ಮದುವೆ ಆಗ್ತಿದ್ದಾರೆ 'ಕಾಮಿಡಿ ಕಿಲಾಡಿ' ಜೋಡಿ : ಖುಷಿ ಹಂಚಿಕೊಂಡ ಜಿಜಿ

ಜನವರಿ 27ಕ್ಕೆ ನಿಶ್ಚಿತಾರ್ಥ

'ಕಾಮಿಡಿ ಕಿಲಾಡಿಗಳು' ಜೋಡಿ ಈಗ ನಿಜ ಜೀವನದಲ್ಲಿಯೂ ಒಂದಾಗುವ ನಿರ್ಧಾರ ಮಾಡಿದ್ದಾರೆ. ಗೋವಿಂದೆ ಗೌಡ ಹಾಗೂ ದಿವ್ಯ ಪರಸ್ಪರ ಪ್ರೀತಿ ಮಾಡುತ್ತಿದ್ದು, ಇದೀಗ ಮದುವೆ ಆಗುವ ನಿರ್ಧಾರ ಮಾಡಿದ್ದಾರೆ. ಅವರ ನಿಶ್ವಿತಾರ್ಥ ಇದೇ ತಿಂಗಳ 27ರ ಭಾನುವಾರದಂದು ಬೆಂಗಳೂರಿನಲ್ಲಿ ನಡೆಯಲಿದೆ.

ಶೃಂಗೇರಿಯಲ್ಲಿ ಮದುವೆ

ನಿಶ್ಚಿತಾರ್ಥದ ಎರಡು ತಿಂಗಳ ಬಳಿಯ ಗೋವಿಂದೆ ಗೌಡ ಹಾಗೂ ದಿವ್ಯ ಮದುವೆ ಕಾರ್ಯಕ್ರಮ ನಡೆಯಲಿದೆ. ಮಾರ್ಚ್ 14 ರಂದು ಜಿಜಿ ಅವರ ಕಲ್ಯಾಣೋತ್ಸವ ನಡೆಯಲಿದ್ದು, ಶೃಂಗೇರಿಯಲ್ಲಿ ಮದುವೆ ಕಾರ್ಯಕ್ರಮ ಜರುಗಲಿದೆ. ಶಾರದಾಂಬೆಯ ಆರ್ಶೀವಾದ ಪಡೆದು ಹೊಸ ಜೀವನಕ್ಕೆ ಈ ಜೋಡಿ ಕಾಲಿಡಲಿದ್ದಾರೆ.

ಪ್ರೀತಿ ಆಗಿದ್ದು ಯಾವಾಗ ?

ತಮ್ಮ ಪ್ರೀತಿಯ ಬಗ್ಗೆ ಮಾತನಾಡಿದ ಗೋವಿಂದೆ ಗೌಡ ನಾಚಿಕೊಂಡೆ ಉತ್ತರ ನೀಡಿದರು. ಕಾಮಿಡಿ ಕಿಲಾಡಿ ಕಾರ್ಯಕ್ರಮದಲ್ಲಿ ಪರಿಚಯ ಆದ ಈ ಜೋಡಿ ಕಾರ್ಯಕ್ರಮ ಮುಗಿದ ಮೇಲೆ ಪರಸ್ಪರ ಪ್ರೀತಿಯಲ್ಲಿ ಬಿದ್ದಿದ್ದಾರೆ. ಇಬ್ಬರು ಕೂತು ಮಾತಾಡಿ, ಮನೆಯವರ ಸಮ್ಮುಖದಲ್ಲಿ ಮದುವೆ ಆಗುತ್ತಿದ್ದಾರೆ.

ಇಬ್ಬರು ಸಿನಿಮಾಗಳಲ್ಲಿ ಬ್ಯುಸಿ

'ಕಾಮಿಡಿ ಕಿಲಾಡಿಗಳು' ಕಾರ್ಯಕ್ರಮದ ನಂತರ ದಿವ್ಯ ಮತ್ತು ಗೋವಿಂದೆ ಗೌಡ ಇಬ್ಬರೂ ಅನೇಕ ಸಿನಿಮಾ ಅವಕಾಶಗಳನ್ನು ಪಡೆದರು. ದಿವ್ಯ ಸದ್ಯ 'ಪುಣ್ಯಾತ್ ಗಿತ್ತೀಯರು' ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಗೋವಿಂದೆ ಗೌಡ ಅವರು 'ಕೆಜಿಎಫ್' ಬಳಿಕ 'ಭರಾಟೆ' ಸೇರಿದಂತೆ ಸಾಕಷ್ಟು ಚಿತ್ರಗಳ ಅವಕಾಶ ಪಡೆದಿದ್ದಾರೆ.