ಅಗಸ್ತ್ಯ ರಾಥೋಡ್ ಜೊತೆ ಹೊಸ ವರ್ಷ ಸಂಭ್ರಮಿಸಿದ ಹರಿಪ್ರಿಯಾ, ಯಾರು ಈ ಅಗಸ್ತ್ಯ?

ಸ್ನೇಹಿತರು, ಕುಟುಂಬದ ಜೊತೆ ಹರಿಪ್ರಿಯಾ ಪಾರ್ಟಿ

ಹೊಸ ವರ್ಷಕ್ಕೆ ತಡವಾಗಿ ಶುಭಕೋರಿರುವ ನಟಿ ಹರಿಪ್ರಿಯಾ ತನ್ನ ಸ್ನೇಹಿತರು ಮತ್ತು ಕುಟುಂಬದ ಜೊತೆ ಪಾರ್ಟಿ ಮಾಡಿದ್ದಾರೆ. ಈ ಫೋಟೋಗಳನ್ನು ಹಂಚಿಕೊಂಡು ''ಇದು ನನ್ನ ಮೊದಲ ಪೋಸ್ಟ್, ನಾನು ತಡವಾಗಿ ಶುಭಾಶಯ ತಿಳಿಸುತ್ತಿದ್ದೇನೆ. ಆದರೆ ನೀವೆಲ್ಲ ನನ್ನ ಹೃದಯಲ್ಲಿದ್ದೀರಾ. ಈ ವರ್ಷ ಖಂಡಿತ ನಮ್ಮ ಪರವಾಗಿರಲಿದೆ. ಈ ವರ್ಷ ಎಲ್ಲರಿಗೂ ಆರೋಗ್ಯ, ಸಂತೋಷ ಸಿಗಲಿ ಎಂದು ಬಯಸುತ್ತೇನೆ'' ಎಂದು ವಿಶ್ ಮಾಡಿದ್ದಾರೆ.

ಕಿರುತೆರೆ ನಟ ಯಾರು?

ಹರಿಪ್ರಿಯಾ ಹಂಚಿಕೊಂಡಿರುವ ಫೋಟೋಗಳಲ್ಲಿ ಕಿರುತೆರೆ ನಟ ಅಭಿನವ್ ವಿಶ್ವನಾಥನ್ ಹೆಚ್ಚು ಗಮನ ಸೆಳೆಯುತ್ತಿದ್ದಾರೆ. ಇದುವರೆಗೂ ಹರಿಪ್ರಿಯಾ ಅವರ ಜೊತೆ ಈ ನಟನನ್ನು ಸಾರ್ವಜನಿಕವಾಗಿ ಅಥವಾ ಖಾಸಗಿ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿರಲಿಲ್ಲ. ಹೊಸ ವರ್ಷದ ಸಂಭ್ರಮದಲ್ಲಿ ಪಾಲ್ಗೊಂಡಿರುವುದು ಚರ್ಚೆಗೆ ಕಾರಣವಾಗಿದೆ.

ಅಗಸ್ತ್ಯ ನಿಮಗೆ ಏನಾಗ್ಬೇಕು?

ಅಗಸ್ತ್ಯ ರಾಥೋಡ್ ಅವರ ಬಗ್ಗೆ ಪರಿಚಯ ಹೊಂದಿಲ್ಲದ ಅನೇಕರು ಯಾರು ಈ ಹುಡುಗ ಎಂದು ಪ್ರಶ್ನಿಸುತ್ತಿದ್ದಾರೆ. ಹರಿಪ್ರಿಯಾ ಅವರ ಪೋಸ್ಟ್‌ಗೆ ''ನಿಮಗೆ ಅಗಸ್ತ್ಯ ರಾಥೋಡ್ ಏನಾಗಬೇಕು...?'' ಎಂದು ಪ್ರಶ್ನಿಸುತ್ತಿದ್ದಾರೆ.

'ನನ್ನ ಅರಸಿ ರಾಧೆ' ಧಾರಾವಾಹಿ ನಟ

ಅಂದ್ಹಾಗೆ, ಅಗಸ್ತ್ಯ ರಾಥೋಡ್ ಮೂಲ ಹೆಸರು ಅಭಿನವ್ ವಿಶ್ವನಾಥನ್. ಅಭಿನವ್ ಕನ್ನಡ ಕಿರುತೆರೆ ಇಂಡಸ್ಟ್ರಿಯಲ್ಲಿ ಪರಿಚಿತ ವ್ಯಕ್ತಿ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುವ 'ನನ್ನ ಅರಸಿ ರಾಧೆ' ಧಾರಾವಾಹಿಯಲ್ಲಿ ಅಗಸ್ತ್ಯ ರಾಥೋಡ್ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಕಿರುತೆರೆ ನಟನಿಗೂ ಹರಿಪ್ರಿಯಾಗೂ ಹೇಗೆ ಪರಿಚಯ ಎನ್ನುವುದು ನೆಟ್ಟಿಗರಲ್ಲಿ ಕುತೂಹಲ ಸೃಷ್ಟಿಸಿದೆ.

ಹರಿಪ್ರಿಯಾ ಚಿತ್ರಗಳು

ಹರಿಪ್ರಿಯಾ ಸತತವಾಗಿ ಸಿನಿಮಾಗಳನ್ನು ಮಾಡ್ತಿದ್ದಾರೆ. ಸತೀಶ್ ನೀನಾಸಂ ಜೊತೆ ಪೆಟ್ರೋಮ್ಯಾಕ್ಸ್ ಚಿತ್ರೀಕರಣ ಮುಗಿಸಿದ್ದಾರೆ. ದಿಗಂತ್ ಜೊತೆ ಒಂದು ಸಿನಿಮಾ ಪೂರ್ಣಗೊಳಿಸಿದ್ದಾರೆ. ಬೆಲ್‌ಬಾಟಂ 2, ಹ್ಯಾಪಿ ಎಂಡಿಂಗ್, ಲಗಾಂ, ಅಮೃತಮತಿ ಚಿತ್ರಗಳಲ್ಲಿಯೂ ಹರಿಪ್ರಿಯಾ ನಟಿಸುತ್ತಿದ್ದಾರೆ.