ಬಿಗ್ ಬಾಸ್ ಕನ್ನಡ 8ನೇ ಆವೃತ್ತಿಯ ವಿಶೇಷತೆಗಳೇನು?

17 ಜನ ಸ್ಪರ್ಧಿಗಳು ಕ್ವಾರಂಟೈನ್

ಬಿಗ್ ಬಾಸ್ 8ರಲ್ಲಿ 17 ಜನ ಸ್ಪರ್ಧಿಗಳನ್ನು ಮನೆಗೆ ಕಳುಹಿಸಲು ನಿರ್ಧರಿಸಿದ್ದು, ಎಲ್ಲರನ್ನು ಖಾಸಗಿ ಹೋಟೆಲ್‌ನಲ್ಲಿ ಕ್ವಾರಂಟೈನ್ ಮಾಡಲಾಗಿದೆ. ಎರಡು ಬಾರಿ ಕೊರೊನಾ ಪರೀಕ್ಷೆ ಮಾಡಲಾಗಿದೆ. ಎಲ್ಲರಿಗೂ ನೆಗಿಟಿವ್ ಬಂದಿದೆ. ಮನೆಗೆ ಕಳುಹಿಸುವ ಮುನ್ನ ಮೂರನೇ ಸಲ ಕೊವಿಡ್ ಪರೀಕ್ಷೆ ಮಾಡಲಾಗುತ್ತದೆ. ಆಗ ಯಾರಿಗಾದರೂ ಪಾಸಿಟಿವ್ ಬಂದರೆ ಅವರನ್ನು ಕಳುಹಿಸಲು ಸಾಧ್ಯವಿಲ್ಲ. ಸದ್ಯಕ್ಕೆ 17 ಮಂದಿ ಸಿದ್ಧರಾಗಿದ್ದಾರೆ. ಕೊನೆ ಘಳಿಗೆಯಲ್ಲಿ ಏನಾದರೂ ವ್ಯತ್ಯಾಸವಾದರೂ ಅಚ್ಚರಿ ಇಲ್ಲ ಎಂದು ಪರಮೇಶ್ವರ್ ಗುಂಡ್ಕಲ್ ತಿಳಿಸಿದ್ದಾರೆ.

ಅತಿಥಿಗಳಿಗೂ ಕ್ವಾರಂಟೈನ್ ಕಡ್ಡಾಯ

ಬಿಗ್ ಬಾಸ್ ಮನೆಗೆ ಪ್ರವೇಶ ಮಾಡುವ ಸ್ಪರ್ಧಿಗಳು, ತಾಂತ್ರಿಕ ವರ್ಗ, ಪ್ರೊಡಕ್ಷನ್ ತಂಡ ಸೇರಿದಂತೆ ಎಲ್ಲರನ್ನು ಕ್ವಾರಂಟೈನ್ ಮಾಡಲಾಗಿದೆ. ಕೆಲವು ದಿನ ಹೋಮ್ ಕ್ವಾರಂಟೈನ್ ನಂತರ ಹೋಟೆಲ್‌ನಲ್ಲಿ ಕ್ವಾರಂಟೈನ್ ಮಾಡಲಾಗಿದೆ. ಒಂದು ವೇಳೆ ಅತಿಥಿಗಳು ಯಾರಾದರೂ ಅಥವಾ ವೈಲ್ಡ್ ಕಾರ್ಡ್ ಸ್ಪರ್ಧಿ ಮನೆಗೆ ಹೋಗಬೇಕಾದರೂ ಕ್ವಾರಂಟೈನ್ ಅವಧಿ ಮುಗಿಸಿ ಕಳುಹಿಸಲಾಗುವುದು.

9.30ಕ್ಕೆ ಪ್ರಸಾರ-24 ಗಂಟೆ ನೋಡುವ ಅವಕಾಶ

ಪ್ರತಿದಿನ ರಾತ್ರಿ 9.30ಕ್ಕೆ ಬಿಗ್ ಬಾಸ್ ಕನ್ನಡ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದೆ. ಇನ್ನು ಪ್ರತಿ ವರ್ಷದಂತೆ ವೂಟ್‌ನಲ್ಲಿ ಅನ್‌ಕಟ್ ದೃಶ್ಯಗಳು ಟೆಲಿಕಾಸ್ಟ್ ಆಗಲಿದೆ. ಈ ಬಾರಿಯ ವಿಶೇಷ ಅಂದ್ರೆ ದಿನದ 24 ಗಂಟೆಯೂ ವೂಟ್‌ನಲ್ಲಿ ಕಾರ್ಯಕ್ರಮ ಪ್ರಸಾರ ಮಾಡುವ ಯೋಜನೆ ನಡೆದಿದೆ. ವಾರದ ಐದು ದಿನ 24 ಗಂಟೆಯೂ ಬಿಗ್ ಬಾಸ್ ಪ್ರಸಾರ ಮಾಡಬಹುದು. ಅದಕ್ಕಾಗಿ ಪ್ರತ್ಯೇಕ ಪಿಸಿಆರ್ ವ್ಯವಸ್ಥೆ ಸಹ ಮಾಡಲಾಗಿದೆ ಎಂದು ಗುಂಡ್ಕಲ್ ಮಾಹಿತಿ ನೀಡಿದರು.

ರಾಜಕಾರಣಿ ಇರ್ತಾರೆ

ಪ್ರತಿ ಸೀಸನ್‌ನಂತೆ ಈ ಆವೃತ್ತಿಯಲ್ಲೂ ಎಲ್ಲ ಕ್ಷೇತ್ರ ಸೆಲೆಬ್ರಿಟಿಗಳು ಇರ್ತಾರೆ. ಸಿನಿಮಾ, ಧಾರಾವಾಹಿ, ಸೋಶಿಯಲ್ ಮೀಡಿಯಾ, ಕ್ರೀಡೆ ಹಾಗೂ ಈ ಸಲ ರಾಜಕೀಯ ಕ್ಷೇತ್ರದಿಂದ ಒಬ್ಬ ರಾಜಕಾರಣಿ ಸಹ ಬಿಗ್ ಬಾಸ್ ಪ್ರವೇಶ ಮಾಡಲಿದ್ದಾರೆ. ಇದು ಈ ಆವೃತ್ತಿ ಬಹಳ ವಿಶೇಷವಾಗಬಹುದು.

ಸೀಸನ್ 9 ಇದೇ ವರ್ಷ?

ಕೊರೊನಾದಿಂದ ಕಳೆದ ವರ್ಷದಲ್ಲಿ ಬಿಗ್ ಬಾಸ್ ನಡೆಸಲು ಸಾಧ್ಯವಾಗಿಲ್ಲ. 2021ರ ಆರಂಭದಲ್ಲಿ ಸೀಸನ್ 8 ನಡೆಯುತ್ತಿದೆ. ಎಲ್ಲ ಅಂದುಕೊಂಡಂತೆ ಆದರೆ ಇದೇ ವರ್ಷ ಅಕ್ಟೋಬರ್ ಅಥವಾ ನವೆಂಬರ್‌ನಲ್ಲಿ ಒಂಭತ್ತನೇ ಆವೃತ್ತಿ ಸಹ ಪ್ರಾರಂಭವಾಗಲಿದೆ ಎಂದು ಸುದೀಪ್ ಹೇಳಿದರು.