ಊಟ ಸಿಗದೆ ಹಸಿದವರಿಗೆ ಕಿಚ್ಚನ ಕೈಯಡುಗೆ ಸವಿಯುವ ಭಾಗ್ಯ!

ಅಡುಗೆ ಮಾಡಿದ ಸುದೀಪ್

ಲಿವಿಂಗ್ ಏರಿಯಾದಲ್ಲಿರುವ ಟಿವಿಯಲ್ಲಿ ಏಕಾ-ಏಕಿ ಸುದೀಪ್ ದರ್ಶನವಾಯ್ತು. ಏಪ್ರನ್ ಧರಿಸಿ ಸಜ್ಜಾಗಿ ಒಬ್ಬರೇ ಮನೆಯಲ್ಲಿರುವ ಎಲ್ಲ ಸದಸ್ಯರಿಗೆ ವಿಧ ವಿಧವಾದ ಅಡುಗೆಗಳನ್ನು ತಾವೇ ತಯಾರಿಸಿ ಸುಂದರವಾಗಿ ಪ್ಯಾಕ್ ಮಾಡಿದ ಜೊತೆಗೆ ಮನೆಯ ಪ್ರತಿ ಸದಸ್ಯರಿಗೆ ಒಂದು ಸಣ್ಣ ಸಂದೇಶವನ್ನು ಸಹ ಊಟದ ಜೊತೆಗೆ ಕಳಿಸಿದ್ದರು ಸುದೀಪ್. ಸುದೀಪ್ ಅವರು ಅಡುಗೆ ಮಾಡುತ್ತಿರುವ ವಿಡಿಯೋವನ್ನು ಮನೆಯ ಸದಸ್ಯರಿಗೆ ಪ್ರದರ್ಶಿಸಲಾಯ್ತು.

ಊಟ ನೋಡಿ ಭಾವುಕರಾದ ಕಾವ್ಯಾ

ಸರಿಯಾಗಿ ಊಟ ಸಿಗದೆ ಒದ್ದಾಡುತ್ತಿದ್ದ ಮನೆಯ ಸದಸ್ಯರು ಸುದೀಪ್ ಕಳಿಸಿದ ಊಟವನ್ನು ಬಾಯಿ ಚಪ್ಪರಿಸಿಕೊಂಡು ಸವಿದರು. ಚಿಕನ್ ಸಿಗದೆ ಕಣ್ಣೀರು ಹಾಕಿದ್ದ ಕಾವ್ಯಾ, ಸ್ವತಃ ಸುದೀಪ್ ತಮಗಾಗಿ ಅಡುಗೆ ಮಾಡಿ, ರುಚಿ -ರುಚಿಯಾದ ಊಟ ಕಳಿಸಿದ್ದು ಅವರನ್ನು ಇನ್ನಷ್ಟು ಭಾವುಕಗೊಳಿಸಿತು. ಊಟ ಸಿಕ್ಕ ಮೇಲೂ ಬಹಳ ಸಮಯ ಊಟವನ್ನೇ ಮಾಡದೆ ಭಾವುಕರಾಗಿ ಕುಳಿತುಬಿಟ್ಟಿದ್ದರು. ರೂಪೇಶ್ ಶೆಟ್ಟಿ ಅಂತೂ ಪ್ರತಿ ತುತ್ತಿಗೂ ಆಹಾ-ಓಹೋ ಎನ್ನುತ್ತಾ ಸವಿಯುತ್ತಾ ಊಟ ಮಾಡಿದರು. ರೂಪೇಶ್ ರಾಜಣ್ಣ ಅವರು, ಊಟ ಕಳಿಸಿದ ಸುದೀಪ್‌ಗೆ ಸಾಷ್ಟಾಂಗ ನಮಸ್ಕಾರವನ್ನೇ ಮಾಡಿದರು.

ಹಲವು ತಿನಿಸು ಮಾಡಿಕೊಟ್ಟಿದ್ದರು ಸುದೀಪ್

ಚಿಕನ್‌ ತಿನಿಸುಗಳು, ಎಳನೀರು ಪಾಯಸ, ರುಚಿಯಾದ ರೈಸ್ ಇನ್ನೂ ಹಲವು ಬಗೆ-ಬಗೆಯ ತಿನಿಸುಗಳನ್ನು ಸುದೀಪ್ ಕಳಿಸಿದ್ದರು. ಸುದೀಪ್ ಅವರು, ಬಿಗ್‌ಬಾಸ್‌ ಮನೆಯವರಿಗಾಗಿ ಅಡುಗೆ ಮಾಡಿ ಬಡಿಸುವುದು ಇದು ಮೊದಲೇನಲ್ಲ. ಈ ಹಿಂದೆಯೂ ಕೆಲವು ಬಾರಿ ಸುದೀಪ್‌ ಅವರು ಬಿಗ್‌ಬಾಸ್‌ ಸದಸ್ಯರಿಗೆ ಕೈಯಾರೆ ಅಡುಗೆ ಮಾಡಿ ಬಡಿಸಿದ್ದರು. ಒಮ್ಮೆಯಂತೂ ಬಿಗ್‌ಬಾಸ್ ಮನೆಯ ಒಳಗೆ ಹೋಗಿಯೇ ಅಡುಗೆ ಮಾಡಿ ಸ್ಪರ್ಧಿಗಳಿಗೆಲ್ಲ ಬಡಿಸಿದ್ದರು.

ಅತ್ಯುತ್ತಮವಾಗಿ ಅಡುಗೆ ಮಾಡುತ್ತಾರೆ

ಸುದೀಪ್ ಅದ್ಭುತ ನಟನಾಗಿರುವ ಜೊತೆಗೆ ಹಲವು ಹವ್ಯಾಸಗಳನ್ನು ಸಹ ಹೊಂದಿದ್ದಾರೆ. ಅದರಲ್ಲಿ ಅವರಿಗೆ ಬಹಳ ಇಷ್ಟದ್ದು ಕ್ರಿಕೆಟ್ ಹಾಗೂ ಅಡುಗೆ ಮಾಡುವುದು. ಕ್ರಿಕೆಟ್‌ ಆಡುವುದು ಹಾಗೂ ವೀಕ್ಷಿಸುವುದು ಸುದೀಪ್ ಅವರ ಅತಿ ಮೆಚ್ಚಿನ ಹವ್ಯಾಸ. ಅದರ ಜೊತೆಗೆ ಅಡುಗೆ ಮಾಡುವುದು ಸಹ ಸುದೀಪ್‌ಗೆ ಬಹಳ ಅಚ್ಚು-ಮೆಚ್ಚು. ಸುದೀಪ್, ತಮ್ಮ ಮನೆಯಲ್ಲಿ ತಮಗಾಗಿ ವಿಶೇಷವಾದ ಅಡುಗೆ ಕೋಣೆಯನ್ನೇ ಡಿಸೈನ್ ಮಾಡಿಕೊಂಡಿದ್ದಾರೆ. ಮನೆಯವರಿಗೆ, ತಮ್ಮ ಪ್ರೀತಿ ಪಾತ್ರರರಿಗೆ ಅಡುಗೆ ಮಾಡಿ ಬಡಿಸುತ್ತಾರೆ. ತಮಗೆ ಬೇಸರವಾದಾಗಲೂ ಅಡುಗೆ ಮಾಡಿ ಆ ಮೂಡ್‌ನಿಂದ ಹೊರಗೆ ಬರುತ್ತೇನೆ ಎಂದು ಸುದೀಪ್ ಹೇಳಿಕೊಂಡಿದ್ದರು.