'ಮರಳಿ ಮನಸಾಗಿದೆ' ಎಂದು ಕಿರುತೆರೆಯಲ್ಲಿ ಮೋಡಿ ಮಾಡಿದ ಸಹಜ ಸುಂದರಿ ಶಿಲ್ಪಾ ಶೆಟ್ಟಿ

ರಂಗಭೂಮಿ ಕಲಾವಿದೆ ಶಿಲ್ಪಾ ಶೆಟ್ಟಿ

'ಮಳೆಹಕ್ಕಿ' , 'ಐನ್ ಸ್ಟೈನ್' ,'ಚಂದ್ರಮ ವೃತ್ತಾಂತ' ನಾಟಕಗಳಲ್ಲಿ ಬಣ್ಣ ಹಚ್ಚಿದ ಶಿಲ್ಪಾರನ್ನು ನಂತರ ಆಕರ್ಷಿಸಿದ್ದು ನೃತ್ಯ ಹಾಗೂ ಸಂಗೀತ. ನಾಟಕದ ಜೊತೆಗೆ ಫಿಲ್ಮಿ ಡ್ಯಾನ್ಸ್ ಹಾಗೂ ಸುಗಮ ಸಂಗೀತವನ್ನು ಕಲಿತ ಶಿಲ್ಪಾ ಶೆಟ್ಟಿ ನಂತರ ಮಾಡೆಲಿಂಗ್ ಜಗತ್ತಿನಲ್ಲಿ ಕಾಣಿಸಿಕೊಂಡಿದ್ದರು.

ಮಾಡೆಲಿಂಗ್ ಜಗತ್ತಿನಲ್ಲಿ ಮೋಡಿ ಮಾಡಿದ ಚೆಲುವೆ ​

ಮಾಡೆಲಿಂಗ್ ನತ್ತ ಮುಖ ಮಾಡಿದ ಶಿಲ್ಪಾ ಆಗಷ್ಟೇ ನಡೆಯುತ್ತಿದ್ದ ಮಿಸ್ ಇಂಡಿಯಾ ಸ್ಪರ್ಧೆಯ ಆಡಿಷನ್‌ನಲ್ಲಿ ಭಾಗವಹಿಸುವ ಅವಕಾಶವನ್ನು ಪಡೆದುಕೊಂಡರು. ಆದರೆ ಆಡಿಶನ್‌ನಲ್ಲಿ ಭಾಗವಹಿಸಿದ ಆಕೆ ಆಯ್ಕೆಯಾಗಲಿಲ್ಲ. ಆದರೆ ಮುಂದೆ ರಾಂಪ್ ವಾಕ್ ಹಾಗೂ ಫ್ಯಾಶನ್ ಶೋಗಳಲ್ಲಿ ಮಿಂಚಿದರು‌. ಮುಂದೆ ನಟನಾ ಜಗತ್ತಿಗೆ ಕಾಲಿಡುವ ನಿರ್ಧಾರ ಮಾಡಿದ ಶಿಲ್ಪಾ ಓದಿಗೆ ವಿದಾಯ ಹೇಳಿ ಬೆಂಗಳೂರಿಗೆ ಕಾಲಿಟ್ಟರು.

ಕೋಸ್ಟಲ್‌ವುಡ್‌ನಲ್ಲಿ ಬ್ಯುಸಿ

ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಎರಡು ಕನಸು ಧಾರಾವಾಹಿಗೆ ಆಯ್ಕೆ ಆದ ಶಿಲ್ಪಾ ಶೆಟ್ಟಿ ನಾಯಕಿ ಸಹಜ ಪಾತ್ರಕ್ಕೆ ಜೀವ ತುಂಬಿದರು. ಮೊದಲ ಧಾರಾವಾಹಿಯಲ್ಲಿಯೇ ನಾಯಕಿಯಾಗಿ ನಟಿಸಿದ ಶಿಲ್ಪಾ ನಂತರ ಹಾರಿದ್ದು ಕೋಸ್ಟಲ್‌ವುಡ್‌ಗೆ. 'ಗಿರ್ ಗಿಟ್' ಎನ್ನುವ ತುಳು ಸಿನಿಮಾದಲ್ಲಿ ಅಭಿನಯಿಸಿದ್ದ ಶಿಲ್ಪಾ ಶೆಟ್ಟಿ ಮುಂದೆ ಕಾಣಿಸಿಕೊಂಡಿದ್ದು ಹಿರಿತೆರೆಯಲ್ಲಿ.

ಸಿನಿಮಾದಲ್ಲೂ ಚಿರಪರಿಚಿತ

'ನ್ಯೂರಾನ್' ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸುವ ಮೂಲಕ ಕಾಲಿಟ್ಟ ಈಕೆ ಮುಂದೆ ರಮೇಶ್ ಅರವಿಂದ್ ನಿರ್ದೇಶನದ 100 ಚಿತ್ರದಲ್ಲಿಯೂ ಬಣ್ಣ ಹಚ್ಚಿದ್ದಾರೆ. ಡಾರ್ಲಿಂಗ್ ಕೃಷ್ಣ ಅಭಿನಯದ 'ಶುಗರ್ ಫ್ಯಾಕ್ಟರಿ' ಸಿನಿಮಾದಲ್ಲಿಯೂ ನಾಯಕಿಯಾಗಿ ಅಭಿನಯಿಸಿರುವ ಈಕೆ ಕಿರುತೆರೆ ಹಿರಿತೆರೆ ಎರಡನ್ನು ಸರಿದೂಗಿಸಿಕೊಂಡು ಸಾಗುತ್ತಿದ್ದಾರೆ.