ಪರಬಾಷೆಯಲ್ಲಿ ಮಿಂಚಲು ರೆಡಿಯಾದ ಕೌಸ್ತುಭ ಮಣಿ

'ನನ್ನರಸಿ ರಾಧೆ'ಯ ಇಂಚರಾ ಪಾತ್ರಧಾರಿ

ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ಧಾರಾವಾಹಿಗಳ ಪೈಕಿ ನನ್ನರಸಿ ರಾಧೆ ಕೂಡ ಒಂದು. ನನ್ನರಸಿ ರಾಧೆ ಧಾರಾವಾಹಿಯಲ್ಲಿ ಇಂಚರಾ ಪಾತ್ರದ ಮೂಲಕ ಕನ್ನಡಿಗರ ಮನೆ ಮನ ಗೆದ್ದಿರುವವರು ನಟಿ ಕೌಸ್ತುಭ ಮಣಿ. ಇದೀಗ ಇದೇ ನಟಿ ಕೌಸ್ತುಭ ಮಣಿ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡುತ್ತಿದ್ದಾರೆ. ಬೆಳ್ಳಿತೆರೆ ಮೇಲು ತಮ್ಮ ಛಾಪು ಮೂಡಿಸಲು ಕೌಸ್ತುಭ ಮಣಿ ಸಜ್ಜಾಗಿದ್ದಾರೆ. ಅಸಲಿಗೆ, ನಟಿ ಕೌಸ್ತುಭ ಮಣಿಗೆ ನಟಿಯಾಗಬೇಕು ಎಂಬ ಆಸೆ, ಕನಸು ಇರಲಿಲ್ಲ. ಖಾಸಗಿ ಕಂಪನಿಯೊಂದರಲ್ಲಿ ಟೆಕ್ಕಿಯಾಗಿ ಕೆಲಸ ಮಾಡುತ್ತಿದ್ದ ಕೌಸ್ತುಭ ಮಣಿ ಆಕಸ್ಮಿಕವಾಗಿ ಬಣ್ಣದ ಬದುಕಿಗೆ ಕಾಲಿಟ್ಟರು.

ಮಾನ್ವಿತಾ ಕಾಮತ್‌ರಿಂದ ಧಾರಾವಾಹಿ ಅವಕಾಶ

ನಟಿ ಮಾನ್ವಿತಾ ಕಾಮತ್ ಅವರ ಕೃಪೆಯಿಂದ ಬಣ್ಣದ ಪ್ರಪಂಚಕ್ಕೆ ಕೌಸ್ತುಭ ಮಣಿ ಕಾಲಿಟ್ಟರು. ಅಷ್ಟಕ್ಕೂ, ಫ್ಯಾಶನ್ ಶೋವೊಂದರಲ್ಲಿ ನಟಿ ಕೌಸ್ತುಭ ಮಣಿ ಅವರನ್ನ ಮಾನ್ವಿತಾ ಕಾಮತ್ ಭೇಟಿ ಮಾಡಿದರು. ಬಳಿಕ ಅವರನ್ನ ಧಾರಾವಾಹಿಯ ತಂಡಕ್ಕೆ ನಟಿ ಮಾನ್ವಿತಾ ಕಾಮತ್ ಪರಿಚಯಿಸಿದರು. ನನ್ನರಸಿ ರಾಧೆ ಧಾರಾವಾಹಿಯ ಲುಕ್ ಟೆಸ್ಟ್ ಮತ್ತು ಆಡಿಷನ್‌ನಲ್ಲಿ ಪಾಸ್ ಆದ ಕೌಸ್ತುಭ ಮಣಿ ಕಿರುತೆರೆ ಲೋಕಕ್ಕೆ ಕಾಲಿಟ್ಟೇ ಬಿಟ್ಟರು.

'ಕೋಡಲು ಮೀಕು ಜೋಹಾರ್ಲು'

ನಟಿ ಕೌಸ್ತುಭ ಮಣಿ ಇದೀಗ ತೆಲುಗು ಕಿರುತೆರೆ ಲೋಕಕ್ಕೆ ಪದಾರ್ಪಣೆ ಮಾಡಿದ್ದಾರೆ. ತಮ್ಮ ಮೊಟ್ಟ ಮೊದಲ ತೆಲುಗು ಸೀರಿಯಲ್ 'ಕೋಡಲು ಮೀಕು ಜೋಹರ್ಲು'ಗೆ ನಟಿ ಕೌಸ್ತುಭ ಮಣಿ ಸಹಿ ಹಾಕಿದ್ದಾರೆ. ಈಗಾಗಲೇ 'ಕೋಡಲು ಮೀಕು ಜೋಹರ್ಲು' ಧಾರಾವಾಹಿಯ ಪ್ರೋಮೋ ಬಿಡುಗಡೆಯಾಗಿದೆ. 'ಕೋಡಲು ಮೀಕು ಜೋಹರ್ಲು' ಧಾರಾವಾಹಿಯಲ್ಲೂ ನಟಿ ಕೌಸ್ತುಭ ಮಣಿ ಪ್ರಮುಖ ಪಾತ್ರ ನಿಭಾಯಿಸುತ್ತಿದ್ದಾರೆ. ಅಂದಹಾಗೆ, 'ಕೋಡಲು ಮೀಕು ಜೋಹರ್ಲು ಧಾರಾವಾಹಿ ಅತೀ ಶೀಘ್ರದಲ್ಲೇ ಜೀ ತೆಲುಗು ವಾಹಿನಿಯಲ್ಲಿ ಪ್ರಸಾರವಾಗಲಿದೆ.

ಉತ್ಸಾಹದಿಂದ ಎದುರು ನೋಡುತ್ತಿರುವ ಕೌಸ್ತುಭ ಮಣಿ

ಇನ್ನು ಕೌಸ್ತುಭ ಮಣಿ ಕೂಡ ತಮ್ಮ ಹೊಸ ಪ್ರಾಜೆಕ್ಟ್ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಹೊಸ ಪಾತ್ರದ ಬಗ್ಗೆ ತುಂಬಾ ಎಕ್ಸೈಟ್‌ಮೆಂಟ್ ಇದೆ. ಅದರ ಜೊತೆಗೆ ಅಷ್ಟೇ ಭಯ ಕೂಡ ಇದೆ. ಕನ್ನಡದ ಜನ ನನ್ನ ಹರಸಿ ಬೆಳೆಸಿದ್ದಾರೆ. ಅದೇ ಪ್ರೀತಿ ಮುಂದೆ ಕೂಡ ಸಿಗಲಿ ಅನ್ನೋದು ನನ್ನ ಆಶಯ ಎಂದಿದ್ದಾರೆ ನಟಿ . ಒಟ್ಟಿನಲ್ಲಿ ಕನ್ನಡದ ನಟಿಯರು ಒಂದೇ ಧಾರಾವಾಹಿಯಲ್ಲಿ ಮಿಂಚೋಕೆ ರೆಡಿಯಾಗಿರೋದು ಪ್ರೇಕ್ಷಕರಿಗೆ ಸಂತಸ ತಂದಿದೆ. ತೆಲುಗು ನಾಡಿನಲ್ಲಿ ಕನ್ನಡಿಗರು ಇನ್ನೂ ದೊಡ್ಡ ಮಟ್ಟದಲ್ಲಿ ಬೆಳೆಯಲಿ ಎಂಬುದು ಪ್ರತಿಯೊಬ್ಬರ ಹಾರೈಕೆಯಾಗಿದೆ