಡ್‌ ಸ್ಟಾರ್ ಆಗಿದ್ದ ಯಶ್ ಅವರನ್ನು ಭಾರತೀಯ ಸಿನಿಮಾರಂಗಕ್ಕೆ ಪರಿಚಯ ಮಾಡಿದ್ದು ಪ್ರಶಾಂತ್ ನೀಲ್. ಕೆಜಿಎಫ್ ಸಿನಿಮಾದಲ್ಲಿ ರಾಕಿಭಾಯ್ ಆಗಿ ಮಿಂಚಿದ ಯಶ್, ದೇಶ-ವಿದೇಶದಲ್ಲೂ ಜನಪ್ರಿಯತೆ ಪಡೆದುಕೊಂಡರು. ಶಾರುಖ್‌ ಖಾನ್‌ ನಟನೆಯ 'ಜೀರೋ' ಚಿತ್ರದ ಎದುರು ತೆರೆಕಂಡ 'ಕೆಜಿಎಫ್‌' ಗೆದ್ದು ಬೀಗಿದ್ದು ಸಾಮಾನ್ಯ ವಿಷಯವಲ್ಲ. ಅಷ್ಟೇ ಅಲ್ಲ, ಇದು ಯಶ್ ವೃತ್ತಿಜೀವನದ ದಿಕ್ಕನ್ನೇ ಬದಲಿಸಿತು. ಕನ್ನಡ ಚಿತ್ರರಂಗಕ್ಕೆ ಸೀಮಿತವಾಗಿದ್ದ ಯಶ್ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಬೆಳೆಯುವಲ್ಲಿ ನಿರ್ದೇಶಕ ಪ್ರಶಾಂತ್ ನೀಲ್ ಕೊಡುಗೆ ಸಾಕಷ್ಟಿದೆ.

ಯೋಗರಾಜ್‌ ಭಟ್‌, ಗುರು ದೇಶಪಾಂಡೆ, ಕೃಷ್ಣ ಅವರನ್ನು ಮರೆಯುವಂತಿಲ್ಲ

ಯಶ್‌ ಸಿನಿಮಾಗಳ ಸಕ್ಸಸ್‌ ಹಿಂದೆ ನಿರ್ದೇಶಕರಾದ ಯೋಗರಾಜ್‌ ಭಟ್‌, ಗುರು ದೇಶಪಾಂಡೆ, ಕೃಷ್ಣ ಅವರ ಪಾಲು ಕೂಡ ಇದೆ. ಗುರು ದೇಶಪಾಂಡೆ ನಿರ್ದೇಶನದ ಹಳ್ಳಿ ಸೊಗಡಿನ 'ರಾಜಾಹುಲಿ' ಚಿತ್ರವೂ ದೊಡ್ಡಮಟ್ಟದಲ್ಲಿ ಹಿಟ್ ಆಗಿತ್ತು. ಯೋಗರಾಜ್‌ ಭಟ್ಟರ ಡ್ರಾಮಾ, ನಿರ್ದೇಶಕ ಕೃಷ್ಣ ಅವರ ಗಜಕೇಸರಿ ಸಿನಿಮಾವೂ ಯಶ್‌ ವೃತ್ತಿ ಬದುಕಿನ ಮೈಲುಗಲ್ಲಾಗಿತ್ತು ಎಂದರೆ ತಪ್ಪಾಗಲಾರದು. ಒಟ್ಟಿನಲ್ಲಿ ಯಶಸ್ವಿಯಾಗಿ ಓಡುತ್ತಿರುವ ಯಶ್‌ ಜರ್ನಿಯಲ್ಲಿ ನಿರ್ದೇಶಕರ ಶ್ರಮವೂ ಕೆಲಸ ಮಾಡಿದೆ. ಯಶ್‌ ಅವರ ಸಿನಿಮಾ ಜರ್ನಿ ಹೀಗೆ ಸಕ್ಸಸ್ ಹಾದಿಯಲ್ಲಿರಲಿ ಎನ್ನುವುದೇ ನಮ್ಮ ಆಶಯ.