ರವಿಚಂದ್ರನ್ ಟು ಉಪೇಂದ್ರ: ತಮ್ಮ ತಾಯಿರೊಂದಿಗೆ ನಟಿಸಿರುವ ಸ್ಯಾಂಡಲ್‌ವುಡ್‌ ಸ್ಟಾರ್ ನಟರಿವರು!

ರಿಯಲ್ ಸ್ಟಾರ್ ಉಪೇಂದ್ರ ನಟನೆಯ ಒಂದು ಸಿನಿಮಾದಲ್ಲಿ ಅವರ ತಾಯಿ ಅನುಸೂಯ ಅವರು ಚಿಕ್ಕ ಪಾತ್ರವೊಂದನ್ನು ಮಾಡಿದ್ದಾರೆ. 2010ರಲ್ಲಿ ಬಿಡುಗಡೆಯಾದ ಉಪ್ಪಿ ನಿರ್ದೇಶಿಸಿ ನಟಿಸಿದ್ದ ಬ್ಲ್ಯಾಕ್ ಬಾಸ್ಟರ್ 'ಸೂಪರ್' ಸಿನಿಮಾದಲ್ಲಿ ಅನುಸೂಯ ಅವರು ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆ ಮೂಲಕ ಮಗನ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. 

ಕ್ರೇಜಿಸ್ಟಾರ್ ವಿ. ರವಿಚಂದ್ರನ್ ತಾಯಿ ಪಟ್ಟಮ್ಮಾಳ್ ವೀರಸ್ವಾಮಿ ಅವರು ರವಿಚಂದ್ರನ್ ಕಥೆ ಬರೆದು ನಿರ್ದೇಶಿಸಿ ಅಭಿನಯಿಸಿದ್ದ 'ಹಠವಾದಿ' ಸಿನಿಮಾದ ಹಾಡೊಂದರಲ್ಲಿ ಕಾಣಿಸಿಕೊಂಡಿದ್ದರು. ಹಠ-ಹಠ ಗೆಲ್ಲೋನಿಗೆ ಬೇಕು ಹಠ ಹಾಡಿನಲ್ಲಿ ರವಿಚಂದ್ರನ್ ಅವರಿಗೆ ಆರತಿ ಸೀನ್‌ನಲ್ಲಿ ಕಾಣಿಸಿಕೊಂಡಿದ್ದರು. 2006ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಹಾಡುಗಳು ಇಂದಿಗೂ ಜನಪ್ರಿಯತೆ ಪಡೆದುಕೊಂಡಿವೆ.

ಕನ್ನಡ ಚಿತ್ರೋದ್ಯಮಕ್ಕೆ ಆಧಾರಸ್ತಂಭವಾಗಿದ್ದ ಪಾರ್ವತಮ್ಮ ರಾಜ್‌ಕುಮಾರ್  ಹಲವಾರು ಚಿತ್ರಗಳನ್ನು ನಿರ್ಮಿಸುವ ಮೂಲಕ ಚಿತ್ರರಂಗಕ್ಕೆ ನೀಡಿರುವ ಕೊಡುಗೆ ಅಪಾರ. ವರನಟ, ಕರ್ನಾಟಕರತ್ನ ಡಾ.ರಾಜ್ ಕುಮಾರ್ ಅವರ ಧರ್ಮಪತ್ನಿಯಾದ ಪಾರ್ವತಮ್ಮ ಅವರು, ಅನೇಕ ನಟ-ನಟಿಯರು, ಗಾಯಕರು ಹಾಗೂ ತಂತ್ರಜ್ಞರನ್ನು ಚಿತ್ರರಂಗಕ್ಕೆ ಪರಿಚಯಿಸಿದ್ದಾರೆ. ಪಾರ್ವತಮ್ಮ ಅವರು ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ನಟನೆಯ 'ಜೋಗಿ' ಸಿನಿಮಾದ ಆರಂಭದಲ್ಲಿ ಪಾರ್ವತಮ್ಮ ಅವರು ಒಂದು ಚಿಕ್ಕ ಪಾತ್ರ ಮಾಡಿದ್ದರು. ಜೋಗಿ ಸಿನಿಮಾದ ಆರಂಭದಲ್ಲಿ ಶಿವಣ್ಣನಿಗೆ ಭಿಕ್ಷೆ ನೀಡುವ ಸೀನ್‌ನಲ್ಲಿ ಡಾ.ರಾಜ್‌ಕುಮಾರ್ ಜೊತೆಗೆ ಪಾರ್ವತಮ್ಮ ಕಾಣಿಸಿಕೊಂಡಿದ್ದರು. 

ಲೂಸ್‌ಮಾದ ಯೋಗಿ ಹಾಗೂ ಅವರ ತಾಯಿ ಅಂಬುಜಾ ಇವರಿಬ್ಬರು ಒಂದೇ ಸಿನಿಮಾದ ಮೂಲಕ ತಮ್ಮ ನಟನಾ ವೃತ್ತಿಯನ್ನು ಆರಂಭಿಸಿದರು. ದುನಿಯಾ ವಿಜಯ್ ನಾಯಕನಾಗಿ ನಟಿಸಿದ್ದ 'ದುನಿಯಾ' ಸಿನಿಮಾದಲ್ಲಿ ಯೋಗಿ ವಿಲನ್ ಆಗಿ ಕಾಣಿಸಿಕೊಂಡಿದ್ದರು. ಇದೇ ಚಿತ್ರದಲ್ಲಿ ಅಂಬುಜಾ ಹಾಸ್ಟೆಲ್ ವಾರ್ಡನ್‌ ಪಾತ್ರಕ್ಕೆ ಬಣ್ಣಹಚ್ಚಿದ್ದರು. ದುನಿಯಾ ವಿಜಯ್ ಅಂಬುಜಾ ಅವರ ಸಹೋದರನಾಗಿದ್ದಾರೆ. 

ಡಾ.ರಾಜ್‌ಕುಮಾರ್ ಕುಟುಂಬದಂತೆ ಲೋಕೇಶ್ ಅವರ ಕುಟುಂಬ ಕೂಡ ಕಲಾವಿದರ ಕುಟುಂಬವಾಗಿದೆ. ಈ ಕುಟುಂಬದ ಎಲ್ಲರೂ ಕಲಾವಿದರಾಗಿದ್ದಾರೆ. ಲೋಕೇಶ್ ಪುತ್ರ ಸೃಜನ್ ಜೊತೆಗೆ ಅವರ ತಾಯಿ ಗಿರಿಜಾ ಹಲವು ಸಿನಿಮಾಗಳಲ್ಲಿ ಬಣ್ಣಹಚ್ಚಿದ್ದಾರೆ. ಸ್ನೇಹಿತರು, ಎಲ್ಲಿದ್ದೇ ಇಲ್ಲಿತನಕ ಸೇರಿದಂತೆ ಸಾಕಷ್ಟು ಸಿನಿಮಾಗಳಲ್ಲಿ ಫೋಷಕ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. 

ಡ್ಯಾನ್ಸ್‌ ಕಿಂಗ್ ವಿನೋದ್ ರಾಜ್‌ ಹಾಗೂ ಲೀಲಾವತಿ ಅವರು ಕನ್ನಡ ಚಿತ್ರರಂಗದ ಅದ್ಭುತ ಕಲಾವಿದರು. ಲೀಲಾವತಿ ಅವರು ಕನ್ನಡ ಅಷ್ಟೇ ಅಲ್ಲದೆ ತಮಿಳು, ತೆಲಗು ಮತ್ತು ಮಲಯಾಳಂ ಭಾಷೆ ಸೇರಿದಂತೆ ಒಟ್ಟು 600 ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿಯೇ 400ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ.  ವಿನೋದ್ ರಾಜ್‌ ಅವರ ಕಾಲೇಜ್ ಕುಮಾರ್, ಕನ್ನಡದ ಕಂದ, ಯಾರದು, ನಂಜುಂಡ, ಶುಕ್ರ ಮುಂತಾದ ಸಿನಿಮಾಗಳಲ್ಲಿ ಲೀಲಾವತಿ ಅವರ ಮಗನ ಜೊತೆಗೆ ಸ್ಟ್ರೀನ್ ಶೇರ್ ಮಾಡಿದ್ದಾರೆ.