ನಟಿಸಿದ 2 ಚಿತ್ರದಲ್ಲೂ ಗೆದ್ದ ಡ್ರ್ಯಾಗನ್ ಹೀರೋ ಪ್ರದೀಪ್ ರಂಗನಾಥನ್ ಕುರಿತ ಈ ವಿಷಯಗಳು ನಿಮಗೆ ಗೊತ್ತಾ?

1993ರ ಜುಲೈ 25ರಂದು ತಮಿಳುನಾಡಿನ ಮದ್ರಾಸ್‌ನಲ್ಲಿ ಜನಿಸಿದ ಪ್ರದೀಪ್ ರಂಗನಾಥನ್ ಅವರಗೀಗ 31 ವರ್ಷ ವಯಸ್ಸು. ಡ್ರ್ಯಾಗನ್‌ ಸಿನಿಮಾದಲ್ಲಿ ಬರುವಂತೆ ಪ್ರದೀಪ್‌ ನಿಜಜೀವನದಲ್ಲೂ ಓದಿನಲ್ಲಿ ಮುಂದಿದ್ದರು. ದ್ವಿತೀಯ ಪಿಯುಸಿಯಲ್ಲಿ 1200ಕ್ಕೆ 1163 ಅಂಗ ಪಡೆದು ಚೈನೈನ ಪ್ರಸಿದ್ಧ ಕಾಲೇಜಿನಲ್ಲಿ ಮೆರಿಟ್ ಮೇಲೆ ಇಂಜಿನಿಯರಿಂಗ್ ಸೀಟ್ ಪಡೆದಿದ್ದರು. ಇಂಜಿನಿಯರಿಂಗ್ ಓದುವಾಗ ಅವರ ಕಾಲೇಜಿನಲ್ಲಿ ಶೂಟಿಂಗ್ ನಡೆಯುತ್ತಿತಂತೆ. ಹೀಗಾಗಿ, ಪ್ರದೀಪ್ ಅವರಿಗೆ ಓದಿನ ಮೇಲೆ ಆಸಕ್ತಿ ಕಡಿಮೆಯಾಗಿ ಸಿನಿಮಾ ಮೇಲೆ ಆಸಕ್ತಿ ಹುಟ್ಟಿತು.

ಪ್ರದೀಪ್ ರಂಗನಾಥನ್ ಕಾಲೇಜಿಗೆ ಹೋಗುವಾಗಲೇ ಕಿರುಚಿತ್ರಗಳನ್ನು ತೆಗೆಯಲು ಆರಂಭಿಸಿದರು. ಈ ಕಿರುಚಿತ್ರಗಳನ್ನು ಯೂಟ್ಯೂಬ್‌ನಲ್ಲಿ ರಿಲೀಸ್ ಮಾಡಿದ್ದರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಕಿರುಚಿತ್ರ ನೋಡಿದ ಜನರು ನಟನನ್ನು ಸಿಕ್ಕಾಪಟ್ಟೆ ಹೊಗಳಿದ್ದರು. ಆದರೆ, ಸಿನಿಮಾ ನಿರ್ದೇಶಿಸಿದ ತನಗೆ ಮೆಚ್ಚುಗೆ ಸಿಗದಿದ್ದರಿಂದ ಪ್ರದೀಪ್, ಹೀರೋ ಆದರೆ ಹೆಸರು ಮತ್ತು ಖ್ಯಾತಿ ಸಿಗುತ್ತೆ. ತಾವು ಹೀರೋ ಆಗಬೇಕೆಂದು ನಿರ್ಧರಿಸಿದರು. ಮೊದಲು ನಿರ್ದೇಶಕನಾಗಿ ಪ್ರತಿಭೆ ಸಾಬೀತುಪಡಿಸಲು 'ಕೋಮಾಲಿ' ಎಂಬ ಚಿತ್ರವನ್ನು ನಿರ್ದೇಶಿಸಿದ್ದರು. ಈ ಸಿನಿಮಾಗೆ ಯಶಸ್ಸು ಸಿಗುತ್ತಿದ್ದಂತೆ ಹೀರೋ ಆಗಿ ಎಂಟ್ರಿಕೊಟ್ಟರು.

ಮುಂದೆ ತಾವು ನಿರ್ದೇಶಿಸಿದ್ದ ಆಪ್ ಲಾಕ್ ಎಂಬ ಕಿರುಚಿತ್ರವನ್ನು 'ಲವ್ ಟುಡೇ' ಎಂಬ ಹೆಸರಿನಲ್ಲಿ ಪೂರ್ಣ ಪ್ರಮಾಣದ ಸಿನಿಮಾವಾಗಿ ತೆಗೆದರು. ಈ ಸಿನಿಮಾವನ್ನು ಎಜಿಎಸ್ ಸಂಸ್ಥೆ ನಿರ್ಮಾಣ ಮಾಡಿತ್ತು. 2022ರಲ್ಲಿ ತೆರೆಗೆ ಬಂದ ಈ ಚಿತ್ರ ಬ್ಲಾಕ್‌ಬಸ್ಟರ್ ಆಗಿತ್ತು. ಕೇವಲ 15 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಿದ್ದ ಈ ಚಿತ್ರ ಸುಮಾರು 100 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿತ್ತು.

ಲವ್ ಡುಡೇ ಯಯಸ್ಸಿನ ನಂತರ ಪ್ರದೀಪ್‌ಗೆ 'ಡ್ರ್ಯಾಗನ್' ಚಿತ್ರದಲ್ಲಿ ನಟಿಸುವ ಅವಕಾಶ ಸಿಕ್ಕಿತು. ಈ ಸಿನಿಮಾವನ್ನೂ ಕೂಡ ಎಜಿಎಸ್ ಸಂಸ್ಥೆ ನಿರ್ಮಿಸಿದೆ. ಈ ಸಿನಿಮಾದಲ್ಲಿ ಪ್ರದೀಪ್ ಜೊತೆಗೆ ಕಯಾದು ಲೋಹರ್ ಮತ್ತು ಅನುಪಮಾ ಪರಮೇಶ್ವರನ್ ನಟಿಸಿದ್ದಾರೆ. ಬಿಡುಗಡೆಯಾದ 10 ದಿನದಲ್ಲೇ ಈ ಚಿತ್ರ 100 ಕೋಟಿ ರೂ. ದಾಟಿ ದಾಖಲೆ ಬರೆದಿದೆ. ಆ ಮೂಲಕ ಪ್ರದೀಪ್ ರಂಗನಾಥನ್ ಬಣ್ಣಹಚ್ಚಿದ ಮೊದಲೆರಡು ಸಿನಿಮಾಗಳು 100 ಕೋಟಿ ಕಲೆಕ್ಷನ್ ಮಾಡುವ ಮೂಲಕ ದಾಖಲೆ ಬರೆದಿವೆ.