ಕರಿಬಸವಯ್ಯ ಕೈಹಿಡಿದ ಕಿರುತೆರೆ ಸೀರಿಯಲ್

ನಟ ಕರಿಬಸವಯ್ಯ ಈಗ ಸೀರಿಯಲ್ ನಲ್ಲಿ ಬ್ಯುಸಿಯಾಗಿದ್ದಾರೆ. ಕರ್ರಗಿನ ಲಕ್ಷಣವಾದ ಮುಖ, ಗುಂಗುರು ಕೂದಲು, ನಕ್ಕರೆ ಸಕ್ಕರೆಯಂತೆ ಕಾಣುವ ಬೆಳ್ಳಗಿನ ಹಲ್ಲು, ಇವೆಲ್ಲಾ ಸೇರಿದರೆ ಕರಿಬಸವಯ್ಯ ಎಂಬ ವ್ಯಕ್ತಿ ಕಣ್ಣೆದುರು ನಿಲ್ಲುತ್ತಾರೆ. ಈ ಹಿಂದೆ ಅವರು ಸುಮಾರು 212 ಸಿನಿಮಾಗಳಲ್ಲಿ ನಟಿಸಿ ಮನೆಮಾತಾಗಿದ್ದ ಇವರು ಈಗ ಸಿನಿಮಾದಿಂದ ಮಾಯವಾಗಿದ್ದಾರೆ.

'ಉಂಡೂ ಹೋದ ಕೊಂಡೂ ಹೋದ' ಚಿತ್ರದ ಮೂಲಕ ಬಣ್ಣ ಹಚ್ಚಿದ ಇವರು ಕೊಟ್ರೇಶಿ ಕನಸು, ಜನುಮದ ಜೋಡಿ, ಮುಂಗಾರಿನ ಮಿಂಚು, ಹೀಗೆ ಸಾಕಷ್ಟು ಚಿತ್ರಗಳಲ್ಲಿ ಗಮನಾರ್ಹವಾಗಿ ನಟಿಸಿದವರು. ಸದ್ಯ ಬಿಡುಗಡೆಯಾಗಲಿರುವ ಅವರ ಚಿತ್ರಗಳೆಂದರೆ ಸಂಗೊಳ್ಳಿ ರಾಯಣ್ಣ ಹಾಗೂ ಚಿತ್ರಮಂದಿರ.

ಕಾಮಿಡಿ, ಪೆದ್ದ, ಕುಡುಕ, ಹಾಗೂ ಹತ್ತು ಹಲವು ವಿಭಿನ್ನ ಪಾತ್ರಗಳ ಮೂಲಕ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿದ್ದ ಕರಿಬಸವಯ್ಯ, ಕನ್ನಡ ಚಿತ್ರರಂಗದಲ್ಲಿ ಸಾಕಷ್ಟು ಬ್ಯುಸಿಯಾಗಿದ್ದವರು. ಆದರೆ ಈಗ ಕಾಲ ಬದಲಾಗಿದೆ. ಹೊಸಬರು ಬಂದಿದ್ದಾರೆ, ಇವರಂಥ ಹಳಬರು ಜಾಗ ಖಾಲಿ ಮಾಡಿಲೇಬೇಕಾಗಿದೆ. ಅದರಂತೆ ಇವರು 'ಲಕುಮಿ' ಮುಂತಾದ ಧಾರಾವಾಹಿಗಳಲ್ಲಿ ನಟಿಸುತ್ತಾ ಕಿರುತೆರೆಯಲ್ಲಿಯೇ ಗಟ್ಟಿನೆಲೆ ಕಂಡುಕೊಂಡಿದ್ದಾರೆ. (ಒನ್ ಇಂಡಿಯಾ ಕನ್ನಡ)