ಮೆಟ್ರೋ ರೈಲಿನಲ್ಲಿ ಅನಿರುದ್ಧ್ - ಮೇಘ ಶೆಟ್ಟಿ 'ಜೊತೆ ಜೊತೆಯಲಿ'

'ಜೊತೆ ಜೊತೆಯಲಿ' ಮೆಟ್ರೋ ಪ್ರಯಾಣ

'ಜೊತೆ ಜೊತೆಯಲಿ' ಧಾರಾವಾಹಿ ಶುರುವಾಗಿದ್ದು ಕೆಲವೇ ಕೆಲವು ವಾರಗಳ ಹಿಂದೆಯಷ್ಟೇ. ಹೀಗಿದ್ದರೂ, ಟಿ.ಆರ್.ಪಿ ರೇಟಿಂಗ್ ನಲ್ಲಿ 'ಜೊತೆ ಜೊತೆಯಲಿ' ಟಾಪ್ ನಲ್ಲಿದೆ. ಕಿರುತೆರೆ ವೀಕ್ಷಕರ ಮನಮುಟ್ಟುವಲ್ಲಿ 'ಜೊತೆ ಜೊತೆಯಲಿ' ತಂಡ ಯಶಸ್ವಿ ಆಗಿದೆ. 'ಜೊತೆ ಜೊತೆಯಲಿ' ಧಾರಾವಾಹಿಗೆ ವೀಕ್ಷಕರ ಅಭಿಪ್ರಾಯ ಹೇಗಿದೆ ಅಂತ ಸ್ವತಃ ತಿಳಿದುಕೊಳ್ಳಲು ನಟಿ ಮೇಘ ಶೆಟ್ಟಿ ಜೊತೆಗೆ ನಟ ಅನಿರುದ್ಧ್ ಜತ್ಕರ್ 'ನಮ್ಮ ಮೆಟ್ರೋ'ದಲ್ಲಿ ಪ್ರಯಾಣ ಮಾಡಿದ್ದಾರೆ.

ಅನಿರುದ್ಧ್ ಗೆ ಖುಷಿಯೋ ಖುಷಿ

ಫುಲ್ ರಷ್ ಇದ್ದರೂ 'ನಮ್ಮ ಮೆಟ್ರೋ' ಹತ್ತಿದ ಅನಿರುದ್ಧ್ ಮತ್ತು ಮೇಘ ಶೆಟ್ಟಿ, ಜೊತೆಯಲ್ಲಿ ಪ್ರಯಾಣ ಮಾಡುತ್ತಿದ್ದ ಜನರ ಜೊತೆಗೆ ಮಾತನಾಡಿ ತಮ್ಮ ಧಾರಾವಾಹಿಯ ಕುರಿತು ಅಭಿಪ್ರಾಯ ಸಂಗ್ರಹಿಸಿದ್ದಾರೆ. 'ಜೊತೆ ಜೊತೆಯಲಿ' ಧಾರಾವಾಹಿ ಮತ್ತು ಅನಿರುದ್ಧ್ ನಟನೆ ಬಗ್ಗೆ ಜನರ ಪ್ರತಿಕ್ರಿಯೆ ಕಂಡು ನಟ ಅನಿರುದ್ಧ್ ಸಿಕ್ಕಾಪಟ್ಟೆ ಖುಷಿ ಪಟ್ಟಿದ್ದಾರೆ.

ಆರ್ಯವರ್ಧನ್ ಆಗಿ ಅನಿರುದ್ಧ್

'ಜೊತೆ ಜೊತೆಯಲಿ' ಧಾರಾವಾಹಿಯಲ್ಲಿ 45 ವರ್ಷದ ಶ್ರೀಮಂತ ಉದ್ಯಮಿ ಆರ್ಯವರ್ಧನ್ ಪಾತ್ರದಲ್ಲಿ ಅನಿರುದ್ಧ್ ಜತ್ಕರ್ ನಟಿಸಿದ್ದರೆ, ಹರೆಯದ ಹುಡುಗಿ ಅನು ಪಾತ್ರದಲ್ಲಿ ಮೇಘ ಶೆಟ್ಟಿ ಅಭಿನಯಿಸಿದ್ದಾರೆ. ಇವರಿಬ್ಬರ ನಡುವೆ ಮೂಡುವ ಪ್ರೀತಿ ಮತ್ತು ಮದುವೆಯ ಕಥೆಯೇ 'ಜೊತೆ ಜೊತೆಯಲಿ' ಸೀರಿಯಲ್ ನ ಕಥಾಹಂದರ.

ನಂಬರ್ ಒನ್ ಸ್ಥಾನದಲ್ಲಿದ್ದ 'ಜೊತೆ ಜೊತೆಯಲಿ'

ಅನಿರುದ್ಧ್ ಅಭಿನಯದ 'ಜೊತೆ ಜೊತೆಯಲಿ' ಧಾರಾವಾಹಿ ನಂ.1 ಸ್ಥಾನದಲ್ಲಿತ್ತು. ಝೀ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ಖ್ಯಾತ ಧಾರಾವಾಹಿಗಳನ್ನು ಹಿಂದಿಕ್ಕಿ, ಮೊದಲ ವಾರದಲ್ಲೆ ನಂ. 1 ಸ್ಥಾನ ಗಳಿಸಿತ್ತು. ಗಟ್ಟಿಮೇಳ, ಪಾರು, ಕಮಲಿ ಧಾರಾವಾಹಿಗಳನ್ನು 'ಜೊತೆ ಜೊತೆಯಲಿ' ಹಿಂದಕ್ಕೆ ತಳ್ಳಿತ್ತು.