ದರ್ಶನ್ ನಟನೆಯ 'ಕಾಟೇರ' ಸಿನಿಮಾ ತಮಿಳಿನ 'ಕರ್ಣನ್' ರಿಮೇಕಾ? ನೆಟ್ಟಿಗರು ಹೀಗೆ ಹೇಳುತ್ತಿರುವುದೇಕೆ?

ಕಾಟೇರ 1974ರಲ್ಲಿ ನಡೆದ ನೈಜ ಘಟನೆಯನ್ನು ಆಧರಿಸಿದ ಸಿನಿಮಾ. ಈ ಸಿನಿಮಾದ ಮೂಲಕ ನಟ ದರ್ಶನ್ ಬಹಳ ದಿನಗಳ ಬಳಿಕ ಮತ್ತೆ ಲಾಂಗು ಹಿಡಿದಿದ್ದಾರೆ. ಜೊತೆಗೆ ಪಂಚೆಯುಟ್ಟು ಹಳ್ಳಿಗನ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಇದು ಅಭಿಮಾನಿಗಳ ಕುತೂಹಲಕ್ಕೆ ಕಾರಣವಾಗಿದೆ. ಮೋಷನ್ ಪೋಸ್ಟರ್‌ನಲ್ಲಿ 'ಪ್ರತಿ ಮಚ್ಚು ಎರಡು ದಪ ಕೆಂಪಾಗ್ತೈತೆ, ಬೆಂಕಿಲಿ ಬೆಂದಾಗ ರಕ್ತದಲ್ಲಿ ನೆಂದಾಗ' ಎನ್ನುವ ಡೈಲಾಗ್ ಅಭಿಮಾನಿಗಳಿಗೆ ಕಿಕ್ ಕೊಡ್ತಿದೆ.  'ಹಿಂದಿರೋರಿಗೆ ದಾರಿ, ಮುಂದಿರೋವ್ನದ್ದು ಜವಾಬ್ದಾರಿ ಎನ್ನುವ ಟ್ಯಾಗ್ ಲೈನ್ ಕೂಡ ಇದೆ.  

ಕೊರೊನಾ 2ನೇ ಅಲೆಯ ವೇಳೆ ಲಾಕ್ ಡೌನ್ ಆಗುವುದಕ್ಕೂ ಮುನ್ನ ಧನುಷ್ ನಟನೆಯ 'ಕರ್ಣನ್' ಚಿತ್ರ ತೆರೆಕಂಡಿತ್ತು. ಚಿತ್ರಮಂದಿರಗಳಲ್ಲಿ ಈ ಸಿನಿಮಾ ಒಳ್ಳೆಯ ಕಲೆಕ್ಷನ್ ಕೂಡ ಮಾಡಿತ್ತು. ಮಾರಿ ಸೆಲ್ವರಾಜ್ ನಿರ್ದೇಶನದ ಈ ಸಿನಿಮಾ ಹಳ್ಳಿ ಹಿನ್ನೆಲೆಯ ಕಥೆ ಹೊಂದಿತ್ತು. ಧನುಷ್ ಈ ಸಿನಿಮಾದಲ್ಲಿ ಪಕ್ಕ ಹಳ್ಳಿ ಹೈದನಾಗಿ ಕಾಣಿಸಿಕೊಂಡಿದ್ದರು. ತಮಿಳುನಾಡಿನ ತೂತುಕುಡಿ ಜೆಲ್ಲೆಯ ಗ್ರಾಮವೊಂದರಲ್ಲಿ 1995ರಲ್ಲಿ ನಡೆದ ನೈಜ ಘಟನೆ ಆಧಾರಿತ ಈ ಚಿತ್ರದಲ್ಲಿ ಧನುಷ್ ಅನ್ಯಾಯದ ವಿರುದ್ಧ ಹೋರಾಟ ಮಾಡುವ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದೀಗ ದರ್ಶನ್ ನಟನೆಯ 'ಕಾಟೇರ' ಪೋಸ್ಟರ್ ಕೂಡ 'ಕರ್ಣನ್' ಸಿನಿಮಾ ಪೋಸ್ಟರ್ ಗೆ ಹೋಲುತ್ತಿದೆ. ಇದು ತಮಿಳು ಸಿನಿಮಾ ರಿಮೇಕ್ ಎನ್ನುತ್ತಿದ್ದಾರೆ. ಜೊತೆಗೆ ಎರಡು ಪೋಸ್ಟರ್ ಗಳನ್ನೂ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. 

ಈ ಹಿಂದೆ ಕರ್ಣನ್ ಸಿನಿಮಾ ಬಗ್ಗೆ ಮಾತಾನಾಡಿದ್ದ ನಿರ್ದೇಶಕ ಮಾರಿ ಸೆಲ್ವರಾಜ್ ಇದು ಕಾಲ್ಪನಿಕ ಸಿನಿಮಾ ಎಂದು ಘೋಷಿಸಿದ್ದರು. ತಮಿಳುನಾಡಿನಲ್ಲಿ ಕೆಲವರ್ಗಗದ ಜನರು ವಾಸಿಸುವ ಒಂದು ಸಣ್ಣ ಹಳ್ಳಿಯ ಕುರಿತ ಚಿತ್ರ ಎಂದಿದ್ದರು. ಆದರೆ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 'ಕಾಟೇರ' ಸಿನಿಮಾ ನೈಜ ಘಟನೆ ಆಧಾರಿತವಾಗಿದೆ. 1974ರಲ್ಲಿ ನಡೆಯುವ ಕಥೆ ಇದಾಗಿದ್ದರಿಂದ ದರ್ಶನ್ ದ್ವಿಪಾತ್ರದಲ್ಲಿ ನಟಿಸಲಿದ್ದಾರಾ ಎಂಬ ಕುತೂಹಲವು ಹೆಚ್ಚಿದೆ. ಆದರೆ, ಈ ಸಿನಿಮಾ ತಮಿಳಿನ ರಿಮೇಕ್ ಅಲ್ಲ. 

'ಕಾಟೇರ' ಫಸ್ಟ್ ಲುಕ್‌ನಲ್ಲಿ ತರುಣ್ ಸುಧೀರ್ ಹಲವು ಎಲಿಮೆಂಟ್‌ಗಳನ್ನು ರಿವೀಲ್ ಮಾಡಿದ್ದಾರೆ. ಪಾರ್ಲಿಮೆಂಟ್, ದಂಗೆ ಎದ್ದ ರೈತರ ಸಮೂಹ, 1974ನೇ ಇಸವಿ ಹೀಗೆ ಹಲವು ಅಂಶಗಳನ್ನು ಕಾಣಬಹುದು. "ಫಸ್ಟ್ ಪೋಸ್ಟರ್ ಬಿಟ್ಟಾಗ ಒಂದಷ್ಟು ಕುರಿಗಳ ಮುಂದೆ ಒಂದು ನಾಯಿ ಇರುತ್ತೆ. ಅದೂ ಒಂದು ಕಥೆಯನ್ನು ಹೇಳುತ್ತೆ. ಈಗ ಬಿಟ್ಟಿರುವ ಟೈಟಲ್‌ನಲ್ಲೂ ಒಂದು ಕಥೆ ಹೇಳುತ್ತೆ. ಅದ್ಯಾವುದನ್ನೂ ರಿವೀಲ್ ಮಾಡದ ಹಾಗೆ, ಜನಕ್ಕೆ ಅದೇ ಕುತೂಹಲವನ್ನು ಹತ್ತಿರಕ್ಕೆ ತೆಗೆದುಕೊಂಡು ಹೋಗಿ, ಟೀಸರ್ ಮೂಲಕನೋ, ಟ್ರೈಲರ್ ಮೂಲಕನೋ ರಿವೀಲ್ ಮಾಡಲಾಗುತ್ತೆ ಎಂದು ಫಸ್ಟ್ ಲುಕ್ ಹಾಗೂ ಟೈಟಲ್‌ ಬಗ್ಗೆ ಮಾಹಿತಿ ನೀಡಿದ್ದಾರೆ.

ದರ್ಶನ್ ಸಿನಿಮಾಗೆ 'ಕಾಟೇರ' ಟೈಟಲ್ ಯಾಕೆ ಇಟ್ಟಿದ್ದು ಎಂಬುದರ ಕುರಿತು ಸಂಭಾಷಣೆಕಾರ ಮಾಸ್ತಿ ತಿಳಿಸಿದ್ದಾರೆ. ತುಂಬಾ ಕಡೆ ಹೆಣ್ಣು ಮಕ್ಕಳ ಹೆಸರುಗಳನ್ನೂ ಇಡುತ್ತಾರೆ. ಕೆಲವರು ಹರಕೆ ಕಟ್ಟಿಕೊಂಡಿರುತ್ತಾರೆ. ನನಗೆ ಮಗುವಾದರೆ, ನಿನ್ನ ಹೆಸರು ಇಡುತ್ತೇನಪ್ಪಾ ಅಂತ. ಆ ಕಾಲದಲ್ಲಿ ಆ ತರ ಇತ್ತು. ಈಗ ಇಲ್ಲ. ಆಗೆಲ್ಲ ತಾತನ ಹೆಸರನ್ನು ಮಗನಿಗೆ ಇಡುವುದು, ಮಕ್ಕಳಾಗಿಲ್ಲ ಅಂತ ಹರಕೆ ಹೊತ್ತುಕೊಂಡಿದ್ದವರು ಯಾವ ದೇವತೆ ಮೊರೆ ಹೋಗಿತ್ತಾರೋ ಆ ದೇವತೆಯ ಹೆಸರು ಇಡುತ್ತಾರೆ. ಮತ್ತೆ ತುಂಬಾ ಹಿಂದೆ ನಡೆಯೋ ಕಥೆಯಾಗಿರುವುದರಿಂದ ಆ ಹೆಸರನ್ನು ಇಟ್ಟಿದ್ದೇವೆ ಎಂದಿದ್ದಾರೆ.