Kiran Raj: ಜೀವನದಲ್ಲಿ ತಾಳ್ಮೆ ಮತ್ತು ನಂಬಿಕೆ ಮುಖ್ಯ ಎಂದು ಕಲಿಸಿಕೊಟ್ಟದ್ದು 'ಕನ್ನಡತಿ' : ಕಿರಣ್ ರಾಜ್

ಜೀವನದಲ್ಲಿ ತಾಳ್ಮೆ ಮತ್ತು ನಂಬಿಕೆ ಮುಖ್ಯ

"ಕನ್ನಡತಿ ಧಾರವಾಹಿಯ ಮೊದಲು ನಾನು ಅಭಿನಯ ಮಾಡುತ್ತಿದ್ದರೂ ನನಗೆ ಯಾವುದೇ ಪ್ರಶಸ್ತಿ ಪುರಸ್ಕಾರಗಳು ಸಿಕ್ಕಿರಲಿಲ್ಲ. ಆದರೆ 'ಕನ್ನಡತಿ' ಧಾರಾವಾಹಿಯಿಂದ ಮೂರು ಬಾರಿ ನಾನು ಅನುಬಂಧ ಅವಾರ್ಡ್ಸ್ ನಂತಹ ದೊಡ್ಡ ದೊಡ್ಡ ವೇದಿಕೆಯಲ್ಲಿ ಪ್ರಶಸ್ತಿಗಳನ್ನು ಪಡೆಯಲು ಸಾಧ್ಯವಾಯಿತು. ಆ ಮಟ್ಟಿಗೆ ನಾನು ಸಂತೋಷವಾಗಿದ್ದೇನೆ. ನನ್ನ ಪ್ರಕಾರ ಒಳ್ಳೆಯ ಕಾರ್ಯಗಳು ಸ್ವಲ್ಪ ಸಮಯವನ್ನು ತೆಗೆದುಕೊಳ್ಳುತ್ತದೆ. ಅದಕ್ಕಾಗಿ ನಾವು ತಾಳ್ಮೆಯಿಂದ ನಂಬಿಕೆ ಇಟ್ಟು ಕಾಯಬೇಕಷ್ಟೆ. ನಮ್ಮಲ್ಲಿ ನಮಗೆ ನಂಬಿಕೆ ಇದ್ದರೆ ಯಾವುದನ್ನು ಬೇಕಾದರೂ ಮಾಡಲು ಸಾಧ್ಯ. ತಾಳ್ಮೆ ಹಾಗೂ ನಂಬಿಕೆ ಜೀವನದಲ್ಲಿ ಬಹಳ ಮುಖ್ಯ ಎಂಬುದನ್ನು ನಾನು ಕನ್ನಡತಿ ಧಾರಾವಾಹಿ ಹಾಗೂ ಅದರಿಂದ ಸಿಕ್ಕಿರುವ ಯಶಸ್ಸಿನಿಂದ ಕಲಿತಿದ್ದೇನೆ"

ಹರ್ಷ - ಭುವಿ ಅದ್ಭುತ ಪಾತ್ರಗಳು

'ಕನ್ನಡತಿ' ಧಾರಾವಾಹಿಯ ಕಥೆಯ ಬಗ್ಗೆ ಮಾತನಾಡಿದ ಅವರು "ಧಾರಾವಾಹಿಯ ಕಥೆಯ ಬರಹಗಾರರು ಬಹಳ ಸೂಕ್ಷ್ಮವಾಗಿ ಹರ್ಷ ಹಾಗೂ ಭುವಿ ಎಂಬ ಅದ್ಭುತ ಪಾತ್ರಗಳನ್ನು ಸೃಷ್ಟಿಸಿದ್ದಾರೆ. ಜೀವನದಲ್ಲಿ ನಮಗೆ ಹರ್ಷನ ಸ್ವಭಾವ ಹಾಗೆಯೇ ಭುವಿಯ ಸ್ವಭಾವ ಎರಡೂ ಬೇಕಾಗುತ್ತದೆ. ಯಾವಾಗಲೂ ನಾವು ಹರ್ಷನಂತೆಯೇ ಅಥವಾ ಯಾವಾಗಲೂ ಭುವಿಯಂತೆಯೇ ಇರಲು ಸಾಧ್ಯವಿಲ್ಲ‌‌‌. ಎರಡು ರೀತಿಯ ತದ್ವಿರುದ್ಧ ಸ್ವಭಾವಗಳು ನಮ್ಮಲ್ಲಿರುತ್ತವೆ ಇರಲೇಬೇಕು. ಆದರೆ ಅದನ್ನು ಯಾವ ರೀತಿ ಬ್ಯಾಲೆನ್ಸ್ ಆಗಿ ಇಟ್ಟುಕೊಳ್ಳುತ್ತೇವೆ ಎಂಬುದು ಮುಖ್ಯ. ಇಷ್ಟು ಒಳ್ಳೆ ಸೂಕ್ಷ್ಮವಾದ ಪಾತ್ರದ ಮೂಲಕ ಕರುನಾಡ ಜನರನ್ನು ರಂಜಿಸಲು ಅವಕಾಶ ದೊರೆತಿದ್ದಕ್ಕೆ ನಾನು ಸದಾ ಋಣಿ" ಎಂದರು.

'ಕನ್ನಡತಿ' ಆತ್ಮವಿಶ್ವಾಸ ತಂದುಕೊಟ್ಟಿದೆ

ಹಳೆಯದು ಮುಕ್ತಾಯವಾಗುವುದು ಹೊಸತನದ ಆಗಮನಕ್ಕಾಗಿ
ಧಾರಾವಾಹಿಯ ಮುಕ್ತಾಯದ ಬಗ್ಗೆ ಮಾತನಾಡಿದ ಅವರು "ಯಾವಾಗಲೂ ಎಂತದ್ದೇ ಒಳ್ಳೆಯದಾದರೂ ಅದು ಮುಗಿಯಲೂ ಕೂಡಾ ಒಂದು ಕಾಲ ಇದ್ದೇ ಇರುತ್ತದೆ. ಅದೇ ರೀತಿ 'ಕನ್ನಡತಿ' ಧಾರಾವಾಹಿ ಮುಗಿಯುತ್ತಿರುವುದು ಇನ್ಯಾವುದೋ ಅದ್ಭುತವಾದ ಹೊಸದೊಂದರ ಆರಂಭದ ಸೂಚನೆ ಎಂದು ನಾನು ನಂಬಿದ್ದೇನೆ. ಈ ಧಾರಾವಾಹಿ ನನಗೆ ತಂದುಕೊಟ್ಟ ಆತ್ಮವಿಶ್ವಾಸ ಹಾಗೂ ಯಶಸ್ಸಿನ ಬಗ್ಗೆ ನನಗೆ ಸದಾ ಸಂತೋಷವಿದೆ. ಇನ್ನು ಮುಂದೆ ನನ್ನನ್ನು ನಾನು ಸಿನಿಮಾಗಳಲ್ಲಿ ನೋಡಲು ಇಚ್ಚಿಸುತ್ತೇನೆ. ಅವಕಾಶಗಳು ಬಂದು ಒಳ್ಳೆಯ ಕಥೆಗಳಿದ್ದರೆ ಸಿನಿಮಾಗಳಲ್ಲಿ ಪಾತ್ರ ಮಾಡಿ ನನ್ನ ನಟನೆಯನ್ನು ಸಾಬೀತು ಮಾಡಿಕೊಳ್ಳುವ ಕಾಲ ಇದೀಗ ಬಂದಿದೆ ಎಂದು ನಂಬಿದ್ದೇನೆ"

ಜೀವನ ಮುಂದೆ ಸಾಗಲೇಬೇಕಿದೆ

ಸಹನಟರನ್ನು ಮಿಸ್ ಮಾಡುತ್ತೇನೆ ಎಂದ ಕಿರಣ್ ರಾಜ್
ಇನ್ನು "ಧಾರಾವಾಹಿ ಮುಗಿಯುವುದರಿಂದ ಹಲವಾರು ಸಹ ನಟರನ್ನು ಖಂಡಿತ ಮಿಸ್ ಮಾಡಿಕೊಳ್ಳುತ್ತೇನೆ. ಆದರೆ ಇದು ಅನಿವಾರ್ಯವಾಗಿರುವುದರಿಂದ, ಜೀವನವೂ ಇದೇ ರೀತಿ ಇರುವುದರಿಂದ ನಾವೆಲ್ಲರೂ ಇದನ್ನು ಸಮವಾಗಿ ಸ್ವೀಕರಿಸಿಕೊಂಡು ಮುಂದೆ ಹೋಗಬೇಕಿದೆ" ಎಂದು ಅಭಿಮಾನಿಗಳಿಗೆ ಹೇಳಿದ್ದಾರೆ ನಟ ಕಿರಣ್ ರಾಜ್.