ರಾಜ್‌ ಬಿ ಶೆಟ್ಟಿ ಅಭಿನಯದ ಟೋಬಿ ಸಿನಿಮಾದ ಕಥೆ, ಅಭಿನಯ, ರೇಟಿಂಗ್ ಇನ್ನಿತರ ಮಾಹಿತಿ ಇಲ್ಲಿದೆ.

ಹರಕೆಯ ಕುರಿ ಕಾಣೆಯಾಗಿದೆ ಎಂಬುದರಿಂದ ಟೋಬಿ ಚಿತ್ರ ಶುರುವಾಗುತ್ತೆ. ಹೀಗೆ ಕಾಣೆಯಾದ ಆ ಕುರಿ ವಾಪಸ್ ಬಂದರೆ ಮಾರಿಯಾಗಿರುತ್ತದೆ ಎಂಬುದು ಪೂಜಾರಿ ಹೇಳುವ ಮಾತು. ಅಂದರೆ ಇಲ್ಲಿ ಹರಕೆಯ ಕುರಿ ಯಾರು? ಮೂಗುತಿ ಮಾರಿಯಾಗಲು ಕಾರಣವೇನು? ಎಂಬುದೇ ಸಿನಿಮಾ ಕಥೆ. ಹೆಸರಿಲ್ಲದ ಅನಾಥ, ಮೂಕ ವಿಲಕ್ಷಣ ವ್ಯಕ್ತಿಯೊಬ್ಬ ಮತ್ತೊಂದು ಅನಾಥ ಹೆಣ್ಣು ಮಗುವನ್ನು ಸಾಕುವ, ಮನೆ ಕಟ್ಟಲು, ಜೀವನ ಸಾಗಿಸಲು ಉಳ್ಳವರಿಗೆ ಹರಕೆಯ ಕುರಿಯಾಗುವ ಆತನ ಜೀವನದಲ್ಲಿ ನಡೆಯುವ ಘಟನೆಗಳೇ ಟೋಬಿ ಚಿತ್ರ. 

ಸಿನಿಮಾದಲ್ಲಿ ಟೋಬಿಯಾಗಿ ನಟ ರಾಜ್ ಬಿ ಶೆಟ್ಟಿ ಜೀವಿಸಿದ್ದಾರೆ. ಚಿತ್ರದ ಮೊದಲಾರ್ಧದಲ್ಲಿ ಟೋಬಿಯ ಜೀವನದ ಬಹುಪಾಲು ಭಾಗ ಜೈಲಿನಲ್ಲೇ ಕಳೆದು ಹೋಗುವುದು. ಈ ನಡುವೆ ಕೆಲವು ಹಾಸ್ಯ ದೃಶ್ಯಗಳು ಇವೆ. ಮರಣೋತ್ತರ ಪರೀಕ್ಷೆ ವೇಳೆ ಹೆಣ ಕುಯ್ಯುವಾಗಲೂ  ಟೋಬಿ ನಗುತ್ತಾ ಕೆಲಸ ಮಾಡುವುದು ಆತನ ವಿಲಕ್ಷಣತೆಗೆ ಉದಾಹರಣೆ. ಟೋಬಿ ಸಿನಿಮಾ ತುಂಬಾ ಸ್ಲೋ ಅನ್ನಿಸುತ್ತದೆ. ಮಧ್ಯಂತರಕ್ಕೂ ಮುನ್ನ ಬರುವ ಆಕ್ಷನ್ ಸೀನ್ ಪ್ರಸೆಂಟ್ ಮಾಡಿರುವ ರೀತಿ ಚೆನ್ನಾಗಿದೆ. ಸೆಕೆಂಡ್ ಹಾಫ್‌ನಲ್ಲಿ ಬರೀ ರಕ್ತಸಿಕ್ತ ಅಧ್ಯಾಯವೇ. ಇದರ ಜೊತೆಗೆ ಅಪ್ಪ-ಮಗಳ ಕೆಲವು ಭಾವನಾತ್ಮಕ ಸನ್ನಿವೇಶಗಳಿವೆ. ಚಿತ್ರದಲ್ಲಿ ಎರಡು ಹಾಡುಗಳಿದ್ದರೂ ಸಿನಿಮಾ ಮುಗಿದ ಮೇಲೆ ಅವು ಮತ್ತೆ ನೆನಪಾಗುವುದಿಲ್ಲ.  

ನಟ ರಾಜ್‌ ಬಿ ಶೆಟ್ಟಿ ಈ ಸಿನಿಮಾದ ಪಾತ್ರದಲ್ಲಿ ಮುಳುಗಿದ್ದಾರೆ. ಟೋಬಿಯ ಮಗಳಾಗಿ ಚೈತ್ರಾ ಆಚಾರ್ ಚೆನ್ನಾಗಿ ನಟಿಸಿದ್ದಾರೆ. ಅವರು ಭಾವನಾತ್ಮಕ ಸನ್ನಿವೇಶಕ್ಕಿಂತ ಗಯ್ಯಾಳಿಯಾಗಿ ನೆನಪಾಗುತ್ತಾರೆ. ಶವಾಗಾರದಲ್ಲಿ ಕೆಲಸ ಮಾಡುವವನ ಪಾಥ್ರದಲ್ಲಿ ಗೋಪಾಲ್ ದೇಶಪಾಂಡೆ ಗಮನ ಸೆಳೆಯುತ್ತಾರೆ. ಇನ್ನು ಖಳನಟನಾಗಿ ರಾಜ್‌ ದೀಪಕ್ ಶೆಟ್ಟಿ ನಟನೆ ತುಂಬಾ ಚೆನ್ನಾಗಿದೆ. ಸಂಯುಕ್ತಾ ಹೊರನಾಡು ಚಿತ್ರದಲ್ಲಿ ಕಣ್ಣಲ್ಲೇ ಮಾತನಾಡುತ್ತಾರೆ. 

ಚಿತ್ರದ ಪ್ಲಸ್ ಪಾಯಿಂಟ್ ಅಂದರೆ ಕಥೆ ಮತ್ತು ರಾಜ್ ಬಿ ಶೆಟ್ಟಿ ನಟನೆ. ದೆವ್ವಕ್ಕೆ ಧರ್ಮ ಇರುತ್ತಾ? ಬಡವ ಕೋಪ ಮಾಡಿಕೊಳ್ಳಬಾರದು, ಸೈತಾನ್ ಕಾಪಾಡಲು ಬಂದಂತೆ ನಂಬಿಸುತ್ತಾನೆ... ಹೀಗೆ ಕೆಲವು ಸಂಭಾಷಣೆ ಚೆನ್ನಾಗಿದೆ. ಮಧ್ಯಂತರದಲ್ಲಿ ಬರುವ ಒಂದು ಆಕ್ಷನ್ ಸೀನ್ ಮತ್ತು ಕೊನೆಯ 30 ನಿಮಿಷಗಳು ಸಿನಿಮಾದ ಜೀವಾಳ. 

ಟೋಬಿ ಸಿನಿಮಾದ ಮೈನಸ್ ಎಂದರೆ ಚಿತ್ರದಲ್ಲಿನ ಪಾತ್ರಗಳು ಬೇಗ ಬೇಗ ಬೆಳೆದರೂ ಸ್ಟೋರಿ ಮುಂದೆ ಓಡುವುದಿಲ್ಲ. ಟೋಬಿ ಮುಗ್ಧ ಎಂದು ಸಿನಿಮಾ ತಂಡ ಹೇಳಿಕೊಂಡಿದ್ದರೂ ಸಿನಿಮಾದಲ್ಲಿ ಟೋಬಿ ತುಂಬಾ ಮುಗ್ಧನಂತೆ ಕಾಣುವುದಿಲ್ಲ. ಮಾರಿ ಎಂಬ ದೇವರ ಬಗ್ಗೆ ಇನ್ನೂ ಸ್ಪಲ್ಪ ಮಾಹಿತಿ ಇದ್ದಿದ್ದರೇ ಸಿನಿಮಾಗೆ ಮತ್ತಷ್ಟು ಶಕ್ತಿ ಬರುತ್ತಿತ್ತು.