ಗಗನ ಸಖಿ ಕನಸು ಕಂಡ ಅಭಿನಯಕ್ಕೆ ಬಂದ ನಟಿ ಪಲ್ಲವಿ ಗೌಡ!

ಪಲ್ಲವಿಗೆ ಗಗನ ಸಖಿ ಕನಸು!

ಗಗನಸಖಿ ಆಗಿ ಆಗಸದಲ್ಲಿ ಹಾರಾಡಬೇಕು ಎಂದು ಕನಸು ಕಂಡಿದ್ದ ಕಿರುತೆರೆ ನಟಿ ಪಲ್ಲವಿ ಗೌಡ, ಆಕ್ಟರ್‌ ಆಗಿದ್ದಾರೆ. ಅಚಾನಕ್ ಆಗಿ ನಟನಾ ಲೋಕಕ್ಕೆ ಕಾಲಿಟ್ಟ ಪಲ್ಲವಿ ಸಾಲು ಸಾಲು ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಅತಿ ಹೆಚ್ಚು ಲೀಡ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಪಲ್ಲವಿ ನಟನೆಯ ಜೊತೆಗೆ ನೃತ್ಯವನ್ನು ಕೂಡ ಮಾಡುತ್ತಾರೆ. ಇನ್ನು ಪಲ್ಲವಿ ಗೌಡಗೆ ಕಿರುತೆರೆಯಲ್ಲಿ ಅತ್ಯಂತ ಬೇಡಿಕೆ ಇದ್ದು, ಒಟ್ಟೊಟ್ಟಿಗೆ ಎರಡೆರಡು ಧಾರಾವಾಹಿಗಳಲ್ಲಿ ನಟಿಸುತ್ತಿದ್ದಾರೆ.

ಮುಖ್ಯ ಪಾತ್ರಗಳಲ್ಲಿ ಅಭಿನಯ!

ಪಲ್ಲವಿ ಗೌಡ ಅವರು ನೋಡುವುದಕ್ಕೆ ಸೌಂದರ್ಯದ ಗಣಿಯಂತೆಯೇ ಕಾಣುತ್ತಾರೆ. ಪುಟ್ಟ ಮುಖದ ಮುದ್ದು ಚೆಲುವೆ ಪಲ್ಲವಿ ಗೌಡ. ಕನ್ನಡ ಕಿರುತೆರೆಯಲ್ಲಿ 'ಚಂದ್ರ ಚಕೋರಿ', 'ಮನೆಯೊಂದು ಮೂರು ಬಾಗಿಲು', 'ಗಾಳಿಪಟ', 'ಸೇವಂತಿಗೆ', 'ಜೋಡಿಹಕ್ಕಿ', 'ಪರಿಣಯ', ಸೇರಿದಂತೆ ಹಲವು ಮೆಗಾ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಇನ್ನು ತೆಲುಗು ಹಾಗೂ ಮಲಯಾಳಂ ಭಾಷೆಯಲ್ಲೂ ನಟಿಸಿರುವ ಪಲ್ಲವಿ 'ಪಸುಕು ಕುಂಕುಮ', 'ಅಲ್ಲಿ ಆಂಬೆಲ್', 'ಚದುರಂಗಂ' ಮುಂತಾದ ಧಾರಾವಾಹಿಗಳಲ್ಲಿ ಬಣ್ಣ ಹಚ್ಚಿದ್ದಾರೆ.

ನಾಯಕಿ, ಖಳನಾಯಕಿ ಪಾತ್ರದಲ್ಲಿ ಮಿಂಚು!

ತೆಲುಗಿನ ಕಿರುತೆರೆಯಿಂದ ಪಲ್ಲವಿ ಗೌಡಗೆ ಆಫರ್ ಬಂದಾಗ ಭಾಷೆ ಬರುತ್ತಿರಲಿಲ್ಲವಂತೆ. ಆದರೆ, ನಟನೆ ಆರಂಭಿಸಿದ ಹದಿನೆಂಟೇ ದಿನಕ್ಕೆ ತೆಲುಗು ಕಲಿತಿದ್ದು ಹೆಮ್ಮೆಯ ವಿಷಯವೇ ಸರಿ. 'ಜೋಡಿಹಕ್ಕಿ'ಯಲ್ಲಿ ನೆಗೆಟಿವ್‌ ಪಾತ್ರದಲ್ಲಿ ನಟಿಸಿರುವ ಪಲ್ಲವಿಗೆ ನಾಯಕಿ ಹಾಗೂ ಖಳನಾಯಕಿ ಪಾತ್ರಗಳೆರಡೂ ಒಲಿದು ಬರುತ್ತಿವೆ. ಇನ್ನು ಪಲ್ಲವಿಗೆ ಖಳನಾಯಕಿ ಪಾತ್ರಗಳೆಂದರೆ ಇಷ್ಟವಂತೆ.

ಸಿನಿಮಾಗಳಲ್ಲಿ ಪಲ್ಲವಿ ಅಭಿನಯ!

ಇಂದಿಗೂ ಪಲ್ಲವಿ ಗೌಡ ' ಸೇವಂತಿ', 'ನಂದಿನಿ' ಹೆಸರಿನ ಮೂಲಕವೇ ಚಿರಪರಿಚಿತ. ಸಿನಿಮಾಗಳಲ್ಲೂ ನಟಿಸಿದ್ದು, 'ಪ್ರೇಮ ಗೀಮ ಜಾನೆ ದೋ' ಚಿತ್ರದ ಮೂಲಕ ಪಲ್ಲವಿ ಬೆಳ್ಳಿ ತೆರೆಗೆ ಎಂಟ್ರಿಕೊಟ್ಟರು. ಬಳಿಕ 'ಕಿಡಿ', 'ಕೊಡೆ ಮುರುಗ', 'ಜೋಡಿಹಕ್ಕಿ' ಹಾಗೂ 'ನಮ್ ಗಣಿ ಬಿಕಾಂ ಪಾಸು' ಚಿತ್ರಗಳಲ್ಲಿ ನಟಿಸಿದ್ದಾರೆ. ಇನ್ನು ಹೆಚ್ಚು ಹೆಚ್ಚು ಸಿನಿಮಾಗಳಲ್ಲಿ ನಟಿಸುವ ಆಸೆಯನ್ನು ಕೂಡ ಪಲ್ಲವಿ ಗೌಡ ಹೊಂದಿದ್ದಾರೆ. ಅವಕಾಶ ಸಿಕ್ಕರೆ, ಸಿನಿಮಾರಂಗದಲ್ಲೇ ಉಳಿಯುವ ಆಸೆಯನ್ನು ವ್ಯಕ್ತಪಡಿಸಿದ್ದಾರೆ.