ಅನಿರುದ್ಧ್‌ನ ಕಿರುತೆರೆಯಿಂದ 2 ವರ್ಷ ದೂರು ಇಡುವುದು ಅಷ್ಟು ಸುಲಭನಾ?

ಬ್ಯಾನ್‌ ಆಗುವಂತಹ ತಪ್ಪು ಮಾಡಿದ್ರಾ?

ಅಲ್ಲಾ ಸ್ವಾಮಿ ಒಂದು ಮನೆ ಅಂದಮೇಲೆ, ತಂಡ ಅಂದಮೇಲೆ ಗಲಾಟೆ ಸಹಜ. ಮಾತಿಗೆ ಮಾತು ಬೆಳೆಯುವುದು, ಯಾರೋ ಕೋಪಿಸಿಕೊಂಡು ಹೋಗುವುದು ಮತ್ತೆ ರಾಜಿ ಮಾಡಿಕೊಳ್ಳುವುದು ಎಲ್ಲಾ ಸರ್ವೇ ಸಾಮಾನ್ಯ. ಅದು 'ಜೊತೆ ಜೊತೆಯಲಿ' ತಂಡದಲ್ಲೂ ನಡೀತಿತ್ತು ಎಂದು ನಿರ್ಮಾಪಕರು ಒಪ್ಪಿಕೊಂಡಿದ್ದಾರೆ. ಅನಿರುದ್ಧ್ ಕೂಡ ಹೇಳಿದ್ದಾರೆ. ಈಗಲೂ ಆಗಿರುವುದು ಅದೇ ಅಲ್ಲವೇ. ಸ್ಕ್ರಿಪ್ಟ್ ಸರಿಯಿಲ್ಲ ಎನ್ನುವ ಕಾರಣಕ್ಕೆ ಆರ್ಯವರ್ಧನ್ ಪಾತ್ರಧಾರಿ ಅನಿರುದ್ಧ್ ಗಲಾಟೆ ಮಾಡಿಕೊಂಡು ಶೂಟಿಂಗ್ ಬಿಟ್ಟು ಸೆಟ್‌ನಿಂದ ಎದ್ದು ಹೋಗಿದ್ದಾರೆ. ಅಷ್ಟಕ್ಕೆ 2 ವರ್ಷ ಬ್ಯಾನ್ ಎಂದರೆ ಹೇಗೆ? ಎನ್ನುವುದು ಕೆಲವರ ವಾದ.

ಅನಿರುದ್ಧ್‌ ಹಲ್ಲೆ ಮಾಡಿದ್ದಾರಾ?

ಸಾಮಾನ್ಯವಾಗಿ ಬ್ಯಾನ್ ಎನ್ನುವ ಮಾತು ಬರುವುದು ದೊಡ್ಡಮಟ್ಟದಲ್ಲಿ ಗಲಾಟೆ ನಡೆದಾಗ, ಮಾರಾಮಾರಿ ನಡೆದು ಯಾರ ಮೇಲಾದರೂ ಹಲ್ಲೆ ಮಾಡಿದ್ದಾಗ, ಅದು ಕ್ಷಮಿಸಲಾಗದಂತಹ ತಪ್ಪು ಎಂದಾಗ, ಅವರಿಂದ ಮತ್ತೆ ಸಮಸ್ಯೆ ಆಗಬಹುದು ಎನ್ನುವ ಭಯ ಇದ್ದಾಗ ಈ ರೀತಿ ನಿರ್ಧಾರ ಕೈಗೊಳ್ಳುವುದು ಸಮಂಜಸ ಎನ್ನಿಸುತ್ತದೆ. ಆದರೆ ನಟ ಅನಿರುದ್ಧ್ ಅಂತಹ ತಪ್ಪು ಮಾಡಿಯೇ ಇಲ್ಲವಲ್ಲ. ಈ ಕ್ಷಣಕ್ಕೂ ನಿರ್ಮಾಪಕರನ್ನು ಬಿಟ್ಟು ತಂಡದ ಬಹುತೇಕ ಎಲ್ಲರೂ ಅನಿರುದ್ಧ್‌ ತಂಡಕ್ಕೆ ವಾಪಸ್‌ ಬರಬೇಕು ಎಂದು ಚಾತಕ ಪಕ್ಷಿಗಳಂತೆ ಕಾಯುತ್ತಿದ್ದಾರೆ.

ಕಿರುತೆರೆ ನಿರ್ಮಾಪಕರ ಸಂಘ ಇದ್ಯಾ?

ಕರ್ನಾಟಕ ಟೆಲಿವಿಷನ್ ಅಸೋಸಿಯೇಷನ್‌ನಲ್ಲಿ ನಿರ್ಮಾಪಕರದ್ದು ಒಂದು ವಿಭಾಗ ಅಷ್ಟೇ ಎನ್ನುವ ಮಾತಿದೆ. ಆದರೆ ನಿರ್ಮಾಪಕರ ಸಂಘದಲ್ಲಿ ನಾವು ನಿರ್ಧಾರ ಕೈಗೊಂಡಿದ್ದೇವೆ ಎಂದು ಮೊನ್ನೆ ಸುದ್ದಿಗೋಷ್ಠಿಯಲ್ಲಿ ಆರೂರು ಜಗದೀಶ್ ಅಂಡ್ ಟೀಂ ಹೇಳಿಕೊಂಡಿದೆ. ನಿಮ್ಮ ಧಾರಾವಾಹಿಯಲ್ಲಿ ಅನಿರುದ್ಧ್‌ ನಟಿಸುವುದು ಬೇಡ ಎಂದರೆ ಬೇಡ. ಅವರನ್ನು ಕೈ ಬಿಟ್ಟು ಬೇರೆಯವರನ್ನು ಆಯ್ಕೆ ಮಾಡಿಕೊಳ್ಳುವುದು ನಿಮಗೆ ಬಿಟ್ಟ ವಿಚಾರ. ಆದರೆ ಬೇರೆ ಯಾವುದೇ ವಾಹಿನಿಯ ಯಾವುದೇ ಕಾರ್ಯಕ್ರಮ, ಧಾರಾವಾಹಿಯಲ್ಲಿ ಅವರು ನಟಿಸಬಾರದು ಎಂದರೆ ಹೇಗೆ? ಎನ್ನುವ ಟೆಕ್ನಿಕಲ್ ಪ್ರಶ್ನೆಯನ್ನು ಕೆಲವರು ಕೇಳುತ್ತಿದ್ದಾರೆ.

ಅನಿರುದ್ಧ್ ಧಾರಾವಾಹಿ ನಿರ್ಮಾಣಕ್ಕಿಳಿದರೆ ಮುಂದೇನು?

ಕಿರುತೆರೆಯ ನಿರ್ಮಾಪಕರೆಲ್ಲಾ ಸೇರಿ ಅನಿರುದ್ಧ್‌ ಅವರನ್ನು 2 ವರ್ಷ ಕಿರುತೆರೆಯಿಂದ ದೂರ ಇಡುವ ನಿರ್ಧಾರಕ್ಕೆ ಬಂದಿದ್ದೀವಿ ಎಂದು ಹೇಳುತ್ತಿದ್ದೀರಾ. ಒಂದು ವೇಳೆ ಅನಿರುದ್ಧ್ ಸ್ವತಃ ತಾವೇ ಧಾರಾವಾಹಿ ನಿರ್ಮಾಣ ಮಾಡುತ್ತೀನಿ ಎಂದರೆ? ಅಥವಾ ಬೇರೆ ಯಾವುದಾದರೂ ವಾಹಿನಿ ಅಥವಾ ಹೊಸ ನಿರ್ಮಾಪಕರು ಅನಿರುದ್ಧ್‌ ಅವರನ್ನು ಬಳಸಿಕೊಂಡು ಕಾರ್ಯಕ್ರಮ ಮಾಡಿದರೆ ಅದನ್ನು ಬೇಡ ಎನ್ನಲು ಸಾಧ್ಯವೇ? ಎನ್ನುವ ಪ್ರಶ್ನೆಯನ್ನು ಕೆಲವರು ಎತ್ತಿದ್ದಾರೆ. ಒಟ್ಟಾರೆ ಈ ಹಗ್ಗ ಜಗ್ಗಾಟ ಎಲ್ಲಿಗೆ ಹೋಗಿ ನಿಲ್ಲುತ್ತದೋ ಸದ್ಯಕ್ಕಂತೂ ಕುತೂಹಲ.