'ಬಿಗ್ ಬಾಸ್' ಗ್ರ್ಯಾಂಡ್ ಫಿನಾಲೆ ತಲುಪಿರುವ ದೀಪಿಕಾ ಕಕ್ಕರ್ ಯಾರು.?

ಯಾರೀ ದೀಪಿಕಾ ಕಕ್ಕರ್ ಇಬ್ರಾಹಿಂ.?

ಕಲರ್ಸ್ ವಾಹಿನಿಯ 'ಸಸುರಾಲ್ ಸಿಮರ್ ಕಾ' ಧಾರಾವಾಹಿಯಲ್ಲಿ ಸಿಮರ್ ಭಾರದ್ವಾಜ್ ಪಾತ್ರದ ಮೂಲಕ ಜನಪ್ರಿಯತೆ ಪಡೆದುಕೊಂಡ ಕಿರುತೆರೆ ನಟಿ ದೀಪಿಕಾ ಕಕ್ಕರ್ ಇಬ್ರಾಹಿಂ. 'ಝಲಕ್ ದಿಖಲಾಜಾ-8', 'ನಚ್ ಬಲಿಯೇ-8' ಸೇರಿದಂತೆ ಕಿರುತೆರೆಯ ಹಲವು ಕಾರ್ಯಕ್ರಮಗಳಲ್ಲಿ ಭಾಗವಹಿಸಿರುವ ದೀಪಿಕಾ 'ಬಿಗ್ ಬಾಸ್-12'ನ ಸೆಲೆಬ್ರಿಟಿ ಸ್ಪರ್ಧಿ.

ಅಡುಗೆ ಮನೆಯಲ್ಲಿ ಹೆಚ್ಚು ಕಾಲ ಕಳೆದ ದೀಪಿಕಾ

ಕಳೆದ ಬಾರಿಯ 'ಬಿಗ್ ಬಾಸ್' ವಿನ್ನರ್ ಶಿಲ್ಪಾ ಶಿಂಧೆ ತರಹ ದೀಪಿಕಾ ಕಕ್ಕರ್ ಈ ಬಾರಿ ಹೆಚ್ಚು ಕಾಣಿಸಿಕೊಂಡಿದ್ದು ಅಡುಗೆ ಮನೆಯಲ್ಲಿ. 'ಬಿಗ್ ಬಾಸ್' ಮನೆಯ ಪವರ್ ಸೆಂಟರ್ ಆಗಿರುವ ಅಡುಗೆ ಮನೆಯಲ್ಲಿ ಇದ್ದುಕೊಂಡು, ಎಲ್ಲಾ ಸ್ಪರ್ಧಿಗಳಿಗೂ ಅಡುಗೆ ಮಾಡಿ ವೀಕ್ಷಕರ ಮನ ಗೆದ್ದಿದ್ದಾರೆ ದೀಪಿಕಾ ಕಕ್ಕರ್ ಇಬ್ರಾಹಿಂ.

ಮಾತಲ್ಲಿ ಎಲ್ಲರನ್ನೂ ಮೀರಿಸುವ ದೀಪಿಕಾ

ತಮ್ಮ ನಿಲುವುಗಳನ್ನು ಸ್ಪಷ್ಟವಾಗಿ ಹೊರಹಾಕುವ ದೀಪಿಕಾ ಕಕ್ಕರ್, ಯಾವತ್ತೂ ಡಬಲ್ ಗೇಮ್ ಆಡಿಲ್ಲ. ಮಾತಲ್ಲಿ ಎಲ್ಲರನ್ನೂ ಮೀರಿಸುವ ತಾಕತ್ತು ಇದ್ದರೂ, ವಾಕ್ಸಮರಗಳಿಗೆ ದೀಪಿಕಾ ಎಂದೂ ನಾಂದಿ ಹಾಡಿಲ್ಲ. ಯಾರ ಬಳಿಯೂ ಬಾಯಿಗೆ ಬಂದ ಹಾಗೆ ದೀಪಿಕಾ ಮಾತನಾಡಿಲ್ಲ. ಇದೇ ಕಾರಣಕ್ಕೆ ದೀಪಿಕಾ ಹಲವು ವೀಕ್ಷಕರ ಮೆಚ್ಚಿನ ಸ್ಪರ್ಧಿ ಆಗಿದ್ದಾರೆ.

ಘನತೆ ಕಾಪಾಡಿಕೊಂಡ ದೀಪಿಕಾ

ಇತರೆ ಸ್ಪರ್ಧಿಗಳ ಹಾಗೆ, ಟಿ.ಆರ್.ಪಿಗಾಗಿ ದೀಪಿಕಾ ಕೀಳು ಮಟ್ಟದ ಜಗಳಗಳನ್ನು ಮಾಡಿಕೊಳ್ಳಲಿಲ್ಲ. 'ಬಿಗ್ ಬಾಸ್' ಮನೆಯಲ್ಲಿ ಇಲ್ಲಿಯವರೆಗೂ ತಾಳೆ ಹಾಗೂ ಘನತೆಯನ್ನು ಕಾಪಾಡಿಕೊಳ್ಳುವಲ್ಲಿ ದೀಪಿಕಾ ಯಶಸ್ವಿ ಆಗಿದ್ದಾರೆ. ಹಾಗ್ನೋಡಿದ್ರೆ, ದೀಪಿಕಾ ಗೌರವಾನ್ವಿತ ಸ್ಪರ್ಧಿ ಅಂತ ಖುದ್ದು ಸಲ್ಮಾನ್ ಖಾನ್ ಹೊಗಳಿದ್ದರು.

ಟಾಸ್ಕ್ ಗಳಲ್ಲಿ ಪರ್ಫಾಮೆನ್ಸ್ ಹೇಗೆ.?

ದೈಹಿಕ ಚಟುವಟಿಕೆ ನೀಡಿದಾಗ, ಆಕ್ರಮಣಕಾರಿಯಾಗಿ ದೀಪಿಕಾ ನೂಕಾಡುತ್ತಿರಲಿಲ್ಲ. ಇತರೆ ಟಾಸ್ಕ್ ಗಳಲ್ಲಿ ತಮ್ಮ ಮಾನಸಿಕ ಸಾಮರ್ಥ್ಯವನ್ನ ತೋರಿಸಿ ದೀಪಿಕಾ ಪ್ರಬಲ ಸ್ಪರ್ಧಿಯಾಗಿ ಹೊರಹೊಮ್ಮಿದ್ದಾರೆ.

ದೀಪಿಕಾ 'ಫೇಕ್'

ಸೀರಿಯಲ್ ನಲ್ಲಿ ನಟಿಸುವ ಹಾಗೆ ದೀಪಿಕಾ ಇಲ್ಲೂ ಆಕ್ಟಿಂಗ್ ಮಾಡುತ್ತಿದ್ದಾರೆ. ಆಕೆ ಫೇಕ್ ಎಂದು ಇತರೆ ಸ್ಪರ್ಧಿಗಳು ಆರೋಪಿಸಿದ್ದರು. ಅಲ್ಲದೇ ದೀಪಿಕಾ ತುಂಬಾ ಎಮೋಷನಲ್ ಎಂದೂ ಪದೇ ಪದೇ ಬೆಟ್ಟು ಮಾಡಿ ತೋರಿಸಲಾಗಿತ್ತು. ಎಲ್ಲವನ್ನೂ ಸಹಿಸಿಕೊಂಡು ದೀಪಿಕಾ ಗ್ರ್ಯಾಂಡ್ ಫಿನಾಲೆವರೆಗೂ ಬಂದಿದ್ದಾರೆ.

ಶ್ರೀಶಾಂತ್ ಗೆ 'ತಂಗಿ'

'ಬಿಗ್ ಬಾಸ್-12' ಕಾರ್ಯಕ್ರಮದಲ್ಲಿ ದೀಪಿಕಾ ಅತಿ ಹೆಚ್ಚಾಗಿ ಕಾಣಿಸಿಕೊಂಡಿದ್ದು ಶ್ರೀಶಾಂತ್ ಜೊತೆಗೆ. ಕ್ರಿಕೆಟರ್ ಶ್ರೀಶಾಂತ್ ಗೆ 'ಭಾಯ್' ಎಂದು ಕರೆಯುತ್ತಿದ್ದ ದೀಪಿಕಾ, ಆತ ಟೆಂಪರ್ ರೈಸ್ ಮಾಡಿಕೊಂಡೆಲ್ಲಾ ತಂಗಿಯಾಗಿ ಸಮಾಧಾನ ಮಾಡಿದ್ದಾರೆ. ಶ್ರೀಶಾಂತ್ ತಪ್ಪು ಮಾಡಿದಾಗೆಲ್ಲಾ ದೀಪಿಕಾ ತಿದ್ದಿ ತೀಡಿದ್ದಾರೆ. ಸದಾ ಶ್ರೀಶಾಂತ್ ಪರ ವಹಿಸುತ್ತಿದ್ದ ಕಾರಣಕ್ಕೆ, ದೀಪಿಕಾ ಇತರೆ ಸ್ಪರ್ಧಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದರು.

'ಬಿಗ್ ಬಾಸ್' ವಿನ್ನರ್ ಅಗುತ್ತಾರಾ ದೀಪಿಕಾ.?

ನಟ ಶೋಯೆಬ್ ಇಬ್ರಾಹಿಂ ರನ್ನು ಮದುವೆ ಆದ ಕೆಲವೇ ತಿಂಗಳಲ್ಲಿ ದೀಪಿಕಾ ಕಕ್ಕರ್ 'ಬಿಗ್ ಬಾಸ್' ಮನೆ ಪ್ರವೇಶಿಸಿದರು. ಸೋಲು-ಗೆಲುವಿನ ಹಾದಿಯಲ್ಲಿ 'ಬಿಗ್ ಬಾಸ್-12' ಫಿನಾಲೆ ತಲುಪಿದ್ದಾರೆ ದೀಪಿಕಾ. ಹಲವು ವೀಕ್ಷಕರ ಹೃದಯ ಗೆದ್ದಿರುವ ದೀಪಿಕಾ 'ಬಿಗ್ ಬಾಸ್' ಟ್ರೋಫಿಯನ್ನೂ ಗೆಲ್ಲುತ್ತಾರಾ.? ನೋಡಬೇಕು.