ಆತಂಕದಲ್ಲಿ ಅಖಿಲಾಂಡೇಶ್ವರಿ: ಅರುಂಧತಿಗೆ ತಿಳಿಯುತ್ತಾ ಅರಸನ ಕೋಟೆಯ ಗುಟ್ಟು?

ಸ್ವಾಮೀಜಿ ಹೇಳಿದ ಮಾತು ಕದ್ದಾಲಿಸಿದ ದಾಮಿನಿ

ಇದನ್ನೆಲ್ಲ ಕದ್ದು ನೋಡುತ್ತಿದ್ದ ಧಾಮಿನಿಗೆ ಹಾಲು ಕುಡಿದಷ್ಟು ಸಂತೋಷ ಆಗುತ್ತದೆ. ದಾಮಿನಿ ಬಂದು ಆದಿ ಬಳಿ ಕೆಲ ಹುಡುಗಿಯರ ಫೋಟೋ ತೋರಿಸಿ ಇವರು ಆಗಬಹುದಾ ಎಂದೆಲ್ಲಾ ಪ್ರಶ್ನೆ ಮೇಲೆ ಪ್ರಶ್ನೆ ಕೇಳುತ್ತಾಳೆ. ಇದನ್ನು ಕೇಳಿ ಕೋಪದಿಂದ ಯಾಕೆ ಚಿಕ್ಕಮ್ಮ ಏನಾಗಿದೆ ನಿಮಗೆ ನನಗೆ ಯಾಕೆ ಫೋಟೋ ತೋರಿಸುತ್ತಿದ್ದಿರಾ ನನಗೆ ಮದುವೆ ಆಗಿರುವುದು ನಿಮಗೆ ಗೊತ್ತಿಲ್ವಾ ಎಂದು ಹೇಳುತ್ತಾನೆ.

ಎರಡನೇ ಮದುವೆ ಸುದ್ದಿ ಕೇಳಿ ಶಾಕ್ ಆದ ಆದಿ

ಅದಕ್ಕೆ ದಾಮಿನಿ, ನನಗೆ ಎಲ್ಲಾ ಗೊತ್ತು ಈಗ ಅಕ್ಕ ಸ್ವಾಮೀಜಿ ಬಳಿ ನಿನ್ನ ಜಾತಕ ತೋರಿಸಿದರು. ಅದರಲ್ಲಿ ನಿನಗೆ ಎರಡನೇ ಮದುವೆ ಆಗುವ ಯೋಗ ಇದೆ ಅಂತೆ ಎಂದು ಹೇಳಿದ್ದಾರೆ ಎನ್ನುತ್ತಾಳೆ. ಇದನ್ನು ಕೇಳಿ ಆದಿ ಶಾಕ್ ಆಗುತ್ತಾನೆ. ಇದೆಂತ ಹುಡುಗಾಟ ನನಗೆ ಎರಡನೇ ಮದುವೆನಾ ನಾನು ಪಾರುವನ್ನ ಬಿಟ್ಟು ಬೇರೆಯವರನ್ನು ತಲೆ ಎತ್ತಿ ಕೂಡ ನೋಡುವುದಿಲ್ಲ ಎಂದೆಲ್ಲಾ ಯೋಚಿಸುತ್ತಾನೆ. ಬಳಿಕ ಅಮ್ಮನ ಬಳಿ ಮಾತನಾಡುತ್ತೇನೆ ಎಂದು ಹೊರಡಲು ಮುಂದಾದಾಗ ದಾಮಿನಿ ಹೇಳುತ್ತಾಳೆ ನಾನು ಹೇಳಿದ್ದು ಎಂದು ಹೇಳಬೇಡ ಸ್ವಾಮಿಗಳು ಹೇಳುವುದನ್ನು ಕದ್ದು ಕೇಳಿಸಿಕೊಂಡೆ ಎಂದು ಹೇಳುತ್ತಾಳೆ.

ದೇವರ ಮುಂದೆ ಕಣ್ಣೀರು ಹಾಕುವ ಅಖಿಲಾಂಡೇಶ್ವರಿ

ಇತ್ತಕಡೆ ಪಾರು, ಅಖಿಲಾಂಡೇಶ್ವರಿ ಬಳಿ ಬಂದು ನಾಳೆ ಪ್ರಸಾದಕ್ಕೆ ಎನು ಮಾಡಲಿ ಅತ್ತೇಮ್ಮಾ ಎಂದು ಕೇಳುತ್ತಾಳೆ. ಅದಕ್ಕೆ ಅಖಿಲಾಂಡೇಶ್ವರಿ ನೀನೇನು ಮಾಡಬೇಡ ರೆಸ್ಟ್ ಮಾಡು ಎಲ್ಲಾ ಜನನಿ ನೋಡಿಕೊಳ್ಳುತ್ತಾರೆ. ನೀನೇನು ಜಾಸ್ತಿ ಕೆಲಸ ಮಾಡಲು ಹೋಗಬೇಡ ಎಂದು ಹೇಳಿ ಅಲ್ಲಿಂದ ಹೋಗುತ್ತಾಳೆ. ಆದರೆ ಪಾರುಗೆ ಕೊಂಚ ಬೇಸರ ಆಗುತ್ತದೆ. ಇತ್ತ ಗಣೇಶನ ಪ್ರತಿಮೆ ಬಳಿ ಬಂದು ಜೋರಾಗಿ ಅಳುತ್ತಾಳೆ ಅಖಿಲಾಂಡೇಶ್ವರಿ. ನನ್ನ ಮಗ ಸೊಸೆ ಚೆನ್ನಾಗಿರಲಿ. ಆದಿ ಯಾವ ಕಾರಣಕ್ಕೂ ಬೇರೆ ಮದುವೆ ಆಗಲು ನಾನು ಬಿಡುವುದಿಲ್ಲ. ಮುಗ್ದ ಪಾರುಗೆ ಒಳಿತು ಆಗಬೇಕು. ಕೆಡುಕು ಆಗಲು ನಾನು ಬಿಡುವುದಿಲ್ಲ ಎಂದೆಲ್ಲಾ ಅಳುತ್ತಾ ಗಣೇಶನ ಬಳಿ ಬೇಡಿಕೊಳ್ಳುತ್ತಾಳೆ.

ಆದಿ ಜೊತೆ ಅಖಿಲಾಂಡೇಶ್ವರಿ ಚರ್ಚೆ

ಅದೇ ಸಮಯಕ್ಕೆ ರಘು ಬಂದು, ಏನಾಯ್ತು ಯಾಕೆ ಅಳುತ್ತಿದ್ದಿಯಾ ಎಂದು ಅಖಿಲಾಂಡೇಶ್ವರಿಯನ್ನು ಕೇಳಿತ್ತಾನೆ. ಆಕೆ ಏನೋ ಒಂದು ಸಬೂಬು ಹೇಳಿ ತಪ್ಪಿಸಿಕೊಳ್ಳುತ್ತಾಳೆ. ಇತ್ತ ತನ್ನ ಮನದ ಮಾತನ್ನು ಯಾರಾದ್ರೂ ಒಬ್ಬರ ಬಳಿ ಹೇಳಬೇಕು ಎಂದು ಮನ ಹಾತೊರೆಯುತ್ತಾ ಇರುತ್ತದೆ. ಆದಿಯೆ ಅದಕ್ಕೆ ಸೂಕ್ತ ವ್ಯಕ್ತಿ ಎಂದುಕೊಂಡು ಆದಿ ಬಳಿ ಮಾತನಾಡಲು ಹೋಗುತ್ತಾಳೆ. ಮುಂದೇನು ಎಂಬುವುದನ್ನು ಕಾದು ನೋಡಬೇಕಿದೆ.