ತೆಲುಗು ಕಿರುತೆರೆಯಲ್ಲೂ 'ಕಾಂತಾರ' ಕಿಚ್ಚು: KGF- 2 ರೇಟಿಂಗ್ ಮೀರಿಸಿ ದಾಖಲೆ

'ಕಾಂತಾರ' ಚಿತ್ರಕ್ಕೆ 12.35 TVR

ಸ್ಟಾರ್ ಮಾ ವಾಹಿನಿಯಲ್ಲಿ ಜನವರಿ 22ಕ್ಕೆ 'ಕಾಂತಾರ' ತೆಲುಗು ವರ್ಷನ್ ಮೊದಲ ಬಾರಿಗೆ ಪ್ರೀಮಿಯರ್ ಆಗಿತ್ತು. ಸಿನಿಮಾ ಕ್ರೇಜ್‌ಗೆ ತಕ್ಕಂತೆ ಜನ ಮುಗಿಬಿದ್ದು ಸಿನಿಮಾ ನೋಡಿದ್ದರು. ಪರಿಣಾಮ ಸಿನಿಮಾ ಭರ್ಜರಿ ರೇಟಿಂಗ್ ಪಡೆದುಕೊಂಡಿದೆ. ಬರೀ ಅರ್ಬನ್ ಮಾರ್ಕೆಟ್‌ನಲ್ಲಿ 12.35 TVR ಸಾಧಿಸಿ ಎಲ್ಲರ ಹುಬ್ಬೇರಿಸಿದೆ. ಡಬ್ಬಿಂಗ್ ಸಿನಿಮಾವೊಂದಕ್ಕೆ ಈ ಪಾಟಿ ರೇಟಿಂಗ್ ಸಿಕ್ಕಿರುವುದು ಕೆಲವರಿಗೆ ಅಚ್ಚರಿ ಮೂಡಿಸಿದೆ. ಡಬ್ಬಿಂಗ್ ಸಿನಿಮಾಗಳಲ್ಲಿ 'ಕಾಂತಾರ' ಅತಿ ಹೆಚ್ಚು ರೇಟಿಂಗ್ ಪಡೆದ ಟಾಪ್‌ ಸಿನಿಮಾಗಳ ಲಿಸ್ಟ್‌ನಲ್ಲಿದೆ.

KGF- 2 ಹಿಂದಿಕ್ಕಿ ಕಾಂತಾರ ದಾಖಲೆ

ಕೆಲ ದಿನಗಳ ಹಿಂದೆ ತೆಲುಗು ಜೀ ವಾಹಿನಿಯಲ್ಲಿ KGF- 2 ಸಿನಿಮಾ ಮೊದಲ ಬಾರಿಗೆ ಪ್ರಸಾರ ಆದಾಗ 11.9 ರೇಟಿಂಗ್ ಪಡೆದಿತ್ತು. ಅದಕ್ಕಿಂತ 'ಕಾಂತಾರ' ಸಿನಿಮಾ ಹೆಚ್ಚು ರೇಟಿಂಗ್ ಪಡೆದು ಗಮನ ಸೆಳೆದಿದೆ. ಇನ್ನುಳಿದಂತೆ ಡಬ್ಬಿಂಗ್ ಸಿನಿಮಾಗಳಲ್ಲಿ ಅತಿಹೆಚ್ಚು ಟಿಆರ್‌ಪಿ ಪಡೆದ ಸಿನಿಮಾಗಳಲ್ಲಿ 'ಬಿಚ್ಚಗಾಡು'(18.75) ಮೊದಲ ಸ್ಥಾನದಲ್ಲಿದ್ದರೆ 'ಕಬಾಲಿ' (14.52) 2ನೇ ಸ್ಥಾನ, 'ಕಾಂಚನಾ- 3' (13.10) ಸಿನಿಮಾ 3ನೇ ಸ್ಥಾನದಲ್ಲಿದೆ. ಆದರೆ ಈ 3 ಸಿನಿಮಾಗಳು ಥಿಯೇಟರ್‌ನಿಂದ ನೇರವಾಗಿ ಟಿವಿಗೆ ಬಂದಿತ್ತು. ಆದ ಓಟಿಟಿ ಕಾನ್ಸೆಪ್ಟ್ ಇರಲಿಲ್ಲ.

ಬಾಕ್ಸಾಫೀಸ್‌ನಲ್ಲಿ ದಾಖಲೆ

'ಕಾಂತಾರ' ಸಿನಿಮಾ ಮಾಡಿದ ಕರಾಮತ್ತು ಅಷ್ಟಿಷ್ಟಲ್ಲ. ಒಂದರ್ಥದಲ್ಲಿ KGF- 2 ಸಿನಿಮಾವನ್ನು ಮೀರಿ ಈ ಚಿಕ್ಕ ಸಿನಿಮಾ ಸದ್ದು ಮಾಡಿತ್ತು. ಕರಾವಳಿ ಸಂಸ್ಕೃತಿ, ಆಚರಣೆಗಳನ್ನು ಸೇರಿಸಿ ಮಾಡಿದ್ದ ಸಿನಿಮಾ ಪ್ರೇಕ್ಷಕರಿಗೆ ಅದ್ಭುತ ಅನುಭವ ನೀಡಿತ್ತು. ಪರಭಾಷಿಕರು ಕೂಡ ಸಿನಿಮಾ ನೋಡಿ ಬೆರಗಾಗಿದ್ದರು. ಪಂಜುರ್ಲಿ, ಗುಳಿಗ ದೈವದ ಬಗ್ಗೆ ಕೇಳಿ ತಿಳಿಯಲು ಆರಂಭಿಸಿದರು. ನೂರಾರು ಕೋಟಿ ಹಾಕಿ ಪ್ಯಾನ್ ಇಂಡಿಯಾ ಸಿನಿಮಾ ಮಾಡುವವರಿಗೂ 'ಕಾಂತಾರ' ಚಮಕ್ ಕೊಟ್ಟಿತ್ತು. ಒಟ್ಟು 400 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಎಲ್ಲರ ಹುಬ್ಬೇರಿಸಿತ್ತು.

ಶೀಘ್ರದಲ್ಲೇ ಸೀಕ್ವೆಲ್ ಮುಹೂರ್ತ

ಈಗಾಗಲೇ ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆ 'ಕಾಂತಾರ' ಸೀಕ್ವೆಲ್ ಘೋಷಿಸಿದೆ. ರಿಷಬ್ ಶೆಟ್ಟಿ ಅಂಡ್ ಟೀಂ ಕಥೆ ಹೆಣೆಯುವ ಕೆಲಸ ಆರಂಭಿಸಿದೆ. ಶೀಘ್ರದಲ್ಲೇ ಸಿನಿಮಾ ಸೆಟ್ಟೇರಲಿದೆ. ಮುಂದಿನ ವರ್ಷದಲ್ಲಿ ಸಿನಿಮಾ ರಿಲೀಸ್ ಮಾಡುವುದಾಗಿ ವಿಜಯ್ ಕಿರಗಂದೂರ್ ಘೋಷಿಸಿದ್ದಾರೆ. ಪ್ರೀಕ್ವೆಲ್‌ಗಿಂತ ಸೀಕ್ವೆಲ್ ಹಲವು ಪಟ್ಟು ದೊಡ್ಡದಾಗಿ ಇರುತ್ತದೆ. ಬಹಳ ಅದ್ಧೂರಿಯಾಗಿ ಸಿನಿಮಾ ಮಾಡಿ ಅಷ್ಟೇ ಚೆನ್ನಾಗಿ ಪ್ರಮೋಷನ್, ರಿಲೀಸ್ ಪ್ಲ್ಯಾನ್ ಕೂಡ ನಡೀತಿದೆ.