ಶಿವರಾಜ್‌ಕುಮಾರ್ ಟು ಗಣೇಶ್: ಸ್ಯಾಂಡಲ್‌ವುಡ್‌ನ ಈ ಸ್ಟಾರ್ ನಟರ ಪೈಕಿ ಉತ್ತಮ ಗಾಯಕ ಯಾರು?

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ತಮ್ಮ ವೃತ್ತಿ ಜೀವನದಲ್ಲಿ ಹಲವು ವರ್ಷಗಳಿಂದ ಹಾಡುಗಾರನಾಗಿಯೂ ಗುರುತಿಸಿಕೊಂಡಿದ್ದಾರೆ. ಜನುಮದ ಜೋಡಿ ಚಿತ್ರದಲ್ಲಿ ಅವರು ಹಾಡಿದ 'ಮಣಿ ಮಣಿ ಮಣಿಗೊಂದು ದಾರ' ಇಂದಿಗೂ ಜನಪ್ರಿಯ. ಮಾಲಾಶ್ರೀ ಪ್ರಮುಖ ಭೂಮಿಕೆಯಲ್ಲಿದ್ದ ಶಕ್ತಿ, ಜೋಡಿಹಕ್ಕಿ, ಶ್ರೀಕಂಠ, ಕಿಲ್ಲಿಂಗ್ ವೀರಪ್ಪನ್, ತಾರಕಾಸುರ, ವೇದ, ಆಸೆಗೊಬ್ಬ ಮೀಸೆಗೊಬ್ಬ ಸೇರಿದಂತೆ ಹಲವು ಸಿನಿಮಾಗಳ ಹಾಡುಗಳನ್ನು ಶಿವಣ್ಣ ಹಾಡಿದ್ದಾರೆ.

ಆಡು ಮುಟ್ಟದ ಸೊಪ್ಪಿಲ್ಲ ಎನ್ನುವ ಹಾಗೆ ರಿಯಲ್ ಸ್ಟಾರ್ ಉಪೇಂದ್ರ ಚಿತ್ರರಂಗದಲ್ಲಿ ಮಾಡದ ಕೆಲಸವಿಲ್ಲ. ನಿರ್ದೇಶಕನಾಗಿ, ನಟನಾಗಿ ಮಾತ್ರವಲ್ಲದೇ ಗಾಯಕರಾಗಿಯೂ ಮೋಡಿ ಮಾಡಿರುವ ಹೆಗ್ಗಳಿಕೆ ಉಪ್ಪಿ ಅವರದ್ದು. ಅದರಲ್ಲಿ ಪ್ರಮುಖ ಹಿಟ್ ಗೀತೆಗಳೆಂದರೆ, ಉಪೇಂದ್ರ ಸಿನಿಮಾದ ಉಪ್ಪಿಗಿಂತ ರುಚಿ ಬೇರೆ ಇಲ್ಲ, ಜೋಗಯ್ಯ ಚಿತ್ರದ ತಗಲಾಕೊಂಡೆ ನಾನು, ಸೂಪರ್ ಚಿತ್ರದ ನಾನು ಸೂಪರೋ ರಂಗ, ಬುದ್ದಿವಂತ ಚಿತ್ರದ ಚಿತ್ರಾನ್ನ ಚಿತ್ರಾನ್ನ ಹಾಡು ಪ್ರಮುಖವಾದದ್ದು.

ಕಿಚ್ಚ ಸುದೀಪ್ ತಮ್ಮ ಅದ್ಭುತ ಅಭಿನಯದಿಂದ ಭಾರತದಾದ್ಯಂತ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಯಶಸ್ಸಿನ ಉತ್ತುಂಗದಲ್ಲಿರುವ ಕಿಚ್ಚನ ವಾಯ್ಸ್‌ಗೆ ಮರಳಾಗದವರಿಲ್ಲ. ವಾಲಿ ಸಿನಿಮಾದ ಓ ಸೋನಾ ಓ ಸೋನಾ, ವಸಂತ ಮಾಸದಲಿ, ಚಂದು ಚಿತ್ರದ ಸೊಂಟದ ವಿಷ್ಯ, ರಂಗ ಎಸ್ಎಸ್‌ಎಲ್‌ಸಿ ಸಿನಿಮಾದ ಡವ್ ಡವ್ ದುನಿಯಾ ಕಣೋ, ನಲ್ಲ ಚಿತ್ರದ ಮಚ್ಚಾ ಡವ್ ಹೋಡಿಯೋದ್, ಕೆಂಪೆಗೌಡ ಸಿನಿಮಾದ ಹಳೆ ರೇಡಿಯೋ, ಕೋಟಿಗೊಬ್ಬ 2 ಚಿತ್ರದ ಹೂ..ನಾ..ಹೂ..ನಾ, ರಾಟೆ ಸಿನಿಮಾದ ಜೋಡಕ್ಕಿ ಸೇರಿದಂತೆ ವೀರಮದಕರಿ, ಗೂಳಿ, ಶಾಂತಿನಿವಾಸ, ಮುಂತಾದ ಚಿತ್ರಗಳಲ್ಲಿ ಸುದೀಪ್ ಹಾಡಿದ್ದಾರೆ.

ನಟ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಆರು ತಿಂಗಳ ಮಗು ಆಗಿರುವಾಗಲೇ ಪ್ರೇಮದ ಕಾಣಿಕೆ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಅಪ್ಪು ನಟನೆ ಜೊತೆಗೆ ಗಾಯಕರಾಗಿಯೂ ತನ್ನದೇಯಾದ ಛಾಪು ಮೂಡಿಸಿದ್ದರು. ತಮ್ಮ ಚಿತ್ರಗಳಿಗೆ ಮಾತ್ರವಲ್ಲದೇ ಬೇರೆ-ಬೇರೆ ಸಿನಿಮಾಗಳಿಗೂ ಹಾಡುವ ಮೂಲಕ ಗಾಯಕರಾಗಿ ಗುರುತಿಸಿಕೊಂಡಿದ್ದರು. ಭಾಗ್ಯವಂತ ಸಿನಿಮಾದಲ್ಲಿ 'ಬಾನ ದಾರಿಯಲ್ಲಿ ಸೂರ್ಯ ಜಾರಿ ಹೋದ' ಹಾಡಿನಿಂದ‌ ಹಿಡಿದು ಈವೆರೆಗೂ ಸುಮಾರು 95 ಹಾಡುಗಳಿಗೆ ಧ್ವನಿಯಾಗಿದ್ದಾರೆ.  

ಯಾವುದೇ ಸಿನಿಮಾ ಹಿನ್ನೆಲೆಯಿಲ್ಲದೆ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಯಶ್ ಇಂದು ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಮಿಂಚುತ್ತಿದ್ದಾರೆ. ಅಭಿಮಾನಿಗಳಿಂದ ರಾಕಿಂಗ್ ಸ್ಟಾರ್ ಎಂಬ ಬಿರುದು ಪಡೆದುಕೊಂಡಿದ್ದಾರೆ. ಬಸ್ ಚಾಲಕನ ಮಗನಾಗಿರುವ ರಾಕಿಂಗ್ ಸ್ಟಾರ್ ಯಶ್, ಇಂದು ಕೆಜಿಎಫ್ ಚಿತ್ರದ ಮೂಲಕ ನ್ಯಾಷನಲ್ ಸ್ಟಾರ್ ಆಗಿ ಗುರುತಿಸಿಕೊಂಡಿದ್ದಾರೆ. ಯಶ್ ಕೂಡ ನಟ ಮಾತ್ರವಲ್ಲದೇ ಗಾಯಕನಾಗಿ ಗುರುತಿಸಿಕೊಂಡಿದ್ದಾರೆ. ಮಿಸ್ಟರ್ ಆಂಡ್ ಮಿಸ್ಟರ್ ರಾಮಾಚಾರಿ ಸಿನಿಮಾದ ಅಣ್ತಮ್ಮ ಹಾಡಿನ ಮೂಲಕ ಗಾಯಕರಾದ ಇವರು, ನಂತರ ಕೆಲ ಹಾಡುಗಳಿಗೆ ಧ್ವನಿಯಾಗಿದ್ದಾರೆ.

ಗೋಲ್ಡನ್ ಸ್ಟಾರ್ ಗಣೇಶ್ ಕೂಡ ಸದ್ಯ ಸ್ಯಾಂಡಲ್‌ವುಡ್‌ ಸ್ಟಾರ್ ನಟರಾಗಿ ಗುರುತಿಸಿಕೊಂಡಿದ್ದಾರೆ. ಗಣೇಶ್ ನಟರಷ್ಟೇ ಅಲ್ಲದೇ,  ಕೆಲವೊಂದು ಚಿತ್ರಗಳಿಗೆ ಹಾಡಿದ್ದುಂಟು. ಕೂಲ್ ಚಿತ್ರದ 'ಕಾಫಿಗೆ ಹೋಗೋಣ' ಹಾಡು ಹಿಟ್ ಆಗಿತ್ತು.