ಪದವಿ ಓದುತ್ತಿದ್ದ ಜೈಜಗದೀಶ್ ಕನ್ನಡ ಚಿತ್ರರಂಗಕ್ಕೆ ಬಂದಿದ್ದು ಹೇಗೆ.?

ಚಿತ್ರನಟನಾಗುವ ಬಗ್ಗೆ ಕನಸು ಕಂಡಿರಲಿಲ್ಲ.!

''ನಾನು ಡಬಲ್ ಗ್ರ್ಯಾಜುಯೇಟ್ ಆಗಬೇಕು ಅನ್ನೋದು ನನ್ನ ತಂದೆಯ ಆಸೆ ಆಗಿತ್ತು. ಕೊನೆಯ ವರ್ಷ ಓದಬೇಕಾದರೆ, ಪುಟ್ಟಣ್ಣ ಕಣಗಾಲ್ ರವರಿಂದ ಆಫರ್ ಬಂತು. ಸಿನಿಮಾ ಸೇರಬೇಕು, ಚಿತ್ರನಟನಾಗಬೇಕು ಅಂತ ನಾನು ಕನಸು ಕೂಡ ಕಂಡವನಲ್ಲ. ನನ್ನ ತಂದೆಗೂ ಸಿನಿಮಾ ಬಗ್ಗೆ ಏನೂ ಗೊತ್ತಿರಲಿಲ್ಲ'' ಎಂದು ತಮ್ಮ ಅಂದಿನ ದಿನಗಳ ಬಗ್ಗೆ ಜೈಜಗದೀಶ್ ಮಾತಿಗಿಳಿದರು.

ಜೇಬಲ್ಲಿ 15 ರೂಪಾಯಿ ಇಟ್ಟುಕೊಂಡು ಬೆಂಗಳೂರಿಗೆ ಬಂದ ನಟ

''ಬೆಂಗಳೂರಿಗೆ ಕೂಡಲೆ ಬರಬೇಕು ಅಂತ ಪುಟ್ಟಣ್ಣ ಕಣಗಾಲ್ ಮತ್ತು ನಿರ್ಮಾಪಕರಿಂದ ಬುಲಾವ್ ಬಂತು. ನನ್ನ ಬಳಿ ಜೇಬಲ್ಲಿ 15 ರೂಪಾಯಿ ಇತ್ತು. ಆಗೆಲ್ಲ ಮೈಸೂರು ಟು ಬೆಂಗಳೂರು 3 ರೂಪಾಯಿ. ಬೆಂಗಳೂರಿನ ಬ್ರಾಡ್ ವೇ ಹೋಟೆಲ್ ನಲ್ಲಿ ನನಗೆ ರೂಮ್ ಮಾಡಲಾಗಿತ್ತು'' - ಜೈಜಗದೀಶ್, ನಟ

ಪುಟ್ಟಣ್ಣ ಹೇಳಿದ್ದು ಒಂದೇ ಮಾತು

''ಮಾರನೇ ದಿನ ಪುಟ್ಟಣ್ಣ ಕಣಗಾಲ್ ರವರನ್ನ ಭೇಟಿ ಮಾಡಿದೆ. ಆಗ ನಾನು ಅವರನ್ನ ನೋಡಿ ನಡುಗುತ್ತಿದ್ದೆ. ''ನನಗೆ ಆಕ್ಟಿಂಗ್ ಬರಲ್ಲ, ನಟನೆಯ ಅನುಭವ ಇಲ್ಲ. ಹೇಳಿಕೊಟ್ಟರೆ ಮಾಡುವೆ'' ಎಂದೆ. ಆಗ ಅವರು ಹೇಳಿದ್ದು ಒಂದೇ ಮಾತು. ''ನನ್ನ ಸಿನಿಮಾಗೆ ನೀನೇ ಹೀರೋ'' ಎಂದರು. ನಾನು ತುಂಬಾ ಥ್ರಿಲ್ ಆದೆ'' - ಜೈಜಗದೀಶ್, ನಟ

ಛೀಮಾರಿ ಹಾಕಿದ ತಂದೆ

''ಸಿನಿಮಾಗೆ ಸೆಲೆಕ್ಟ್ ಆಗಿರುವ ಬಗ್ಗೆ ತಂದೆಗೆ ಫೋನ್ ಮಾಡಿ ಹೇಳಿದಾಗ ಛೀಮಾರಿ ಹಾಕಿದರು. ಅದೃಷ್ಟವಶಾತ್ ಪುಟ್ಟಣ್ಣ ಗರಡಿಯಲ್ಲಿ ಬೆಳೆದು 45 ವರ್ಷ ಚಿತ್ರರಂಗದಲ್ಲಿ ಕೆಲಸ ಮಾಡಿದ್ದೇನೆ. 600 ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದೇನೆ. 25 ಚಿತ್ರಗಳನ್ನ ನಿರ್ಮಾಣ ಮಾಡಿದ್ದೇನೆ'' ಎಂದು ಖುಷಿಯಿಂದ ಹೇಳಿಕೊಂಡಿದ್ದಾರೆ ಜೈಜಗದೀಶ್.