ತಂದೆಯ ವಿರುದ್ಧವೇ ಹತ್ಯೆ ಯತ್ನದ ದೂರು ದಾಖಲಿಸಿದ ಧಾರಾವಾಹಿ ನಟಿ

ಕುಂಕುಮ ಭಾಗ್ಯ ಧಾರಾವಾಹಿ ನಟಿ

ಝೀ ಚಾನೆಲ್‌ನಲ್ಲಿ ಪ್ರಸಾರವಾಗುವ ಹಿಂದಿ ಧಾರಾವಾಹಿ ಕುಂಕುಮ ಭಾಗ್ಯದಲ್ಲಿ ನಟಿ ತೃಪ್ತಿ ಶಂಖಧರ್ ನಟಿಸುತ್ತಿದ್ದಾರೆ. ಅವರು ಒಂದು ಹಿಂದಿ ಸಿನಿಮಾದಲ್ಲಿಯೂ ನಟಿಸಿದ್ದಾರೆ. ಇದೀಗ ಆಕೆ ತಂದೆಯ ವಿರುದ್ಧವೇ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿದ್ದಾರೆ.

'ಕತ್ತಿಯಿಂದ ಕತ್ತರಿಸುವ ಯತ್ನ ಮಾಡಿದ್ದಾರೆ'

ತಂದೆಯ ಕುರಿತು ಐದು ವಿಡಿಯೋಗಳನ್ನು ಇನ್‌ಸ್ಟಾಗ್ರಾಂ ನಲ್ಲಿ ಹಾಕಿರುವ ನಟಿ ತೃಪ್ತಿ, 'ನನ್ನ ತಂದೆ ನನಗೆ ಕಿರುಕುಳ ನೀಡುತ್ತಿದ್ದಾರೆ. ನನ್ನ ಮೇಲೆ ಹಲ್ಲೆ ಮಾಡಿದ್ದಾರೆ. ನನ್ನನ್ನು ಕತ್ತಿಯಿಂದ ಕತ್ತರಿಸಲು ಸಹ ಯತ್ನಿಸಿದರು' ಎಂದಿರುವ ನಟಿ ಕೈ ಮೇಲೆ ಆಗಿರುವ ಗಾಯದ ಗುರುತು ಸಹ ವಿಡಿಯೋದಲ್ಲಿ ತೋರಿಸಿದ್ದಾರೆ.

ಮದುವೆ ಆಗುವಂತೆ ಪೀಡಿಸುತ್ತಿದ್ದಾರೆ: ತೃಪ್ತಿ ಶಂಖಧರ್

ಯಾವುದೋ ಹುಡುಗನೊಂದಿಗೆ ಮದುವೆ ಆಗುವಂತೆ ನನ್ನನ್ನು ಪೀಡಿಸುತ್ತಿದ್ದಾರೆ. ನನಗಿನ್ನೂ ಹತ್ತೊಂಬತ್ತು ವರ್ಷ ವಯಸ್ಸು. ನನಗೆ ಆ ವ್ಯಕ್ತಿಯೊಂದಿಗೆ ಮದುವೆ ಆಗಲು ಇಷ್ಟವಿಲ್ಲ. ಆದರೆ ಅಪ್ಪ ನನ್ನನ್ನು ಬಿಡುತ್ತಿಲ್ಲ. ನನಗೆ ಯಾರಾದರೂ ಸಹಾಯ ಮಾಡಿ ಎಂದು ಅಂಗಲಾಚಿದ್ದಾರೆ ನಟಿ.

ಹಣ ವಾಪಸ್ ಕೇಳುತ್ತಿದ್ದಾರೆ: ತೃಪ್ತಿ

ನನ್ನನ್ನು ನಟಿ ಆಗುವಂತೆ ಮುಂಬೈ ಗೆ ಕಳಿಸಿದ್ದರು. ನನ್ನ ಒಂದು ಸಿನಮಾ ಈಗಷ್ಟೆ ಬಿಡುಗಡೆ ಆಗಿದೆ. ನಟಿಯಾಗಲು ಖರ್ಚು ಮಾಡಿದ್ದ ಹಣವನ್ನೆಲ್ಲಾ ವಾಪಸ್ ಕೊಡು ಎಂದು ನನ್ನನ್ನು ಪೀಡಿಸುತ್ತಿದ್ದಾರೆ. ನನಗೆ ಏನು ಮಾಡಬೇಕೆಂದು ಸಹ ಗೊತ್ತಾಗುತ್ತಿಲ್ಲ ಎಂದಿದ್ದಾರೆ ನಟಿ.

ನಟಿಯ ತಾಯಿ-ಸಹೋದರಿರಿಂದಲೂ ಆರೋಪ

ನಟಿಯ ತಾಯಿಯೂ ಸಹ ವಿಡಿಯೋದಲ್ಲಿ ಮಾತನಾಡಿದ್ದು, ಆತ ಬಹಳ ಅನುಮಾನದ ಪ್ರಾಣಿ. ಮನೆಯಲ್ಲಿ ಎಲ್ಲರಿಗೂ ಕಷ್ಟಗಳನ್ನು ಕೊಡುತ್ತಿದ್ದಾರೆ. ಮೊದಲಿನಿಂದಲೂ ಆತ ಹೀಗೆಯೇ ಇದ್ದ. ಆತನದ್ದು ಹಿಂಸಾತ್ಮಕ ಪ್ರವೃತ್ತಿ ಎಂದಿದ್ದಾರೆ. ನಟಿಯೂ ತನ್ನ ತಾಯಿ, ತಂಗಿ, ತಮ್ಮನನ್ನು ಕರೆದುಕೊಂಡು ಮನೆ ಬಿಟ್ಟು ಹೊರಗೆ ಹೋಗಿಬಿಟ್ಟಿದ್ದಾರೆ. ತಾವು ಸ್ವಿಚ್ಛೆಯಿಂದಲೇ ಮನೆ ಬಿಟ್ಟು ಬಂದಿದ್ದೇವೆ ಎಂದು ವಿಡಿಯೋ ಮಾಡಿ ಹೇಳಿದ್ದಾರೆ.