ರೆಡ್ಡಿಗಳಿಗೆ ಬಿಳಿಯಾನೆಯಾದ ಜನಶ್ರೀ ಚಾನಲ್

ಜನಶ್ರೀ ವಾಹಿನಿಯ ಉನ್ನತ ಮೂಲಗಳ ಪ್ರಕಾರ, ಗುಜರಾತ್ ಮೂಲದ ಎಂಟರ್‌ಟೈನ್‌ಮೆಂಟ್ ಹಾಗೂ ಮೀಡಿಯಾ ಕಂಪನಿ ಜೊತೆ ಜನಶ್ರೀಯನ್ನು ಶೇ.60ರ ಪಾಲುದಾರಿಕೆಯಲ್ಲಿ ವಿಲೀನಗೊಳಿಸಲು ಮುಂದಾಗಿದ್ದಾರೆ. ಚಾನಲ್ ನಿರ್ವಹಣೆ ತೀರಾ ದುಸ್ತರವಾಗಿದೆಯಂತೆ.

ಸದ್ಯಕ್ಕೆ ಜನಶ್ರೀ ವಾಹಿನಿಯಿಂದ ರೆಡ್ಡಿ ಸಹೋದರರಿಗೆ ನಯಾ ಪೈಸೆ ಲಾಭವಿಲ್ಲ. ತಿಂಗಳಿಗೆ ಏನಿಲ್ಲಾ ಎಂದರೂ ಹೆಚ್ಚು ಕಡಿಮೆ ರು.3 ಕೋಟಿ ಜನಶ್ರೀ ಮೇಲೆ ಸುರಿಯಬೇಕಾಗಿದೆ. ಇನ್ನೂ ನಾಲ್ಕು ವರ್ಷ ಇದೇ ಹುಮ್ಮಸ್ಸಿನಲ್ಲಿ ಚಾನಲನ್ನು ಮುನ್ನಡೆಸಿದರೆ ಆಗ ಲಾಭ ನಿರೀಕ್ಷಿಸಬಹುದು.

ಅಲ್ಲಿಯವರೆಗೂ ಜನಶ್ರೀ ವಾಹಿನಿಯನ್ನು ನಿಭಾಯಿಸುವುದು ಹೇಗೆ? ಅಷ್ಟು ತಾಳ್ಮೆ, ಸಹನೆ ರೆಡ್ಡಿ ಬ್ರದರ್ಸ್‌ಗೆ ಸದ್ಯಕ್ಕೆ ಇಲ್ಲ ಎನ್ನುತ್ತವೆ ಮೂಲಗಳು. ಒಂದು ಕಡೆ ಅದಿರು ರಫ್ತು ನಿಷೇಧ ಇನ್ನೊಂದು ಕಡೆ ಜನಶ್ರೀ ವಾಹಿನಿ ಕೈ ಕಚ್ಚುತ್ತಿರುವುದು ರೆಡ್ಡಿ ಬ್ರದರ್ಸ್‌ಗೆ ಪೀಕಲಾಟ ತಂದಿದೆ. ಜನಶ್ರೀ ವಿಲೀನದಿಂದ ಬಂದಷ್ಟು ಬರಲಿ ಎಂಬ ಲೆಕ್ಕಾಚಾರದಲ್ಲಿ ರೆಡ್ಡಿ ಬ್ರದರ್ಸ್ ಇದ್ದಾರೆ. (ದಟ್ಸ್‌ಕನ್ನಡ ಸಿನಿವಾರ್ತೆ)