'ಮನಸಾರೆ' ಧಾರಾವಾಹಿಯನ್ನು ಮನಸಾರೆ ಸ್ಮರಿಸಿದ ನಟಿ ಪ್ರಿಯಾಂಕ ಚಿಂಚೋಳಿ

'ಮನಸಾರೆ' ತಂದೆ ಮಗಳ ಭಾಂದವ್ಯ

'ಮನಸಾರೆ' ಧಾರವಾಹಿಯಲ್ಲಿ ಪ್ರಾರ್ಥನಾ ಎಂಬ ಮಗಳು ತನ್ನ ತಂದೆಯ ಪ್ರೀತಿಯನ್ನು ಪಡೆಯಲು ಏನೆಲ್ಲ ಮಾಡುತ್ತಾಳೆ ಎಂಬುದೇ ಮುಖ್ಯ ಕಥಾವಸ್ತು. ಈ ಧಾರಾವಾಹಿ ಅನುಭವದ ಬಗ್ಗೆ ಮಾತನಾಡಿದ ನಟಿ ಪ್ರಿಯಾಂಕಾ ಚಿಂಚೋಳಿಯವರು "ಪೌರಾಣಿಕ ಧಾರವಾಹಿಗಳ ಹೊರತಾಗಿಯೂ ನನಗೆ ಬೇರೆ ದೈನಂದಿನ ಪಾತ್ರಗಳನ್ನು ಮಾಡಲು ಬರುತ್ತದೆ ಎಂಬುದನ್ನು ಸಾಬೀತು ಮಾಡಬೇಕಿತ್ತು. ಅದಕ್ಕೆ ಸರಿಯಾಗಿ ಮನಸಾರೆ ಧಾರಾವಾಹಿ ಸಿಕ್ಕಾಗ ನನ್ನಾಸೆಗೆ ಪೂರಕವಾದ ಬುನಾದಿ ಇದು ಎಂದು ಅರಿವಾಯಿತು. ಹಾಗಾಗಿ ಮನಸಾರೆ ಧಾರಾವಾಹಿಯನ್ನು ಒಪ್ಪಿಕೊಂಡೆ. ನನ್ನ ಅಪೇಕ್ಷೆಗೆ ಸರಿಯಾಗಿ ಇದು ನನಗೆ ಒಳ್ಳೆಯ ಫೇಮನ್ನು ಕೊಟ್ಟಿದೆ " ಎಂದು ತಮ್ಮ ಸಂತಸ ವ್ಯಕ್ತಪಡಿಸಿದ್ದರು.

'ಮನಸಾರೆ'ಗೆ ಮೂರು ವರ್ಷ

ಇದೇ ಫೆಬ್ರವರಿ 24ರಂದು 'ಮನಸಾರೆ'ಧಾರಾವಾಹಿ ತೆರೆ ಕಂಡು ಮೂರು ವರ್ಷ ಸಂದಿದ್ದರಿಂದ ನಟಿ ಪ್ರಿಯಾಂಕಾ ಚಿಂಚೋಳಿಯವರು ತಮ್ಮ ಇನ್ಸ್ಟಾಗ್ರಾಮ್ ನಲ್ಲಿ ಈ ಬಗ್ಗೆ ಪೋಸ್ಟ್ ಒಂದನ್ನು ಹಾಕಿಕೊಂಡು ತಮ್ಮ ಧಾರಾವಾಹಿ ಜರ್ನಿಯನ್ನು ಮೆಲುಕು ಹಾಕಿದ್ದಾರೆ. ಪೌರಾಣಿಕ ಪಾತ್ರದ ಹೊರತಾಗಿ ಜನ ಗುರುತಿಸುವಂತೆ ಮಾಡಿದ್ದು ಮನಸಾರೆ ಧಾರಾವಾಹಿ ಎಂದು ಪ್ರಿಯಾಂಕಾ ಹೇಳಿಕೊಂಡಿದ್ದಾರೆ.

'ಮನಸ್ಸೆಲ್ಲಾ ನೀನೆ'ಯಲ್ಲೂ ಮೋಡಿ

'ಮನಸಾರೆ' ಧಾರಾವಾಹಿಯ ನಂತರ ಸಹಜವಾಗಿ ಕಿರುತೆರೆಯಿಂದ ದೂರವಿದ್ದ ಪ್ರಿಯಾಂಕಾ ಸದ್ಯ ರಾಗಾಳಾಗಿ ಕಿರುತೆರೆಯಲ್ಲಿ ಮೋಡಿ ಮಾಡುತ್ತಿದ್ದಾರೆ. ಹೌದು , ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ 'ಮನಸ್ಸೆಲ್ಲಾ ನೀನೆ' ಧಾರಾವಾಹಿಯಲ್ಲಿ ನಾಯಕಿ ರಾಗಾಳಾಗಿ ಪ್ರಿಯಾಂಕಾ ಅಭಿನಯಿಸುತ್ತಿದ್ದಾರೆ‌. ಅಂದ ಹಾಗೆ 'ಮನಸ್ಸೆಲ್ಲಾ ನೀನೆ' ಧಾರಾವಾಹಿ ಆರಂಭವಾದಾಗ ರಶ್ಮಿ ಪ್ರಭಾಕರ್ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ತದ ನಂತರ ಕಾರಣಾಂತರಗಳಿಂದ ರಶ್ಮಿ ಪ್ರಭಾಕರ್ ಪಾತ್ರಕ್ಕೆ ವಿದಾಯ ಹೇಳಿದಾಗ ಆ ಜಾಗಕ್ಕೆ ಬಂದವರೇ ಪ್ರಿಯಾಂಕಾ. ಸದ್ಯ ಕಿರುತೆರೆಯಲ್ಲಿ ಬ್ಯುಸಿಯಾಗಿರುವ ಪ್ರಿಯಾಂಕಾ ಹಿರಿತೆರೆಯಲ್ಲಿಯೂ ನಟನಾ ಪ್ರತಿಭೆಯನ್ನು ಪಸರಿಸಿದ ಬೆಡಗಿ.