10 ದಿನ ಸೋಶಿಯಲ್ ಮೀಡಿಯಾದಿಂದ ದೂರವಿದ್ದ ಶ್ವೇತಾ ಪ್ರಸಾದ್: ಚೀಟ್ ಡೇ ದಿನ ಹೇಳಿದ್ದೇನು?

ಸೋಶಿಯಲ್ ಮೀಡಿಯಾ ಮೂಲಕ ಜನರನ್ನು ಬೇರೆ ಬೇರೆ ವಿಚಾರಗಳಲ್ಲಿ ಸೆಲಬ್ರಿಟಿಗಳು ಗೈಡ್ ಮಾಡುತ್ತಿರುವ ಬೆನ್ನಲ್ಲೇ ಇದೀಗ ಈ ಮೀಡಿಯಾ ಮೇನಿಯದಿಂದ ಹೊರಬರಲು ಹಲವಾರು ಸೆಲಬ್ರಿಟಿಗಳು ಜನರಿಗೆ ಸಹಾಯ ಮಾಡುತ್ತಿದ್ದಾರೆ. ಈ ಸಾಲಿಗೆ ನಟಿ ಶ್ವೇತಾ ಪ್ರಸಾದ್ ಕೂಡ ಸೇರಿದ್ದಾರೆ.

ಹೌದು! ಇತ್ತೀಚೆಗೆ ಸೋಶಿಯಲ್ ಮೀಡಿಯಾ ಡೇಟಾಕ್ಸ್ ಒಂದು ಟ್ರೆಂಡ್ ಆಗಿ ಬಿಟ್ಟಿದೆ. ಈ ಟ್ರೆಂಡ್‌ನಲ್ಲಿ ಇದೀಗ ನಟಿ ಶ್ವೇತಾ ಪ್ರಸಾದ್ ಭಾಗಿಯಾಗಿದ್ದು, ಬರೋಬ್ಬರಿ 10 ದಿನಗಳ ಕಾಲ ಸೋಶಿಯಲ್ ಮೀಡಿಯಾದಿಂದ ದೂರವಿದ್ದು ಇದೀಗ ಅವರ ಅನುಭವವನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದಾರೆ.

ಚೀಟ್ ಡೇ ದಿನ ಅನುಭವ ಹಂಚಿಕೊಂಡ ಶ್ವೇತಾ

ಹತ್ತು ದಿನಗಳ ಕಾಲ ಸೋಶಿಯಲ್ ಮೀಡಿಯಾ ಅಂದರೆ ಇನ್‌ಸ್ಟಾಗ್ರಾಂ ಹಾಗೂ ಫೇಸ್‌ಬುಕ್ ಇತ್ಯಾದಿಯಿಂದ ದೂರವಿದ್ದ ನಟಿ ಶ್ವೇತಾ ಪ್ರಸಾದ್ 10ನೇ ದಿನವನ್ನು 'ಚೀಟ್ ಡೇ' ಎಂದು ಕರೆಯುತ್ತಾ ಮತ್ತೆ ಇನ್‌ಸ್ಟಾಗ್ರಾಂಗೆ ವಾಪಸ್ ಆಗಿ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.

ಹತ್ತು ದಿನದ ಅನುಭವ ಹಂಚಿಕೊಂಡ ಶ್ವೇತಾ

ತಮ್ಮ ಅನುಭವದ ಬಗ್ಗೆ ಮಾತನಾಡಿದ ಶ್ವೇತಾ "10 ದಿನಗಳ ಕಾಲ ಸೋಶಿಯಲ್ ಮೀಡಿಯಾದಿಂದ ದೂರವಿರುವುದು ಬಹಳ ಕಷ್ಟದ ವಿಚಾರ. ನಾನು 10 ದಿನ ಪೂರೈಸಿದ್ದೇನೆ ಎಂದು ಬಹಳ ಖುಷಿ ಇದೆ. ಪೂರ್ತಿ 31 ದಿನಗಳ ಸೋಶಿಯಲ್ ಮೀಡಿಯಾ ಡೇಟಾಕ್ಸನ್ನು ಖಂಡಿತವಾಗಿಯೂ ಪೂರ್ಣಗೊಳಿಸುತ್ತೇನೆ. ಆದರೆ ಈ ಹತ್ತನೆಯ ದಿನವನ್ನು ಚೀಟ್ ಡೇ ಆಗಿ ಪರಿಗಣಿಸಿ ಇಲ್ಲಿ ನಿಮ್ಮ ಮುಂದೆ ಬಂದು ನನ್ನ ಅನುಭವ ಹೇಳುತ್ತಿದ್ದೇನೆ" ಎಂದು ಇನ್‌ಸ್ಟಾಗ್ರಾಂನಲ್ಲಿ ಬರೆದುಕೊಂಡಿದ್ದಾರೆ.

ಸ್ಕ್ರೀನ್ ಟೈಮ್ ಕಡಿಮೆ ಆಗ್ಬೇಕು

"ಅಬ್ಬಬ್ಬಾ, ನಾವು ಇನ್‌ಸ್ಟಾಗ್ರಾಂ, ಫೇಸ್‌ಬುಕ್ ಎಂದು ಸ್ಕ್ರಾಲ್ ಮಾಡುವಾಗ ಸಮಯದ ಅರಿವಿಲ್ಲದಷ್ಟು ಬಳಸುತ್ತಾ ಹೋಗುತ್ತೇವೆ. ಇದೇ ಸಮಯವನ್ನು ಬೇರೆ ಬೇರೆ ಹಲವಾರು ಒಳ್ಳೆಯ ಚಟುವಟಿಕೆಗಳಲ್ಲಿ ಬಳಸಬಹುದು. ಅಲ್ಲದೆ ಈ ರೀತಿ ಸ್ಕ್ರೀನ್ ಟೈಮ್ ಕಮ್ಮಿ ಮಾಡುವುದರಿಂದ ನಮ್ಮ ಮಾನಸಿಕ ಹಾಗು ದೈಹಿಕ ಆರೋಗ್ಯಕ್ಕೂ ಬಹಳಷ್ಟು ಒಳ್ಳೆಯ ಪರಿಣಾಮಗಳಾಗುತ್ತದೆ" ಎಂದು ತಮ್ಮ ಸೋಶಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.

ಸೋಶಿಯಲ್ ಮೀಡಿಯಾ ಡಿಟಾಕ್ಸ್

"ಇಂದಿನ ಬ್ಯುಸಿ ಜೀವನದಲ್ಲಿ ನಾವು ನಮ್ಮ ಬಗ್ಗೆ ಕಾಳಜಿ ತೆಗೆದುಕೊಳ್ಳಲು ಮರೆತು ಹೋಗುತ್ತೇವೆ. ಅಲ್ಲದೆ ಈ ಸೋಶಿಯಲ್ ಮೀಡಿಯಾ ಇಂದು ನಮ್ಮ ಬಹಳಷ್ಟು ಸಮಯವನ್ನು ಹಾಳು ಮಾಡುತ್ತದೆ. ಇದೆಲ್ಲದರಿಂದ ಎಚ್ಚರವಾಗಿದ್ದುಕೊಂಡು ಸಮಯದ ಸದುಪಯೋಗ ಮಾಡುವಲ್ಲಿ ನಾವು ಒಂದಷ್ಟು ಹೆಜ್ಜೆಗಳನ್ನು ಇಡಬೇಕಾಗುತ್ತದೆ. ಆ ನಿಟ್ಟಿನಲ್ಲಿ ಈ ರೀತಿ ಸೋಶಿಯಲ್ ಮೀಡಿಯಾ ಡೇಟಾಕ್ಸ್ ಬಹಳಷ್ಟು ತಾಳ್ಮೆ ಹಾಗೂ ಹೊಸ ಜೀವನ ಪದ್ಧತಿಗಳಿಗೆ ಅನುಕೂಲ ಮಾಡಿಕೊಡುತ್ತದೆ." ಎಂದಿದ್ದಾರೆ.

ಕೊನೆಯದಾಗಿ ನಟಿಸಿದ್ದು 'ರಾಧಾರಮಣ'ದಲ್ಲಿ!

ಅಂದ ಹಾಗೆ ನಟಿ ಶ್ವೇತಾ ಪ್ರಸಾದ್ ಅವರು ಕೊನೆಯದಾಗಿ 'ರಾಧಾ ರಮಣ' ಧಾರಾವಾಹಿಯಲ್ಲಿ ರಾಧಾ ಮಿಸ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಅದಾದ ಮೇಲೆ ಧಾರಾವಾಹಿ ಮಧ್ಯದಲ್ಲಿಯೇ ಹೊರ ಬಂದ ಇವರು ಡಿಜಿಟಲ್ ಮೀಡಿಯಾಗೆ ಹೆಚ್ಚು ಫೋಕಸ್ ಮಾಡಿದರು. ಇದೀಗ ಫುಲ್ ಟೈಮ್ ಯೋಗಾಭ್ಯಾಸ ಮಾಡಿಕೊಂಡು ತಮ್ಮ ರಿಲ್ಯಾಕ್ಸ್ ಜೀವನವನ್ನು ಆನಂದಿಸುತ್ತಿದ್ದಾರೆ.