15 ವರ್ಷಗಳ ಬಳಿಕ ಮತ್ತೆ ನಗಿಸಲು ಬರುತ್ತಿದ್ದಾನೆ ಹೊಸ 'ಪಾಪ ಪಾಂಡು'

ಧಾರಾವಾಹಿಗಳ ಬಗ್ಗೆ ಹೆಚ್ಚು ಆಸಕ್ತಿ ಇಲ್ಲದವರನ್ನು ಕೂಡ ದಿನ ಟಿವಿ ಮುಂದೆ ಕೂರಿಸುವಂತೆ ಮಾಡಿದ್ದ ಸೀರಿಯಲ್ ಗಳಲ್ಲಿ 'ಪಾಪ ಪಾಂಡು' ಪ್ರಮುಖವಾಗಿತ್ತು. ಈ ಧಾರಾವಾಹಿಯನ್ನು ನೋಡದವರೆ ಇಲ್ಲ ಎಂದು ಹೇಳಬಹುದೆನೋ ಅಷ್ಟರ ಮಟ್ಟಿಗೆ ಈ ಸೀರಿಯಲ್ ದೊಡ್ಡ ಜನಪ್ರಿಯತೆಗಳಿಸಿತ್ತು. ವಿಶೇಷ ಅಂದರೆ ಈಗ 15 ವರ್ಷ ನಂತರ ಮತ್ತೆ ಇದೀಗ ನಿಮ್ಮನ್ನು ನಗಿಸಲು ಹೊಸ 'ಪಾಪಾ ಪಾಂಡು' ಬರುತ್ತಿದ್ದಾನೆ.

'ಪಾಪ ಪಾಂಡು' ಧಾರಾವಾಹಿ ಈಗ ಮತ್ತೆ ಬರುತ್ತಿದೆ. ಈ ಬಗ್ಗೆ ಧಾರಾವಾಹಿಯ ನಿರ್ಮಾಪಕರಾಗಿರುವ ಸಿಹಿ ಕಹಿ ಚಂದ್ರು 'ಫಿಲ್ಮಿಬೀಟ್ ಕನ್ನಡ'ದ ಜೊತೆಗೆ ಮಾತನಾಡಿದ್ದಾರೆ. ''ಮತ್ತೆ 'ಪಾಪಾ ಪಾಂಡು' ಧಾರಾವಾಹಿಯನ್ನು ತರುತ್ತಿದ್ದೇವೆ. ಇದು 'ಪಾಪಾ ಪಾಂಡು' ಸೀಸನ್ 2 ಎಂದು ಹೇಳಬಹುದು. 15 ವರ್ಷದ ನಂತರ ಆ ಧಾರಾವಾಹಿ ಏನಾಗುತ್ತದೆ ಎನ್ನುವುದನ್ನು ಇಟ್ಟುಕೊಂಡು ಮತ್ತೆ ಜನರ ಮುಂದೆ ಬರುತ್ತಿದ್ದೇವೆ.'' ಎಂದು ಹೇಳಿದ ಅವರು ಸದ್ಯದಲ್ಲಿಯೇ ಧಾರಾವಾಹಿಯ ಎಲ್ಲ ವಿವರಗಳನ್ನು ತಿಳಿಸಲಿದ್ದಾರಂತೆ.

ಇನ್ನು ಈ ಧಾರಾವಾಹಿಯ ಬಗ್ಗೆ ತುಂಬ ದೊಡ್ಡ ನಿರೀಕ್ಷೆ ಇರುವ ಕಾರಣ ತುಂಬ ಕಷ್ಟ ಪಟ್ಟು ಕೆಲಸ ಮಾಡಲಾಗುತ್ತಿದೆಯಂತೆ. ಈ ಬಾರಿಯ 'ಪಾಪಾ ಪಾಂಡು' ಕಲರ್ಸ್ ಸೂಪರ್ ವಾಹಿನಿಯಲ್ಲಿ ಪ್ರಸಾರ ಆಗಲಿದೆ.

ಅಂದಹಾಗೆ, ಆಗ 'ಪಾಪಾ ಪಾಂಡು' ಧಾರಾವಾಹಿ ಈ ಟಿವಿ ಕನ್ನಡದಲ್ಲಿ ಪ್ರಸಾರ ಆಗುತ್ತಿತ್ತು. 'ಪಾಪ ಪಾಂಡು' ಆಗಿ ಚಿದಾನಂದ್ ಹಾಗೂ ಅವರ ಶ್ರೀಮತಿ ಆಗಿ ಶಾಲಿನಿ ಕಾಣಿಸಿಕೊಂಡಿದ್ದರು.