ವಯಸ್ಸು 71 ಆದರೂ ಪುಟಿಯುವ ಚಿಲುಮೆಯಂತಿರುವ ಹಿರಿಯ ನಟಿ ಗಿರಿಜಾ ಲೋಕೇಶ್!

ಶ್ರೀಮಂತ ಕುಟುಂಬ ಗಿರಿಜಾ ಲೋಕೇಶ್!

ಗಿರಿಜಾ ಲೋಕೇಶ್‌ ಅವರ ತಂದೆ ವ್ಯಾಪಾರ ಮಾಡುತ್ತಿದ್ದರು. ಶ್ರೀಮಂತ ಕುಟುಂಬದಲ್ಲಿ ಹುಟ್ಟಿದ ಅವರು ಬಹಳ ಕಷ್ಟದ ದಿನಗಳನ್ನು ನೋಡಿದ್ದಾರೆ. ವ್ಯಾಪಾರದಲ್ಲಿ ನಷ್ಟವಾಗಿ ಇಡೀ ಕುಟುಂಬ ಕಷ್ಟಕ್ಕೆ ಸಿಲುಕಿತ್ತು. ಆಗ ಗಿರಿಜಾ ಅವರಿಗೆ ಕೇವಲ 14 ವರ್ಷ. ಆಗ ಹೊಟ್ಟೆ ಪಾಡಿಗಾಗಿ ರಂಗಭೂಮಿಯಲ್ಲಿ ದುಡಿಯಲು ಶುರು ಮಾಡಿದರು. ಸುಭದ್ರೆ, ದ್ರೌಪದಿ ಪಾತ್ರಗಳಲ್ಲಿ ನಟಿಸಿ ಮಿಂಚಿದರು. ನಾಟಕಗಳಲ್ಲಿ ನಟಿಸುವಾಗ ಗಿರಿಜಾ ಲೋಕೇಶ್‌ ಅವರು ತುಂಬಾ ಕಷ್ಟ ಪಟ್ಟಿದ್ದಾರೆ. ಗಿರಿಜಾ ಅವರ ತಾಯಿ ಹಾಡು ಹೇಳುವುದನ್ನು, ಡ್ಯಾನ್ಸ್‌ ಮಾಡುವುದನ್ನು ಕಲಿಸಿದರಂತೆ.

ನಾಟಕದಲ್ಲೇ ಪರಿಚಯವಾದ ಪತಿ-ಪತ್ನಿ!

ಭರತನಾಟ್ಯದಲ್ಲಿ ಪರಿಣಿತಿ ಪಡೆದ ಗಿರಿಜಾ ಲೋಕೇಶ್‌ ಅವರು ನಟಿಸಿದ ಮೊದಲ ನಾಟಕ 'ಸಾಮ್ರಾಟ್ ಅಶೋಕ್ ಕುಮಾರ್'. ಈ ಸಂದರ್ಭದಲ್ಲೇ ನಟ ಲೋಕೇಶ್ ಅವರ ಪರಿಚಯವಾಯಿತು. ಹಲವು ನಾಟಕಗಳಲ್ಲಿ ಜೊತೆಯಾಗಿ ನಟಿಸುತ್ತಿದ್ದ ಲೋಕೇಶರ ಜೊತೆ ಪ್ರೇಮಾಂಕುರವಾಗಿ ನಂತರ ಈ ಜೋಡಿ ಮದುವೆಯಾಯಿತು. ಈ ಮೂಲಕ ಮದುವೆಯಾದ ದಿನವೆ 'ಕಾಕನಕೋಟೆ' ನಾಟಕದಲ್ಲಿ ನಟಿಸಬೇಕಿತ್ತು. ಸುಬ್ಬಯ್ಯ ನಾಯ್ಡು ಕುಟುಂಬದ ಸೊಸೆಯಾದರು. ನಾಟಕಗಳಲ್ಲಿ ಮಾಡುತ್ತಾ ಬಳಿಕ ಸಿನಿಮಾ ಕ್ಷೇತ್ರಕ್ಕೂ ಈ ಜೋಡಿ ಎಂಟ್ರಿ ಕೊಟ್ಟಿತು. ಸಿನಿಮಾ ಕ್ಷೇತ್ರದಲ್ಲಿ ಲೋಕೇಶ್‌ ಅವರ ಸಾಧನೆಯ ಬಗ್ಗೆ ಮಾತನಾಡುವಂತಿಲ್ಲ. ಇಂದಿಗೂ ಜನ ಲೋಕೇಶ್‌ ಅವರನ್ನು ಮರೆತಿಲ್ಲ.

ಸಿನಿಮಾರಂಗದಲ್ಲಿ ಗಿರಿಜಾ ಲೋಕೇಶ್ ಸಾಧನೆ!

ಗಿರಿಜಾ ಲೋಕೇಶ್ ಕನ್ನಡ ಚಿತ್ರರಂಗದ ಕಲಾತ್ಮಕ ನಟಿ ಮತ್ತು ರಂಗಭೂಮಿ ಕಲಾವಿದೆ. ಇವರು ನಟಿಸಿದ 'ಭುಜಂಗಯ್ಯನ ದಶಾವತಾರಗಳು' ಮತ್ತು 'ಸಿದ್ಲಿಂಗು' ಚಿತ್ರಗಳಿಗೆ ಕರ್ನಾಟಕ ರಾಜ್ಯದ ಅತ್ತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ಲಭಿಸಿವೆ. ಕನ್ನಡ ಚಿತ್ರರಂಗದಲ್ಲಿ ಟಾಕಿಂಗ್ ಸ್ಟಾರ್ ಎಂದೇ ಗುರುತಿಸಿಕೊಂಡಿರುವ ಸೃಜನ್ ಲೋಕೇಶ್ ಇವರ ಮಗ. ಪುತ್ರಿ ಪೂಜಾ ಲೋಕೇಶ್ ಕೂಡ ಚಿತ್ರರಂಗ ಮತ್ತು ಕಿರುತೆರೆಯಲ್ಲಿ ಗುರುತಿಸಿಕೊಂಡಿದ್ದಾರೆ. ರಂಗಭೂಮಿಯಿಂದ ಚಿತ್ರರಂಗಕ್ಕೆ ಬಂದು ತಮ್ಮದೇ ಛಾಪು ಮೂಡಿಸಿದ ಕಲಾವಿದೆ.

ಕಿರುತೆರೆಯಲ್ಲಿ ಗಿರಿಜಮ್ಮನ ಹವಾ!

ಚಿತ್ರರಂಗ ಮಾತ್ರವಲ್ಲದೇ ಕಿರುತೆರೆಯಲ್ಲೂ ಸಕ್ರಿಯವಾಗಿ ಹಲವಾರು ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಕ್ರೇಜಿ ಕರ್ನಲ್, ಮುತ್ತಿನ ತೋರಣ ಇವರು ನಟಿಸಿದ ಪ್ರಮುಖ ಟೆಲಿ ಸೀರಿಯಲ್‌ಗಳು. ಇಷ್ಟೇ ಅಲ್ಲದೇ, ಇದೀಗ ಸತ್ಯ ಎಂಬ ಧಾರಾವಾಹಿಯಲ್ಲಿ ಗಿರಿಜಾ ಲೋಕೇಶ್‌ ಅವರು ನಟಿಸುತ್ತಿದ್ದಾರೆ. 71 ವರ್ಷ ವಯಸ್ಸಾದರೂ ಎಲ್ಲಾ ಪಾತ್ರಕ್ಕೂ ಸೈ ಎನ್ನುವ ಗಿರಿಜಮ್ಮ ಅವರು, ತುಂಬಾ ಆಕ್ಟೀವ್‌ ಆಗಿರುತ್ತಾರೆ. ಸೀರಿಯಲ್‌ ಅಷ್ಟೇ ಅಲ್ಲದೇ, ಅಡುಗೆ ಕಾರ್ಯಕ್ರಮಗಳಲ್ಲೂ ಕಾಣಿಸಿಕೊಳ್ಳುತ್ತಾರೆ. ಗಿರಿಜಾ ಲೋಕೇಶ್‌ ಅವರು ತುಂಬಾ ತಮಾಷೆಯಾಗಿ, ತಾವು ನಗುತ್ತಾ ಎಲ್ಲರನ್ನೂ ನಗಿಸುತ್ತಿರುತ್ತಾರೆ.