ಅರ್ಧಾಂಗಿ: ಆಫೀಸಿಗೆ ಹೊರಟು ನಿಂತ ಅದಿತಿಗೆ ಕಂಡಿದ್ದು ಸೌಭಾಗ್ಯಳ ಕೋಟಿ ಕೋಟಿ ಆಸ್ತಿ!

ದಿಗಂತ್‌ನನ್ನು ಸರಿಪಡಿಸುವ ಹಾದಿಯಲ್ಲಿ ಅದಿತಿ

ದಿಗಂತ್‌ನನ್ನು ಬೇಗ ಮೊದಲಿನಂತೆ ಮಾಡುವುದಕ್ಕೆ ಎಲ್ಲಾ ರೀತಿಯ ತಯಾರಿ ನಡೆಸುತ್ತಿದ್ದಾಳೆ ಅದಿತಿ. ಅದಕ್ಕೆ ಈಗ ಅದಿತಿಯ ಸ್ನೇಹಿತ ಡಾಕ್ಟರ್ ಕೂಡ ಮನೆಗೆ ಬಂದಿದ್ದಾರೆ. ಆಫೀಸಿಗೆ ಹೋದರೆ ವಾತಾವರಣ ಬದಲಾಗಿ ಬೇಗ ಹುಷಾರಾಗಬಹುದು ಎಂಬ ನಂಬಿಕೆಯಿಂದ ಅದಿತಿ, ದಿಗಂತ್‌ನನ್ನು ಕರೆದುಕೊಂಡು ಆಫೀಸಿಗೆ ಹೊರಟಿದ್ದಾಳೆ. ಆಫೀಸಿಗೆ ಹೋಗುವ ಖುಷಿಯಲ್ಲಿ ಎಲ್ಲರಿಗಿಂತ ಮೊದಲು ದಿಗಂತ್ ಸಿದ್ಧವಾಗಿದ್ದಾರೆ.

ಅದಿತಿಯ ಪ್ಲ್ಯಾನ್ ಉಲ್ಟಾ ಮಾಡಿದ ಸೌಭಾಗ್ಯ

ದಿಗಂತ್ ಆಫೀಸಿಗೆ ಹೋದ್ರೆ ಎಲ್ಲಾ ರೀತಿಯ ನೆನಪುಗಳು ಬಂದರು ಬರಬಹುದು ಎಂಬುದು ಸೌಭಾಗ್ಯಗೆ ಕಾಡಿದ ಅನುಮಾನವಾಗಿದೆ. ಹೀಗಾಗಿ ಹೇಗಾದರೂ ಮಾಡಿ ದಿಗಂತ್‌ನನ್ನು ಆಫೀಸಿಗೆ ಕಳುಹಿಸದ ಹಾಗೆ ಮಾಡಬೇಕು ಎಂದೇ ಪ್ಲ್ಯಾನ್ ಮಾಡಿಕೊಂಡು ಬಂದ ಸೌಭಾಗ್ಯ, "ದಿಗಂತ್ ಮನಸ್ಥಿತಿ ಸರಿ ಹೋಗಲಿ, ಮೊದಲಿನಂತೆ ಆಗಲಿ ಎಂದೇ ವೈದ್ಯರನ್ನು ಮನೆಗೆ ಕರೆಸಿದ್ದೀಯಾ. ಈಗ ಅವನಿಗೆ ಟ್ರೀಟ್ಮೆಂಟ್ ಕೊಡಿಸದೆ ಆಫೀಸಿಗೆ ಕರೆದುಕೊಂಡು ಹೋದರೆ ಹೇಗಮ್ಮ" ಎಂದಿದ್ದಾರೆ. ಆಗ ಅದಿತಿ ಕೂಡ ಆ ಮಾತಿಗೆ ವಿವರಣೆ ನೀಡಿ, ಒಪ್ಪಿಸುವುದಕ್ಕೆ ಆಗದೆ, ದಿಗಂತ್‌ನನ್ನು ಮನೆಯಲ್ಲಿಯೇ ಬಿಟ್ಟು ಹೋಗಿದ್ದಾಳೆ.

ಮೊದಲ ಬಾರಿಗೆ ದಿಗಂತ್ ಕಣ್ಣಲ್ಲಿ ಕಣ್ಣೀರು

ದಿಗಂತ್‌ಗೆ ಅದಿತಿ ಒಬ್ಬಳಿದ್ದರೆ ಸಾಕು. ಬೇರೆ ಯಾವುದು ಬೇಕಾಗುವುದಿಲ್ಲ. ಆಟ ಆಡುವುದಕ್ಕೂ, ಪ್ರೀತಿ ಮಾಡುವುದಕ್ಕೂ, ತಿನ್ನುವುದಕ್ಕೂ ಅದಿತಿ ಬೇಕು. ಅದಿತಿ ಮಾತನ್ನು ಬಿಟ್ಟರೆ ಬೇರೆ ಯಾರ ಮಾತನ್ನು ಅಷ್ಟು ಸುಲಭದಲ್ಲಿ ದಿಗಂತ್ ಕೇಳುವುದಿಲ್ಲ. ಹೀಗಿರುವಾಗ ಅದಿತಿ ತನ್ನನ್ನು ಬಿಟ್ಟು ಆಫೀಸಿಗೆ ಹೋದರೆ ದಿಗಂತ್‌ಗೆ ಹೇಗೆ ಅನ್ನಿಸಬೇಡ? ಒಂಟಿತನ ಕಾಡಲು ಶುರುವಾಗಿದೆ. ಎದೆಯಲ್ಲಿ ತಳಮಳ. ಕಣ್ಣಲ್ಲಿ ಬೇಡವೆಂದರೂ ನೀರು ತಾನಾಗಿಯೇ ಬರುತ್ತಿದೆ. ಯಾರು ಸಮಾಧಾನ ಮಾಡುವುದಕ್ಕೆ ಬಂದರೂ ತಡೆದುಕೊಳ್ಳುತ್ತಿಲ್ಲ. ಸುಮ್ಮನೆ ಅಳುತ್ತಲೇ ರೂಮು ಸೇರಿದ್ದಾನೆ.

ಕೋಟಿ ಕೋಟಿ ಆಸ್ತಿಯ ಒಡತಿ ಸೌಭಾಗ್ಯ

ತಮ್ಮನ ಮನೆಯನ್ನು ಮುಳುಗಿಸಲು ಸ್ಕೆಚ್ ಹಾಕುತ್ತಿರುವ ಸೌಭಾಗ್ಯಳ ಬಳಿ ಏನು ಇಲ್ಲ ಎನ್ನುವಂತೇನು ಇಲ್ಲ. ಅದಾಗಲೇ ಕೋಟಿ ಕೋಟಿ ಆಸ್ತಿ ಅವಳ ಹೆಸರಲ್ಲಿದೆ. ಅದು ಕೂಡ ಬೇನಾಮಿ ಹಣದಿಂದಾನೇ ಮಾಡಿರುವುದು. ದಿಗಂತ್ ಕಂಪನಿಯಿಂದಾನೇ ಕೋಟಿ ಕೋಟಿ ಹಣ ಲೆಕ್ಕಕ್ಕೆ ಸಿಗದ ರೀತಿಯಲ್ಲಿ ಸೌಭಾಗ್ಯ ಅಕೌಂಟಿಗೆ ಹೋಗಿ ಬಿದ್ದಿದೆ. ದಿಗಂತ್ ತಂದು ಕೊಟ್ಟ ಕೆಲವೊಂದು ಪೇಪರ್‌ನಿಂದ ಈ ಎಲ್ಲಾ ವಿಚಾರಗಳು ಬಯಲಿಗೆ ಬಂದಿದೆ. ಈಗ ಆಫೀಸಲ್ಲೂ ಆಸ್ತಿ ಪತ್ರಗಳು ಸಿಕ್ಕಿವೆ.